1 Ko̱ri̱nto̱ 4 - Tennet

To̱ni̱a̱k cik Ki̱ri̱sto̱

¹ Abunna ming a̱gga̱yyu̱ niga do̱o̱k, ke̱e̱ggi̱nna̱ naga du̱cca̱k cik Ki̱ri̱sto̱, eci bali Ta̱mu̱ta̱dde̱n aanyyet agit zoz cinne bali a̱lu̱gnye̱.

² Abunna zin ol ne̱k anyonik li̱ngli̱ngo̱ni̱ ko̱, ming ogon li̱ngli̱ngo̱n ju̱rru̱m zi̱nze̱tti̱nne̱ cik alali.

³ Iróng anna karike zinin gi̱i̱ ci apahekang niga annita lo̱ki̱ko̱ ci gerze ko̱; i̱llo̱i̱ gi̱i̱ imma ci kapaheke anna ele cinanni.

⁴ I̱llo̱i̱ gi̱i̱ ci gerze kanyai anna zinina. Iróng zin anna kazi ne kabunna. Manyi do̱ niko ci apaheka lo̱ki̱ko̱.

⁵ Iróng abunna ming apahekku niga ol ba̱ci̱nno̱k, aanycik nogo kerec i̱i̱te̱n wa ettede ol lo̱ki̱ko̱; e̱re̱yyo̱ ki̱ki̱ya̱ Manyi. Imma i̱i̱te̱ne̱ ci okko Manyi obodane, i̱ye̱la̱ atin enne kaal cik a̱lu̱gnye̱ ki̱ye̱lta̱i̱ ngati voori veelek, kar ki̱ti̱ri̱wa̱ kaal cik aavtte zi̱nze̱tti̱nne̱ cik ol cik diirik. I̱i̱te̱n neci okko Ta̱mu̱ta̱dde̱n irez e̱e̱t go̱o̱le̱ ci abahe enne.

⁶ I̱yo̱ko̱, gotonogga ki ngonogga tu̱we̱nta̱, kozozi anna zoz ci obod ki ele cinanni ki Apollos, eci korongnyung i̱ge̱t a̱gga̱c ke̱ngti̱ cik zo̱zzo̱k cik ka̱du̱wa̱ anna ko̱ ju̱rru̱m, kar zin a̱gga̱c keng ci zoz cu, “Unuwet lo̱ti̱nno̱k cik e̱he̱rye̱ ko̱.” Kar atin iróng odongnyu e̱le̱tti̱ zo̱ze̱ ci e̱e̱t co̱de̱ kommog gooni co̱de̱ ke̱.

⁷ Nya ci a̱a̱nyu̱ng i̱ge̱t a̱vvu̱t do̱ koola? Nya ci anyai i̱nna̱ ci iróng aruba ko̱? Gi̱i̱ta̱zi̱ zin ci ngen i̱nna̱ ruba baiza ko̱? Ming a̱a̱nyu̱ng Ta̱mu̱ta̱dde̱n kaal veelek, nya ming odongi i̱nna̱ ele ki ci ngen enne kaanyi i̱nne̱t ko̱?

⁸ I̱no̱nnu̱ niga anyakku kaal cik orongnyu niga do̱o̱k! Izetu niga i̱i̱tto̱k! Izetu niga alaat ngati ka̱zze̱na̱ naga to! Korongnya wo̱ye̱ ming izetu niga alaat, kar kabalit alaanzet necu ki i̱ge̱ta̱ nga̱to̱de̱!

⁹ Eci zin ngatinna̱ng to̱ni̱a̱k, ogon ki ci arikket Ta̱mu̱ta̱dde̱n nginti gerze vu̱rrte̱ ci ollu do̱o̱k, ku̱tu̱gu̱zza̱ naga kiwagon ol cik etteddek ol lo̱ki̱ko̱ ovvo atin a̱ru̱we̱ ka̱da̱i̱to̱. Ka̱vvu̱ta̱ naga ngati acinnet ebere do̱o̱k, anjilonya ki ol bu̱k.

¹⁰ Kogon naga ki i̱yo̱ko̱ ol wak tarbalik ko̱ zo̱ze̱ ci obod ki Ki̱ri̱sto̱! Ma̱i̱je̱ niga egenyyu zo̱ze̱ ci Ki̱ri̱sto̱. Kamujna naga, ma̱i̱je̱ niga okkomnu kak. O̱ngo̱o̱li̱nnu̱ng ol, imma ol ibbezeta!

¹¹ Kowoya gon naga magizet, kowoya bo̱do̱k kooret, kar kuburucca ru̱u̱ma̱ni̱ cik zorzorik, ogonet ol gerzet, i̱llo̱i̱ rok ce̱e̱z ci kabaka.

¹² Ka̱li̱ngli̱ngnya̱ naga oroot azzine cigga̱k. Kar gon ming otoryet ol, ka̱ma̱yu̱ka̱ nogo; ming a̱gi̱dde̱t ol, kanimnya gi̱de̱ne̱t cinne̱ng.

¹³ Ming odomnyet ol agita, abarik kabarizeka nogo zoz muluwe ci alali. Acinnet ol agit ki i̱yo̱ko̱ kaala cik a̱ju̱ko̱ni̱k tu̱.

¹⁴ Iróng anna keherakkung zin i̱ge̱t zo̱zzo̱k ne̱ko̱ ko̱ kar kadaung a̱li̱ya̱ni̱, abarik ki̱lo̱tu̱ng, eci niga e̱e̱ggi̱nnu̱ dooli cigannik kirezung.

¹⁵ Ming anyakku niga nu̱nu̱n ol cik meelek Ki̱ri̱sto̱ edemezung, iróng niga anyakku be̱e̱ti̱ggo̱k i̱bbo̱nge̱t omoto, eci kiize anna be̱e̱ti̱nno̱ng zo̱ze̱ ci Ki̱ri̱sto̱ Ye̱su̱ go̱o̱le̱ ci kuwaheka ol kaviyak cik abunna Ta̱mu̱ta̱dde̱no̱.

¹⁶ I̱yo̱ko̱ zin, kilalekkung anna, i̱ye̱zta̱ng annita baize cunno̱ng.

¹⁷ Imma zin zo̱ze̱ necu ki̱tto̱na̱kku̱ng anna i̱ge̱t Ti̱mo̱te̱yo̱ wa een ngeranni tu̱we̱nta̱, kirezi anna nonno eci alali zinin zo̱ze̱ ci Manyi. A̱du̱wa̱kku̱ng atin enne i̱ge̱t baiz cinanni ngati Ki̱ri̱sto̱ Ye̱su̱, a̱du̱wo̱ baizi cinanni ki de̱mzi̱ne̱t ci kedemeze anna ol ke̱le̱ci̱a̱nya̱i̱ lo̱o̱co̱we̱ do̱o̱k.

¹⁸ Izeto ol uggak ngatinno̱ng moote, ogon ki ci iróng atin anna ka̱kku̱na̱ku̱ng.

¹⁹ Abarik ka̱kku̱na̱ku̱ng atin anna i̱ge̱ta̱ ataman, ming elema Manyi, kar atin kuruba ozoz ol cik mootik ko̱ ku̱, anyak nege doiz ci ogon ku̱.

²⁰ Iróng ba̱a̱li̱ne̱t ci Ta̱mu̱ta̱dde̱no̱ een zoz ci kozoz utuga do̱, abarik een baiz ci abahe e̱e̱ti̱ komize ci Ta̱mu̱ta̱dde̱no̱.

²¹ I̱yo̱ko̱ zin, orongnyu niga jang? Orongnyang niga annit ki̱ki̱ya̱u̱ng i̱ge̱t kanyaha ki a̱lli̱, icima rezinta ki muluwe ci alali?