1 Jon 4 - Tennet

Itimanit vongizzok

¹ Gotonogga ki ngonogga tu̱we̱nta̱, ma a̱tu̱yyu̱ zoz ci ol cik azi ne kanyaka Vongiz ci Ta̱mu̱ta̱dde̱no̱, abarik abunna ming atimanu vongizzok ming e̱e̱ggi̱n cik Ta̱mu̱ta̱dde̱no̱ de̱de̱, eci anyak a̱ri̱tto̱k cik meelek volongak i̱vi̱tta̱k lo̱o̱c cu.

² Een necu gool ci a̱gga̱yyu̱ niga Vongiz ci Ta̱mu̱ta̱dde̱no̱: Azi Vongizi cinne ne, een Ye̱su̱ Ki̱ri̱sto̱ e̱e̱t ci diiri ci a̱kku̱ ngati Ta̱mu̱ta̱dde̱no̱.

³ Ma̱i̱je̱ vongizi ci iróng elemi ming a̱kku̱ Ye̱su̱ ngati Ta̱mu̱ta̱dde̱no̱, iróng vongizi neci een ci Ta̱mu̱ta̱dde̱no̱. Abarik vongizi neci een mo̱dde̱ni̱t ci Ki̱ri̱sto̱ bali iziktu niga okko atin a̱kku̱. A̱vvu̱ zin enne lo̱o̱ta̱ ngatu la̱du̱n.

⁴ Niga dooli cigannik tu̱we̱nta̱, a̱gga̱c e̱e̱ggi̱nnu̱ niga dooli cik Ta̱mu̱ta̱dde̱no̱, ommogtu niga vongizzok eci Vongizi ci A̱li̱le̱ aave ngatinno̱ng ko̱ ommog Sitan ci aave lo̱o̱ta̱ ngatu ko̱.

⁵ A̱vvu̱to̱ nege lo̱o̱ta̱ ngatu, ozoz nege kaal cik obod ki lo̱o̱c cu, imma ol cik lo̱o̱tu̱ aziye zoz cinne̱ng.

⁶ Imma naga ke̱e̱ggi̱n ol cik Ta̱mu̱ta̱dde̱no̱. Ming a̱gga̱ e̱e̱ti̱ imma Ta̱mu̱ta̱dde̱n, aziye zoz cinna̱ng, imma e̱e̱ti̱ ci iróng a̱gga̱ Ta̱mu̱ta̱dde̱n, iróng aziye zoz cinna̱ng. Een necu gool ci ka̱gga̱we̱ Vongiz ci een de̱de̱ ki vongiz ci volongo.

Een Ta̱mu̱ta̱dde̱n rezinet

⁷ Gotonogga wak zinino, abunna ming kirez e̱le̱tti̱ cigga̱c naga do̱o̱k eci rezinet a̱kku̱ ngati Ta̱mu̱ta̱dde̱no̱. Okko e̱e̱ti̱ ci irez ol, een enne do̱le̱c ci Ta̱mu̱ta̱dde̱no̱ kar enne ka̱gga̱ Ta̱mu̱ta̱dde̱n de̱de̱.

⁸ Ma̱i̱je̱ e̱e̱ti̱ ci iróng irez e̱e̱t ci diiri, iróng enne a̱gga̱ Ta̱mu̱ta̱dde̱n, eci Ta̱mu̱ta̱dde̱n een rezinet.

⁹ Een necu zin gool ci i̱ye̱le̱kke̱t Ta̱mu̱ta̱dde̱n rezinet cinne ngati i̱tto̱na̱ne̱ lo̱o̱c Ngerinne wa O̱de̱ Ṯok kar naga kurubta ruget zo̱ze̱ cinne.

¹⁰ Een necu rezinet ci Ta̱mu̱ta̱dde̱no̱: Iróng een agit cik kirez Ta̱mu̱ta̱dde̱n, abarik nonno ci irezet agita, kar ki̱tto̱na̱i̱t Ngerinne kize wawac ci okko alalnek mu̱nye̱n cigga̱c.

¹¹ Gonogga wak zinino, eci Ta̱mu̱ta̱dde̱n irezet oroot, abunna naga bu̱k ming kirezo e̱le̱tti̱.

¹² Ngen e̱e̱ti̱ imma kicin Ta̱mu̱ta̱dde̱n udut, abarik zin ming kirezo naga e̱le̱tti̱ne̱, abak enne ngatinna kar rezinet cinne kidimanet agit ju̱rru̱m baize cinna.

¹³ Ka̱gga̱ kabak naga zo̱ze̱ ci Ta̱mu̱ta̱dde̱no̱, kar bo̱do̱k enne ka̱vvu̱ ngatinna, eci enne aanyet Vongiz cinne a̱li̱le̱.

¹⁴ Kicinnet zin naga e̱le̱tti̱ne̱ kar bo̱do̱k ku̱du̱kta̱k ol zoz ci i̱tto̱na̱ne̱ Ta̱mu̱ta̱dde̱n Ngerinne kar ki̱ki̱ya̱ kize Ti̱ri̱zo̱i̱t ci olli lo̱o̱tu̱.

¹⁵ Ming elemi e̱e̱ti̱ imma azi ne, een Ye̱su̱ Ngerrti Ta̱mu̱ta̱dde̱no̱, aave zoz ci Ta̱mu̱ta̱dde̱no̱ ngatinne, okko enne bu̱k aave zo̱ze̱ ci Ta̱mu̱ta̱dde̱no̱.

¹⁶ Ka̱gga̱yya̱ naga e̱le̱tti̱ne̱, irezet agit Ta̱mu̱ta̱dde̱n, ka̱tu̱yya̱ zin zoz neci. Een Ta̱mu̱ta̱dde̱n rezinet, ming aruge e̱e̱ti̱ ngati Ta̱mu̱ta̱dde̱no̱, aave Ta̱mu̱ta̱dde̱n bu̱k ngatinne. Een Ta̱mu̱ta̱dde̱n rezinet. Ming kabak naga rezinta, kabak naga ki Ta̱mu̱ta̱dde̱n, kar enne ka̱vvu̱ baize cinna.

¹⁷ Imma zin go̱o̱le̱ necu, iddera rezinet orgen cinna do̱o̱k, kere zin naga i̱i̱te̱n ci lo̱ki̱ko̱ ngati okkomi zi̱nze̱tti̱ eci naga kogon ki enne rezinta lo̱o̱ta̱ ngatu.

¹⁸ I̱llo̱i̱ zin gi̱i̱ imma ci ko̱ngo̱o̱le̱ naga rezinta, eci rezinet de̱de̱ ottok kaal cik ko̱ngo̱o̱le̱ naga do̱o̱k, eci ngo̱li̱ne̱t een lo̱lo̱i̱t ci de̱zi̱nto̱. Ming o̱ngo̱o̱le̱ e̱e̱ti̱, iróng rezinet cinne eleno.

¹⁹ Kirezo naga e̱le̱tti̱ eci een Ta̱mu̱ta̱dde̱n ci irezet agit arrak oowa.

²⁰ Ming azi e̱e̱ti̱ imma ne, kirezi enne Ta̱mu̱ta̱dde̱n, imma ngatu amarine gooni, een enne volongnyoit. Eci ming iróng e̱e̱ti̱ irez gooni ci acin enne eberene, irez wo̱ye̱ enne Ta̱mu̱ta̱dde̱n ci iróng enne acin eberene ko̱?

²¹ Een necu ti̱lo̱wi̱ne̱t ci aanyet enne agita: Ming irez e̱e̱ti̱ imma Ta̱mu̱ta̱dde̱n anyik nonno la̱du̱n kirez ol bu̱k.