యోబు 18 - పరిశుద్ధ గ్రంథము O.V. Bible (BSI)

¹ అప్పుడు షూహీయుడైన బిల్దదు ఈలాగు ప్రత్యుత్తర మిచ్చెను–

² మాటలలో చిక్కుపరచుటకై మీ రెంతసేవు వెదకుదురు? మీరు ఆలోచనచేసి ముగించినయెడల మేము మాటలాడెదము.

³ మీ దృష్టికి మృగములుగాను మూఢులుగాను మేమెంచబడుట ఏల?

⁴ కోపముచేత నిన్ను నీవు చీల్చుకొనువాడా, నీ నిమిత్తము భూమి పాడుగా చేయబడునా? నీ నిమిత్తము కొండ దాని స్థానము తప్పునా?

⁵ భక్తిహీనుల దీపము ఆర్పివేయబడునువారి అగ్ని జ్వాలలు ప్రకాశింపకపోవును.

⁶ వారి గుడారములో వెలుగు అంధకారమగునువారియొద్దనున్న దీపము ఆరిపోవును

⁷ వారి పటుత్వముగల నడకలు అడ్డగింపబడునువారి స్వకీయాలోచన వారిని కూల్చును.

⁸ వారు వాగురలమీద నడచువారు తమ కాళ్లే వారిని వలలోనికి నడిపించును.

⁹ బోను వారి మడిమెను పట్టుకొనును వల వారిని చిక్కించుకొనును.

¹⁰ వారిని చిక్కించుకొనుటకై ఉరి నేలను ఉంచబడునువారిని పట్టుకొనుటకై త్రోవలో ఉచ్చు పెట్టబడును.

¹¹ నలుదిక్కుల భీకరమైనవి వారికి భయము కలుగ జేయును భయములు వారిని వెంటాడి తరుమును.

¹² వారి బలము క్షీణించిపోవునువారిని కూల్చుటకు ఆపద కాచియుండును.

¹³ అది వారి దేహ అవయవములను భక్షించును మరణజ్యేష్ఠుడు వారి అవయవములను భక్షించును.

¹⁴ వారి ఆశ్రయమైన వారి గుడారములోనుండి పెరికి వేయబడుదురువారు భీకరుడగు రాజునొద్దకు కొనిపోబడుదురు.

¹⁵ వారికి అన్యులైనవారు వారి గుడారములో నివాసము చేయుదురు

¹⁶ వారి నివాసస్థలముమీద గంధకము చల్లబడును. క్రింద వారి వేళ్లు ఎండిపోవును పైన వారి కొమ్మలు నరకబడును.

¹⁷ భూమిమీద ఎవరును వారిని జ్ఞాపకము చేసికొనరు మైదానమందు ఎక్కడను వారిని ఎరిగినవారు ఉండరు.

¹⁸ జనులు వారిని వెలుగులోనుండి చీకటిలోనికి తోలుదురు భూలోకములోనుండి వారిని తరుముదురు.

¹⁹ వారి ప్రజలలో వారికి పుత్రులైనను పౌత్రులైనను ఉండరువారు నివసించిన స్థలములో తప్పించుకొనినవాడు ఒకడైనను ఉండడు.

²⁰ తర్వాత వచ్చినవారు వారిమీద పడిన శిక్షనుచూచి విస్మయమొందుదురు పూర్వముండినవారు దానిని చూచి దిగులుపడుదురు.

²¹ నిశ్చయముగా భక్తిహీనుల నివాసములకు ఇట్టి గతి పట్టును దేవుని ఎరుగనివారి స్థలము ఇట్టిది.