Santiago 5 - Tachi Ak'õre Pedea

Tachi Ak'õrepa erreara pará berã ɨtɨai pada

¹ Erreara pará berã, ¡mɨ pedea ũrit'ɨ! ¡Jẽat'ɨ! Tãaraawẽane mãra nepɨrade p'aneenai pẽra ɨbɨa bia jẽat'ɨ.

² Jõma mãrapa uru p'anɨt'a beraada jĩra bɨma. Mãra neet'á simiapa ãrina jĩra bɨma.

³ Nãɨ k'aadeapema ewaride mãrapa erreara minachia yaa p'anɨma. Maamina mãra nee mãɨnepa p'arat'a mokosia bɨma. Tachi Ak'õrepa ak'ɨrude mãra erreara mokosia bɨpa k'awapiipɨ mãrapa piawẽa oosidaɨt'a. Mãɨpuru t'ɨpɨ uruade minachia mĩa p'ananaipɨ.

⁴ Mãra ne uu ĩjũa mimiapataɨrã́ erreara teadawẽa p'anɨma ãchia oodada pae. Mãɨpuru ãchia Tachi Ak'õrea ɨt'aa chiidi p'anɨma ɨtɨamẽrá. ¡Ũrit'ɨ! Ãchia ɨt'aa chiidi p'anɨt'a Tachi Chipari chi Ne Ãarea P'ue Bɨpa ũrisima.

⁵ Nãɨ ĩjũane mãrapa nejõma uru p'anɨma mãɨnepa mãrapa oo k'ɨ̃ria p'anɨt'a oopatama. Mãɨya mãra porek'eapiipachidama, p'ak'a porek'eapipata jĩra. Maamina p'ak'a peauta jĩra, tãaraawẽa bɨde Tachi Ak'õrepa mãra ɨtɨaipɨ.

⁶ Mãrapa ẽpẽra jĩp'a bɨt'a nepɨra pará bɨade adak'ari, peasidama. Mãɨne ichia mi ãpia pida ooé pasima peapidaemaapa.

Jõma choat'ɨ

⁷ Mãɨpuru ũpẽarã, jõma choat'ɨ aba Tachi Chipari cherudea. Ẽpẽra ne uu ĩjũane oo bɨ k'orea k'ɨ̃risiat'ɨ. Ne uuk'ari, ne k'ɨ̃risiawẽa nɨparima k'oe chek'ari, ichi ne uuda t'õnomẽrá mãɨnepa warimẽrá. Ara mãɨya nɨparima k'oe mãicha chek'ari, mãɨ ne uuda pia chaumẽrá.

⁸ Ara mãɨ jĩra jõma choa p'anɨnepa nɨ p'anat'ɨ mãɨnepa sõnepa ĩjãa p'anat'ɨ, Tachi Chipari chei ɨ̃rɨ paru pẽra.

⁹ Ũpẽarã, waapẽarã k'orea k'achia pedearãt'ɨ Jesucristoa mãra ɨtɨapiemaapa. Jesucristo tachi nepɨra ak'ɨparí tãaraawẽa bɨde cheipɨ.

¹⁰ Ũpẽarã, k'ɨ̃risiat'ɨ sãmaasã́ Tachi Ak'õre pari pedeapataɨrãpa choasidaɨt'a. Tachi Chipari t'ɨ̃nepa pedea p'anɨ k'orea minachia mĩanana ãarea choasidama. Ara mãɨ jĩra mãra pida ãarea choadai p'anɨma.

¹¹ Tachimá, chi minachia mĩa p'anɨne choa berã minachia pia p'anɨma. Mãrapa ũripatama Job ichi tãaraa minachia mĩana jõma choasit'a. Mãɨ ãarea tãaraa nepɨrade bak'ari k'awa p'anɨma Tachi Chiparipa ichi pia bɨsit'a. Ichia k'ĩra chupuria bɨma mãɨnepa k'ɨ̃rianepa k'aripai bɨma.

Tachi Ak'õrea ɨt'aa chiidit'ɨ

¹² Mãɨ awara ũpẽarã, abaɨ t'ɨ̃ne piarã ne oodayade arãt'ɨ. Pajãnepema t'ɨ̃ne, nãɨ ĩjũanepema t'ɨ̃ne wa mi ãpia pida parituadepa piarã ne oodayade arãt'ɨ. Ne oodayade adaipɨra, piarã oot'ɨ. Mãɨnepa oodaiwẽane adaipɨra, piarã oorãt'ɨ, Tachi Ak'õrea nepɨra ak'ɨpidaemaapa.

¹³ Mãranepema aba minachia mĩa bɨpɨra, Tachi Ak'õrea ɨt'aa chiidii bɨma. Aba arapá bɨpɨra, k'aridepa Tachi Ak'õrea pia pedeai bɨma.

¹⁴ Mãranepema aba k'ak'ua piawẽa bɨpɨra, ũpẽarã ak'ɨpataɨrã chõarã t'ɨ̃i bɨma ichi k'orea Tachi Ak'õrea ɨt'aa chiididamẽrá. Ãchia ɨt'aa chiidiutade Tachi Chipari Jesú t'ɨ̃ne olivobapa ãpia p'ɨrɨdai p'anɨma.

¹⁵ Mãɨnepa ĩjãa p'ananai p'anɨma Tachi Ak'õrepa ichi jɨpa beepiit'a. Mãɨya ɨt'aa chiididaipɨra Tachi Chiparipa jɨpa beepiipɨ. Chi k'ak'ua piawẽa badapa nemietá oosira, Tachi Chiparipa mãɨ k'ɨ̃risia atuaipɨ.

¹⁶ Mãɨ k'orea mãrapa nemietá oodada abaɨa jaradak'ari, jõrea jarat'ɨ. Mãɨnepa tausia Tachi Ak'õrea ɨt'aa chiidit'ɨ pia tuananai k'orea. Ẽpẽra jĩp'a bɨpa Tachi Ak'õrea ɨt'aa chiidisira Tachi Ak'õre jua chaareadepa ne waibɨa ooparima.

¹⁷ Elía tachi jĩra ẽpẽra pasima. Ichia sõnepa Tachi Ak'õrea ɨt'aa chiidisima k'oe chepiemaapa. Maapae Israel tuade ãyo k'ak'o ũpeak'ari ya estarik'a k'oe cheé pasima.

¹⁸ Mãɨya nak'ari ichia Tachi Ak'õrea ɨt'aa chiidisima k'oe chemẽrá. Ara mãɨne k'oe chesima. Mãɨpa ne uu ĩjũa t'õnok'ari chausima.

^19-20 Ũpẽarã, nãɨ k'awat'ɨ: chi piarã pedeadepema aba ãyá wãipɨra, mãɨne abaɨpa ichiá nemietá itu bɨpik'ari jĩitea chepiipɨra, mãɨ ẽpẽrapa nemietá minachia oo bada Tachi Ak'õrepa k'ɨ̃risia atuak'ari, ewaricha Ichi awara bai padadepema k'aripaipɨ.