Santiago 4 - Tachi Ak'õre Pedea

Tachi Ak'õrepa jara bɨ jõma oo p'anat'ɨ

¹ ¿Mãra k'ãre k'orea chõopatama mãɨnepa k'ĩruu pedeapatama? Mãrapa nemietá oo k'ɨ̃ria p'anɨt'a mãra k'ak'uade chõo p'anɨ jĩra p'anɨma mãɨya oodamẽrá.

² Mãrapa ne minachia jita k'ɨ̃riapatamina p'ue jitadak'ama. Mãɨpuru mĩa peapatama. Waapẽarãné jita k'ɨ̃riapatama. Maamina p'ue jitadak'a pẽra k'ĩruu pedeapatama mãɨnepa chõopatama. Mãrapa k'ɨ̃ria p'anɨt'a atadak'ama Tachi Ak'õrea ɨt'aa chiididak'a pẽra.

³ Mãɨnepa mãrapa Tachi Ak'õrea ɨt'aa chiidiutade jitadak'ama k'ɨ̃risia mietaadepa ɨt'aa chiidipata pẽra. Mãrapa ɨt'aa chiidipatama, machia k'ɨ̃ria p'anɨ jĩra oodai k'orea.

⁴ K'ima awaraɨ ome k'ãiuta jĩra, mãrapa Tachi Ak'õre itu bɨ p'anɨma nãɨ ĩjũanepemarãpa oopata jĩra oodai k'orea. ¿Mãrapa waidi atua p'anɨk'ãra chi nãɨ ĩjũanepema k'ɨ̃ria bɨt'a Tachi Ak'õre ome chi k'ĩramá jĩra beeima? Piarã parituapa nãɨ ĩjũanepema k'ɨ̃ria bɨpɨra, Tachi Ak'õre ome chi k'ĩramá paipɨ.

⁵ Tachi Ak'õrepa tachi sõne bɨda Jaorepa k'ɨ̃ria bɨma aba Tachi Ak'õret'u k'ɨ̃ria p'ananamẽrá. ¿Mãrapa k'ɨ̃risia p'anɨk'ãra Tachi Ak'õre pedeade ara ichi k'ɨ̃ría mãɨya bɨpisit'a?

⁶ Maamina Tachi Ak'õrepa ichi sõpiadepa tachi minachia k'aripa bɨma. Mãɨ k'orea Ichi Pedeade nãɨya bɨ bɨma: «Chi waapẽarã k'aepẽra chi ãchi k'ak'ua atepe k'ɨ̃riapataɨrã Tachi Ak'õrepa itu pia p'anapik'ama. Maamina chi atepe k'ɨ̃risiawẽa be Tachi Ak'õrepa ichi sõpiadepa k'aripaparima».

⁷ Mãɨ k'orea Tachi Ak'õre juade p'anat'ɨ. Tiore ĩjãarãt'ɨ. Mãɨya ichi mãramaapema mĩruwãipɨ.

⁸ Tachi Ak'õre k'ait'a chet'ɨ, mãɨyara ichi mãra k'ait'a cheipɨ. Mãra chi nemietá oopataɨrã, ¡machi jua sɨɨuta jĩra waa nemietá oorãt'ɨ! Mãra chi k'ɨ̃risia ume uru be, ¡k'ɨ̃risia mietá itu bɨdak'ari aba Tachi Ak'õret'u k'ɨ̃risiat'ɨ!

⁹ Mãrapa nemietá oodada k'orea sõp'ua p'anat'ɨ, jẽat'ɨ, sõp'uadak'ari, jẽat'ɨ. Waa sõ arapá eerãt'ɨ, mãɨpari mãrapa nemietá oodada k'orea minachia k'ɨ̃risia pará p'anat'ɨ.

¹⁰ Mãra Tachi Chipari k'ĩrari chi atepe p'anɨ jĩra k'ɨ̃risiarãt'ɨ. Mãɨya ichia mãra chi atepe p'anɨ jĩra bɨipɨ.

Waapẽarã k'orea k'achia pedearãt'ɨ

¹¹ Ũpẽarã, waapẽarã k'orea k'achia pedearãt'ɨ. Abaɨpa ichi ũpẽa k'orea k'achia pedeaipɨra wa nepɨra pará bɨade aipɨra, Moisepa bɨda k'orea k'achia pedea bɨma, mãɨnepa mãɨ Moisepa bɨdat'u nepɨra pará bɨade a k'ɨ̃risia bɨma. Abaɨpa Moisepa bɨda nepɨra pará bɨade a k'ɨ̃risia bɨpɨra, mãɨ bɨdade jara bɨ jĩra oowẽa bɨma. Moisepa bɨdade jara bɨ jĩra ooi k'aepẽra ichit'a waapẽarã chi nepɨra ak'ɨparí beesima.

¹² Maamina mãɨ Moisepa bɨda Tachi Ak'õrepa teasima. Ichiapuru tachi nepɨra ak'ɨparima. Aba ichiapuru ẽpẽrarã p'ue k'aripaipɨ mãɨnepa p'ue nepɨra pará p'anɨane aipɨ. Mãɨpuru ¿pɨ k'aima, pɨ ũpẽa mãɨya ak'ɨi k'orea?

Ara mãra k'orea pia k'ɨ̃risiat'ɨ

¹³ ¡Mɨ pedea ũrit'ɨ! Waapẽarãpa nãɨya jarapatama: «Naane wa nũ tachi p'uuru awaraɨdea wãnaipɨ. Mãma ãyo aba p'aneenaipɨ. Mãɨne ne oodaipɨ erreara jitadai k'orea».

¹⁴ Maamina mãrapa atua p'anɨma nũpema ewaride k'ãre baei. ¿Mãrapa k'awa p'anɨk'ãra nũpema ewaride chok'ae p'ananait'a? Atua p'anɨma. Mãra jɨ̃ara t'aua jĩra p'anɨma. Jɨ̃ara t'aua pak'ari isapea wẽpapari jĩra mãra sida tãaraa p'ananaiwẽma.

¹⁵ Mãɨpuru pia bɨma mãrapa nãɨya jaradai: «Tachi Chiparipa k'ɨ̃riaipɨra, tachi chok'ae p'ananaipɨ mãɨnepa ne ook'oadaipɨ».

¹⁶ Maamina mãrapa mãɨya oodak'ama. Mãɨpari chi atepe p'anɨrã k'ɨ̃risia p'anɨ pẽra jarapatama machia oo k'ɨ̃ria p'anɨt'a p'ue oodait'a. Piarã mãɨ k'achiapɨ.

¹⁷ Chi pia oo k'awa bɨpa mãɨya oowẽpɨra, nemietá oo bɨma.