Santiago 3 - Tachi Ak'õre Pedea

Jĩrak'aua pedeadai p'anɨma

¹ Ũpẽarã, mãrapa k'awa p'anɨma Tachi Ak'õrepa chi Ichi pedea tachi jarateapataɨrã atepe ak'ɨk'ari, ɨtɨaipɨ. Mãɨpuru chok'ará mãranepemarãpa jɨrɨdaiwẽa p'anɨma jarateapataɨrã padai k'orea.

² Jõma tachia minachia piawẽa oopatama. Abaɨpa pedearude waapẽarã sõp'uapik'apɨra, ne ãareaɨne jĩp'a bɨma mãɨnepa ichi k'ak'ua jõma jĩp'a uru bɨma.

³ Tachia mũra it'aede k'aapipatama ne oopidai k'orea. Mãɨya mũrapa tachi wã k'ɨ̃ria p'anɨmá ateewãparima.

⁴ Mãɨnepa p'ãp'orro k'orea k'ɨ̃risiat'ɨ. P'ãp'orro waibɨa bemina mãɨnepa nãu chi minachia p'õat'ɨ nɨbɨpa ateewãparimina, chi errabari bɨpa chi p'ɨrrt'ɨparí ãpia k'ɨrɨt'a p'ɨrrt'ɨparima ichi wã k'ɨ̃ria bɨmá wãi k'orea.

⁵ Ara mãɨya tachi k'ĩrame ãpia k'ɨrɨmina ara ichi k'orea joodoa minachia pedeaparima. Nãɨne k'ɨ̃risiat'ɨ: t'ɨpɨ tau ãpia urua bɨpa oi ĩjũa waibɨa bɨ ãarea paapiparima.

⁶ Tachi k'ĩrame t'ɨpɨ tau jĩra bɨma, mãɨnepa ne ãarea k'achia bɨma. Ara tachi k'ak'uade bɨ pẽra k'ak'ua ãarea mietá bɨpiparima, aba piuutadea. Mãɨnepa t'ɨpɨ uruapiru jĩra, tiorepa k'achia pedeapiparima.

⁷ Wawaria ãnimara mẽapema berã, ĩpana berã, ĩjũane urrujupataɨrã berã mãɨnepa p'usade berã ẽpẽrarãpa jitadak'ari ɨmɨmɨraapipatama.

⁸ Maamina tachi k'ĩrame mi ãpia pida p'uedak'ama. Tachi k'ĩramepa k'achia paritua pedeaparima. Nẽará mietá uru bɨ jĩra bɨma.

⁹ Tachi k'ĩramepa Tachi Chiparia pia pedeapatama, mãɨnepa ara mãɨ k'ĩramepa ẽpẽrarã́ k'achia pedeapatama, Tachi Ak'õrepa ara ichi jĩra oodamina.

¹⁰ Ara mãɨ it'aepa pedea pia mãɨnepa pedea k'achia sida pedeaparima. Ũpẽarã, mãɨya baiwẽa bɨma.

¹¹ P'ẽya uriadepa ¿pania pia mãɨnepa pania mietá cheparik'ãra?

¹² ¿Higo pak'urupa olivojõ chauparik'ãra? ¿Uva bɨɨrɨpa higojõ chauparik'ãra? Chauk'ama. Ara mãɨ jĩra p'ẽya uriadepa pania pia mãɨnepa pania mietá chek'ama.

Chi piarã k'ɨ̃risia k'awa bɨ

¹³ Mãra k'ɨ̃risia k'awa berã mãɨnepa ne k'awa berã k'ɨ̃risia p'anɨpɨra, pia nipapataɨdepa unupit'ɨ piarã mãɨya bet'a. Chi atepe k'ɨ̃risiadawẽa k'ɨ̃risiadepa pia oodai p'anɨma.

¹⁴ Maamina awaraɨpa uru bɨ k'orea wa oo bɨ k'orea sõpiawẽa p'aneenaipɨra, mãɨnepa waapẽarã k'aepẽra pia p'ananai k'orea jɨrɨdaipɨra, jararãt'ɨ mãra ne k'awa bet'a. Mãɨya jaradaipɨra, chi piarãpema pedea itu bɨ p'anɨma.

¹⁵ Mãra k'ɨ̃risiadepa mãɨya k'ɨ̃risia p'anɨpɨra, mãɨ k'ɨ̃risia Tachi Ak'õrenepa chek'ama, mãɨpari nãɨ ĩjũanepa, ẽpẽranepa, mãɨnepa tioredepa cheparima.

¹⁶ Chi waapẽarãpa uru p'anɨ k'orea wa oo p'anɨ k'orea sõpiawẽa berãpa mãɨnepa waapẽarã k'aepẽra pia p'ananai k'orea jɨrɨ berãpa paritua k'ĩruu pedeapatama mãɨnepa nejõma nemietá oopatama.

¹⁷ Maamina chi Tachi Ak'õrepa tea bɨ k'ɨ̃risia uru bepa ne ãareaɨne jĩp'a oopatama, jõmãɨrã ome ne k'ɨ̃risiawẽa p'ananamẽrá jɨrɨpatama, jõmãɨrã ome pia p'anapatama, waapẽarãpa jara bɨ ũrinai k'orea p'anapatama, chĩara k'ĩra chupuriapatama mãɨnepa nejõma pia oopatama. Abaɨ waapẽarã k'aepẽra pia atepe k'ɨ̃rianak'ama. Ichia jara bɨ jĩra ara mãɨya ooparima.

¹⁸ Ne k'ɨ̃risiawẽa baparidepa, waapẽarã ne k'ɨ̃risiawẽa p'anapiparima, net'a tau uupari jĩra. Mãɨ ẽpẽrapa unuipɨ chi waapẽarãpa jĩp'a oo p'anɨt'a, nejõ bɨɨrɨ pia chaupari jĩra.