Santiago 2 - Tachi Ak'õre Pedea

Abaɨ waapẽarã k'aepẽra pia atepe k'ɨ̃rianaiwẽa p'anɨ

¹ Ũpẽarã, mãrapa tachi pia bɨ Chipari Jesucristode ĩjãa p'anɨ pẽra abaɨ pia k'ɨ̃riarãt'ɨ waapẽarã k'aepẽra.

² Mãra ará nɨbeeutade ẽpẽrapa juade nee ooda jɨ̃ bɨ, neet'á k'ak'apia jɨ̃ bɨ eda cheipɨra, mãɨnepa ẽpẽra nenea k'ɨrɨpa neet'á sore jɨ̃ bɨ eda cheipɨra, ¿k'ãre oodaima?

^3-4 Mãrapa chi minachia k'ak'apia jɨ̃ bɨ pia ununak'ari ichiá nãma pia bɨmá suak'abari beepade adaipɨra, mãɨne chi nenea k'ɨrɨa jãma bai nɨbeepade adaipɨra, wa nãma mɨ jĩru k'ait'a jeeda suak'abari beepade adaipɨra, ¿ara mãra t'ãena aba chi abaɨ k'aepẽra atepe pia k'ɨ̃ria p'anɨwẽk'ãra? ¿K'ɨ̃risia mietaadepa mãɨya ak'ɨ p'anɨwẽk'ãra?

⁵ Ũpẽarã mɨa k'ɨ̃ria berã, ¡ũrit'ɨ! ¿Tachi Ak'õrepa nãɨ ĩjũane nenea k'ede k'aripawẽk'ãra Jesucristode ĩjãanamẽrá? Mãɨya ãchi ẽpẽra ɨbɨa p'anɨ jĩra p'anɨma. Tachi Ak'õrepa ãchi ichi juade ua baipɨ. Mãɨya piarã jarasima, chi ichi k'ɨ̃ria berã́.

⁶ Maamina mãrapa chi mãɨ nenea k'ɨrɨt'a pia ak'ɨdak'ama. Mɨa idiruma: ¿K'aipa mãrá ne oopadade apatama? Chi mãɨya oopataɨrã ¿chi ɨbɨarãwẽk'ãra? ¿Chi mãɨrãpa mãra jitapidak'ari, chi nepɨra ak'ɨpataɨrãmá ateewãnaiwẽk'ãra?

⁷ Mãra Jesucristoderãpɨ. Maamina ¿ãchia ichi t'ɨ̃ pia bɨ k'orea k'achia pedeadaiwẽk'ãra?

⁸ Mãrapa Moisepa bɨdadepema chi atepe bɨ piarã oo p'anɨpɨra, pia oo p'anɨma. Tachi Ak'õre pedeade mãɨ Moisepa bɨdade nãɨya jara bɨma: «Abaɨ k'ɨ̃riase ara pɨchi k'ɨ̃ria bɨ jĩra».

⁹ Maamina mãrapa abaɨ waapẽarã k'aepẽra atepe k'ɨ̃ria p'anɨpɨra, nemietá oo p'anɨma. Moisepa bɨdade jara bɨma mãra mãɨ k'orea nepɨra pará p'ananayane a bɨma.

¹⁰ Abaɨpa Moisepa bɨda jĩra ãarea ooipɨra, maamina mãɨnepema aba oowẽpɨra, mãɨ jõma oowẽa bɨ k'orea nepɨra pará beeipɨ.

¹¹ Nãɨ jĩra bɨma. Tachi Ak'õrepa jarasima «k'ima awaraɨ ome k'ãirãse» mãɨnepa «mĩa pearãse». K'ima awaraɨ ome k'ãiwẽmina mĩa peaipɨra, Moisepa bɨda jĩra oowẽa bɨma.

¹² Jĩrak'aua pedeat'ɨ mãɨnepa jĩp'a oot'ɨ, Tachi Ak'õrepa tachi nepɨra ak'ɨi pẽra, Moisepa bɨdadepa. Mãɨpa tachi jɨ̃ uru p'anana jĩra bɨdepema k'ẽet'aapiparima.

¹³ Chi waapẽarã k'ĩra chupuriak'aɨ Tachi Ak'õrepa nepɨra ak'ɨrude k'ĩra chupuriaiwẽma. Mãɨne chi waapẽarã k'ĩra chupuriapataɨ pia p'ananaipɨ.

Cristode piarã ĩjãa bɨpa pia ooparima

¹⁴ Ũpẽarã, abaɨpa Jesucristode piarã ĩjãa bɨade aipɨra, maamina pia oowẽa bɨpɨra, ¿mãɨ pia bɨk'ãra? ¿Tachi Ak'õrepa mãɨ k'aripaik'ãra?

¹⁵ Nãɨ jĩra bɨma. Ũpẽapa wa ũpẽawẽrapa neet'á jɨ̃i k'orea mãɨnepa nek'oi k'orea nea bɨpɨra,

¹⁶ mãɨne aba mãranepemapa ichiá jaraipɨra, «Mɨa k'ɨ̃ria bɨma pɨ pia bait'a, k'ak'uade jɨ̃i k'orea uru bait'a, mãɨnepa jãwaa k'o bait'a», maamina mi ãpia pida teawẽpɨra, ¿mãɨ jaradapa k'aripaik'ãra? K'aripaiwẽma.

¹⁷ Ara mãɨ jĩra chi Jesucristode ĩjãa bɨade a bɨpa pia oowẽpɨra, piarã ĩjãawẽa bɨma. Ichia ĩjãa bɨade a bɨt'a, ẽpẽra piuda jĩra bɨma.

¹⁸ Abaɨpa nãɨya jarai bɨejã: «Pɨa Jesucristode ĩjãa bɨade aparima, mãɨnepa mɨa nepia ooparima». Mɨa nãɨ jaraima: nepia oowẽa, ak'ɨpise pɨa Jesucristode piarã ĩjãa bɨt'a. Mãɨne mɨa pia oo bɨdepa ak'ɨpiipɨ Jesucristode piarã ĩjãa bɨt'a.

¹⁹ Pɨa ĩjãa bɨma Tachi Ak'õre abapuru bɨt'a. ¡Minachia pia bɨma! Jaore mietaarã pida mãɨya ĩjãa p'anɨma, maamina Tachi Ak'õre wap'eapa k'ak'ua orepatama.

²⁰ ¡Pɨ k'ɨ̃risia nea bɨma! Chi Jesucristode ĩjãa bɨade a bɨpa nepia oowẽpɨra piarã ĩjãawẽa bɨma ¿Mɨa mãɨ pɨá k'awapii bɨk'ãra?

²¹ ¿Tachi judiorã ak'õre Abrahanpa ooda k'orea Tachi Ak'õrepa ichi jĩp'a unusiwẽk'ãra? Tachi Ak'õrepa Abrahaná ichi warra Isá paateapade aside chi ãnimara paapataɨ ɨ̃rɨ, Abrahanpa mãɨya oode wãsima. ¿Tachi Ak'õrepa ichi mãɨ k'orea jĩp'a bɨ unusiwẽk'ãra?

²² Pɨa k'awa bɨma Abrahanpa mãɨya oosit'a piarã Tachi Ak'õrene ĩjãana pẽra. Mãɨnepa mãɨya ooda pẽra unupisima Tachi Ak'õrene piarã ĩjãa bɨt'a.

²³ Abrahanpa oodapa k'awapi bɨma Tachi Ak'õre pedeade bɨ bɨt'a piarãpɨ. Nãɨya bɨ bɨma: «Abrahanpa Tachi Ak'õrene ĩjãasima. Mãɨ k'orea Tachi Ak'õrepa ichi jĩp'a unusima». Mãɨnepa Abrahán Tachi Ak'õre ome k'õp'ãeroane apachidama.

²⁴ Mãɨnepa mãrapa k'awa p'anɨma Tachi Ak'õrepa tachi jĩp'a unuwẽa bɨ abapuru ichide ĩjãa p'anɨane a p'anɨ pẽra, mãɨpari jĩp'a unu bɨma ichide ĩjãanak'ari pia oo p'anɨ pẽra.

²⁵ Ara mãɨ jĩra wẽra k'achia bada Rahapa ooda k'orea Tachi Ak'õrepa ichi jĩp'a unusima. Josuepa peedarã ichi tede pia uru badook'ari, maapae o awaraɨdea jĩitea peesima.

²⁶ Ẽpẽra piuda jaore nea beeparima. Ara mãɨ jĩra Tachi Ak'õrene ĩjãa bɨade a bɨpa pia oowẽpɨra, piarã ĩjãawẽa bɨma. Ichia ĩjãa bɨade a bɨ ẽpẽra piuda jĩra bɨma.