Hecho 1 - Tachi Ak'õre Pedea

Jesupa Tachi Ak'õre Jaore teai jarada

¹ Teóp'ilo, chi k'art'a naena bɨdade mɨa bɨ basima Jesupa ne ãarea ooda mãɨnepa jarateada,

² Tachi Ak'õrepa mãɨ pajãnea ateewãrunea. Pajãnea wãi naena ichia peedaɨrã́ Tachi Ak'õre Jaoredepa jarateasima k'ãre oodai p'anɨt'a. Mãɨrã ichia jɨrɨ atada pasima.

³ Jesú piuk'ari ara ichi ãchiá bari k'ak'o minachia unupipachima k'awadamẽrá ichi piarã chok'ae p'irabarisit'a. Mãɨne ãchiá jarateapachima ichidepa Tachi Ak'õrepa ichidirã ichi juade ua bɨ k'orea. Ewari k'ak'o cuarenta mãɨya oosima.

⁴ Ewariaba Jesú ãchi ome baside nãɨya jarasima: —Jerusalén p'uurudepema ãyá wãrãt'ɨ. Nãma nɨ p'aneet'ɨ aba Tachi Ak'õrepa ichi Jaore teai jarada mãɨ tearudea. Mãɨnepema mɨa mãrá naena jarasima.

⁵ Piarã Juanpa ẽpẽerã paniapa porochoasima, maamina tãaraawẽa bɨde Tachi Ak'õrepa ichi Jaoredepa mãra porochoaipɨ.

⁶ Maapae chi Jesú ome ará p'anɨrãpa ichiá idisidama: —Tai Chipari, ¿naapaepuru pɨa tachi Israel p'uuru chĩara juade bada k'ẽet'aapik'ari, tai mãɨ mãicha pia beepiima?

⁷ Jesupa p'anoosima: —Mãɨ ewari mãrapa k'awadaiwẽa p'anɨma. Aba mɨ Ak'õrepuru mãɨ k'awa bɨma, mãɨ ewari bɨda pẽra.

⁸ Maamina Tachi Ak'õre Jaore mãra ome beede cherude, mãrapa ichi jua chaarea jitadaipɨ. Mãɨpa mãrapa Jerusalene, ãarea Judea mãɨnepa Samaria tuade mãɨnepa tua t'ɨmɨa bede mɨ k'orea pedeadaipɨ.

⁹ Jesupa mãɨya jarak'ari ãareaɨrãpa ak'ɨ p'anɨne ɨt'aa ateewãsima. Mãɨne jɨ̃arapa ichi ɨ̃rɨ ãarea p'ãriona pẽra waa ununaé pasima.

¹⁰ Mãɨ Jesú ɨt'aa wãpodomisa, pia ak'ɨ p'anasima. Mãɨya bɨde ãchi k'ait'a ẽpẽra ume neet'á t'ot'oa jɨ̃ p'anɨt'a orrobarisidama.

¹¹ Mãɨ ẽpẽerãpa nãɨya jarasidama: —Galileadepemarã, ¿k'ãre k'orea pajãnea ak'ɨ p'anɨma? Ara mãɨ Jesú pajãnea wãna mãicha cheipɨ ara machia pajãnea wãru ununana jĩra.

Matía jɨrɨ atadada

¹² Maapae Olivo eyadepa Jerusalenea jĩitea wãsidama. Mãɨ eya Jerusalén p'uurudepa kilómetro aba bɨma.

¹³ Jerusalene padak'ari chi te ɨt'ɨ pará bɨmá ãchi mãma k'ãipataɨmá wãsidama. Ãchi nãɨrã pasima: Pedro, Juan, Santiago, André, P'elipe, Tomá, Bartolomé, Mateo, Alp'eo warra Santiago, Simón chi Celote mãɨnepa Santiago warra Juda.

¹⁴ Ãchi ãarea, Jesú ũpẽarã ome, ichi nae María ome mãɨnepa waapẽarã wẽrarã ome pida abarik'a k'ɨ̃risia p'anɨnepa ará p'anasidama, Tachi Ak'õrea ɨt'aa chiididai k'orea.

¹⁵ Mãɨya p'anɨne ewariaba Pedro chi ũpẽarã esa bai nɨbeesima chi ẽpẽerã́ pedeai k'orea. Ãchi 120 p'anasidama. Mãɨne jarasima:

¹⁶ «Ũpẽarã, naena Tachi Ak'õre Jaorepa Judapa ooi bɨ k'orea Davia bɨpisima. Tachi Ak'õre pedeade bɨ bɨ jĩra piarã mãɨyai bada pẽra Judapa ẽpẽerã ateewãsima Jesú jitadamẽrá.

¹⁷ Juda tachi jĩra Jesupa peeda pasima mãɨnepa chi tachia oopataɨ ichia pida oo bapachima».

¹⁸ (Judapa Jesú jitapida k'orea, chi mãɨ erreara ichia jitadapa ĩjũa atasima. Mãma poroari baek'ari chi bi t'erawãk'ari, maapae chi jɨ̃si ãarea awara wãsima.

¹⁹ Ãarea Jerusalenepemarãpa mãɨ k'awasidaɨde chi ĩjũa t'ɨ̃ bɨsidama Acéldama. Mãɨ t'ɨ̃ ãchi pedeade jara k'ɨ̃ria bɨma «Oa Ĩjũa»).

²⁰ Mãɨne Pedropa jarasima: «Juda mãɨyasima Salmo k'art'ade bɨ bɨ jĩra: “Ichi te nenea beeipɨ. Mãɨ aba pida mãma baiwẽma”. Ichiaba jara bɨma: “Ichia oo badat'a awaraɨpa oo beeipɨ”.

²¹ »Mãɨpuru ichi k'ak'ua pae mãranepema aba tai ome beei bɨma ẽpẽerã́ jarai k'orea Tachi Chipari Jesú piarã chok'ae p'irabarisit'a.

²² Mãɨ tai ome ará bai basima, Juanpa porochoa bapachiedapema aba Tachi Ak'õrepa Jesú pajãnea ateewãsidea».

²³ Mãɨya ẽpẽra ume bɨsidama, ãchidepema aba jɨrɨ atadai k'orea. Aba José pasima. Ichiaba Barsabá wa Justo apatama. Chi abaɨ Matía pasima.

²⁴ Maapae ãareaɨrãpa Tachi Ak'õrea nãɨya ɨt'aa chiidisidama: —Tai Chipari, ãareaɨrãpa sõne k'ɨ̃risia p'anɨt'a pɨa mãɨ k'awa bɨma. Taiyá unupise nãɨ ẽpẽra umepemarã chi sãɨ pɨa jɨrɨ atait'a,

²⁵ chi pɨa peedapa ooparit'a oomẽrá. Judapa mãɨ ooi badat'a itu bɨsima, chi ichi wãi bɨmá wãi k'orea.

²⁶ Maapae ne jemena ajorosidama k'ai beei k'awadai k'orea. Mãɨne Matiat'a beesima. Ara mãɨne ichi chi Jesupa peedaɨrã once p'anɨ ome ará beesima.