Apocalipsi 18 - Tachi Ak'õre Pedea

Babilonia p'uuru baeda

¹ Mãɨya nak'ari mɨa Tachi Ak'õrepa ɨt'aripa peeda unusima pajãnepa edá cherut'a. Mãɨ chi minachia k'awa bɨ pasima. Ichi achiterreapa nãɨ ĩjũa ãarea jẽrat'ĩusima.

² Ichia nãɨya jĩk'ua jarasima: «¡Babilonia p'uuru minachia bɨ baesima! ¡Piarã ãarea baesima! Ẽpẽerã newẽma, maawẽapuru jaore mietaarã mãma p'anapatama. Jõma jaore mietá be mãma p'anapatama. Jõma ĩpana Tachi Ak'õre k'ĩrari mietá be mãma p'anapatama.

³ Mãɨ p'uurudepemarãpa chi minachia k'ĩra p'era oo p'anɨt'a tuachadepemarã́ ara mãɨya nemietá oopisidama uvaba topiuta jĩra. Tuachadepema poro jũra jɨ̃parí jɨ̃ p'anɨrãpa ara mãɨya oopachidama wẽra k'achia bɨ ome k'ãiuta jĩra. Chi nãɨ ĩjũanepema neet'á atapataɨrã ɨbɨa pasidama mãɨ p'uurudepemarãpa neet'á minachia ata k'ɨ̃ria p'anana pẽra».

⁴ Maapae mɨa ũrisima abaɨpa pajãnepa nãɨya jararut'a: «Mɨ ẽpẽerã, Babilonianepema ãyá wãt'ɨ jãɨ p'uurudepemarãpa nemietá oo p'anɨ jĩra oopidaemaapa. Mãɨyara Tachi Ak'õrepa jãɨ p'uuru ɨtɨarude mãra ɨtɨaiwẽma.

⁵ Jãɨ p'uurudepemarãpa minachia nemietá oo p'anɨma. Mawara abaɨ ɨ̃rɨ p'ã nɨbɨ jĩra ãchi nemietá waa pajãne barisima. Jõma ãchia nemietá oodada Tachi Ak'õrepa k'ɨ̃risia atuawẽa bɨma.

⁶ Jãɨ p'uuru piawẽa oot'ɨ waapẽarã piawẽa oodada jĩra. Waapẽarã piawẽa oodada jĩra ara mãɨya bari k'ak'o ume piawẽa oot'ɨ. Jãɨ p'uurudepemarãpa waapẽarã piawẽa oodada pẽra, bari k'ak'o ume ɨtɨat'ɨ, uvaba asia topiru jĩra. Mãɨpuru ichi bari k'ak'o ume piawẽa oot'ɨ uvaba asia bari k'ak'o ume tearu jĩra.

⁷ Jãɨ p'uuru minachia mĩapit'ɨ mãɨnepa minachia sõk'achia beepit'ɨ, ãchi p'uuru chi minachia bɨade a p'anɨ pẽra mãɨnepa nepia uru p'anɨane a p'anɨ pẽra. Jãɨ p'uurupa nãɨya k'ɨ̃risia bɨma: “Mɨ chi atepe minachia k'awa bɨ wẽra, chi suak'a beeparí auk'ará bide suak'abari bɨ jĩra bɨma. Mɨ p'ẽtã́ jĩra bɨwẽma. Mɨ sõk'achia baiwẽma”.

⁸ Mãɨya k'ɨ̃risia bɨ pẽra ewari aba bɨde jãɨ p'uurudepemarã sõk'achiapa jẽanaipɨ, jarrapa piawẽa tuananaipɨ mãɨnepa ãarea piudaipɨ. Tachi Ak'õre Chipari jõma p'ue bɨpa ak'ɨrude jãɨ p'uuru paaipɨ».

⁹ Jãɨ p'uuru ome chi tuachadepema poro jũra jɨ̃parí jɨ̃ p'anɨrãpa nemietá oopachidama awaraɨrã ome k'ĩranejasia oouta jĩra. Mãɨnepa jãɨ p'uurudepemarãpa nepia minachia uru bɨdepema atadada pẽra ɨbɨa p'aneesidama. Mãɨ k'orea jãɨ p'uuru paa nɨbɨ nãri unuutade jẽanaipɨ.

¹⁰ Wap'ea p'ananaipɨ Tachi Ak'õrepa Babilonia p'uuru ɨtɨada jĩra ãchi sida ɨtɨaipɨ. Mãɨ k'orea t'ɨmɨɨpa ak'ɨ p'anɨne nãɨya jaradaipɨ: «¡Miachupuri, miachupuri Babilonia p'uuru minachia bɨ ne wawaria oo bada pẽra! Tachi Ak'õrepa jãɨ p'uuru isapea ɨtɨasima».

¹¹ Nãɨ ĩjũanepema ne netopataɨrã mãɨ p'uuru k'orea jẽanaipɨ ãchi neet'á ne netopataɨ pada waa chi mãɨa netodai newẽ pẽra.

¹² Mãɨ p'uurude ne ãarea netopachidama: nee, nee jĩra be, mawara neepɨa be, neet'á neepɨa be, lino p'aru, seda p'aru, p'aru chi molau be, p'aru p'urea be, pak'uru p'iumá be, elep'ante k'ida ne ooda, pak'uru neepɨa be ooda, bronce ooda, jiorro ooda, mãɨnepa marmol mawara ooda mãɨ netopachidama.

¹³ Mãɨnepa pak'uru e p'iumá be, nejõma p'iumá be, ãp'o k'era, mirra k'era, ne k'era, uvaba, olivo taa, harina chi piipará be, trigo, p'ak'a, oveja, mũra mãɨnepa carreta netopachidama. Ẽpẽerã sida netopachidama, ãchi chipari pae pari mimiapataɨrã padamẽrá.

¹⁴ Jõma mãɨ netopataɨrãpa nãɨya jaradaipɨ: «Nejõma jãɨ p'uurupa k'ɨ̃ria bada waa nea beesima. Chi erreara minachia uru bada mãɨnepa nepia k'ede minachia uru bada sida ãarea jõsima. Waa mãɨya atadaiwẽma».

¹⁵ Piarã mãmá nejõma netode wã p'anana minachia ɨbɨa pasidama. Ãchia wap'ea p'ananaipɨ Tachi Ak'õrepa mãɨ p'uuru ɨtɨada jĩra ãchi sida ɨtɨait'a. Mãɨ k'orea t'ɨmɨɨpa ak'ɨ p'anɨne nãɨya jẽanaipɨ:

¹⁶ «¡Miachupuri, miachupuri jãɨ p'uuru minachia bɨ pẽra! Jãɨ p'uuru wẽra lino p'aru chi piipará bɨt'a k'ak'apia bɨ jĩra jɨ̃ basima. P'aru chi molau bɨt'a mãɨnepa p'urea bɨt'a k'ak'apia bɨ jĩra jɨ̃ basima. Nee oodat'a, neet'á neepɨa bɨt'a mãɨnepa mawara neepɨa k'edet'a k'ak'apia bɨ jĩra jɨ̃ basima.

¹⁷ Maamina jãɨ p'uurudepemarãpa nepia uru p'anana isapea jõsima». Jõma p'ãp'orro chiparirãpa, p'ãp'orrode wãpataɨrãpa, p'ãp'orrode mimiapataɨrãpa mãɨnepa p'usade mimiapataɨrã pida t'ɨmɨɨpa ak'ɨ tuananaipɨ.

¹⁸ Mãɨ p'uuru paa nɨbɨ nãri unuutade nãɨya jĩk'ua jaradaipɨ: «¿Sãɨ p'uuru jãɨ p'uuru bada jĩra bɨma?»

¹⁹ Sõp'uapa nãɨya jĩk'ua jẽanaipɨ: «¡Miachupuri, miachupuri jãɨ p'uuru minachia bada! Jãɨ p'uuru ne minachia uru bada pẽra, chi p'ãp'orro uru be jãma ɨbɨa p'aneesidama. Maamina jãɨ p'uuru isapea ãarea jõsima.

²⁰ ¡Jõma pajãne be arapaat'ɨ jãɨ p'uuru jõna pẽra! Ẽpẽerã Tachi Ak'õreneerã, Jesupa peedaɨrã mãɨnepa Tachi Ak'õre pari pedeapataɨrã arapaat'ɨ. Tachi Ak'õrepa jãɨ p'uuru ɨtɨasima, mãra piawẽa ooda pẽra».

²¹ Maapae Tachi Ak'õrepa ɨt'aripa peeda chi atepe bɨpa mawara waibɨa k'ũruma minachia bɨt'a atak'ari p'usadea jirat'aasima. Mãɨya oorude nãɨya jarasima: «Mãɨ mawara p'usadea jirat'aada jĩra Babilonia p'uuru minachia bɨ isapea ãarea jõipɨ. Mãɨ p'uuru waa ununaiwẽma.

²² Mãma arpa, siru mãɨnepa ãnimara k'achu chaa p'anana sida waa ũrinaiwẽma. Ẽpẽerã k'ari p'anana sida waa ũrinaiwẽma. Mãma ne oopataɨrã waa ununaiwẽma. K'ũruma pedea waa ũrinaiwẽma.

²³ Mãma ĩpira urua waa ununaiwẽma. K'ima atautade arapaapataɨ tede waa ne oo p'anɨt'a waa ũrinaiwẽma. Chi mãmapema ne netopataɨrã nãɨ ĩjũane minachia ɨbɨarã pasidama. Chi mãmapema jaipanarãpa tuachapemarã ãarea seapachidama.

²⁴ Tachi Ak'õre pari pedeapataɨrã peadada k'orea, ẽpẽerã Tachi Ak'õreneerã peadada k'orea mãɨnepa ãarea nãɨ ĩjũane peadada k'orea mãɨ p'uuru nepɨra pará beesima».