Apocalipsi 11 - Tachi Ak'õre Pedea

Chi ẽpẽra ume p'anɨpa Cristo k'orea pedeadada

¹ Mãɨya nak'ari abaɨpa pak'uru ne chaapataɨt'a mɨá teak'ari nãɨya jarasima: «Tachi Ak'õre te minachia bɨt'a mãɨnepa chi Tachi Ak'õre pae ne ãnimara paateapataɨ chaade wãse. Mãɨnepa chi mãma Tachi Ak'õre minachia k'ɨ̃ria p'anɨrã joisiase.

² Maamina chi Tachi Ak'õre te minachia bɨ ik'á tejã eda bɨt'a chaarãse, mãɨ mɨa chi mɨne ĩjãanak'apɨɨrã́ teada pẽra. Ãchia chi Tachi Ak'õre p'uuru Jerusalén p'uedaipɨ jedek'o k'ak'o 42 bɨpari.

³ Mãɨ ewaride mɨa ẽpẽra ume tea peeipɨ mãɨrãpa mɨ k'orea pia pedeadamẽrá. Ãchia neet'á sõp'ua p'anɨne jɨ̃pataɨ jɨ̃nak'ari maapae Tachi Ak'õre k'orea pedeadaipɨ 1.260 ewari bɨpari».

⁴ Chi nãɨ ĩjũanepema Chipari taade pak'uru olivo bɨɨrɨ ume p'anɨma mãɨnepa ĩpira ume p'anɨma. Mãɨ jara k'ɨ̃ria bɨma chi ume p'anɨpa mɨ k'orea pedea p'anɨt'a.

⁵ Chi abaɨpa ãchi nemietá oo k'ɨ̃ria bɨpɨra, ãchi it'aedepa t'ɨpɨ urua cheipɨ ya mãɨrã nek'ĩramá ãarea paa peedaipɨ. Mãɨya chi mãɨ nemietá oodayá p'anɨt'a ãarea peadaipɨ.

⁶ Mãɨ chi ẽpẽra ume p'anɨ Tachi Ak'õre pae pedeamaa p'anɨne chi pajã p'ue serradai p'anɨma, k'oe chepidaemaapa. Mãɨnepa pania oa p'ue papidai p'anɨma mãɨnepa ne minachia wawaria p'ue oodai p'anɨma nãɨ ĩjũa k'enanai k'orea ãchia k'ɨ̃ria p'anɨ jĩra.

⁷ Maamina Tachi Ak'õre k'orea jõma pedeadak'ari mãɨ ãnimara mietá chi uria minachia bɨdepa chedapa ãchi k'ĩruupik'oipɨ. Ãchi p'uek'ari k'enaipɨ.

⁸ Chi piudada chi Jerusalén p'uuru waibɨa bɨde bari beaipɨ. Mãɨ p'uuru «Sodomaane» wa «Egitoade» apatama, mãma ãchi Chipari Jesú k'urusude barijira bɨdada pẽra.

⁹ Ẽpẽerã p'uurucha, pedeacha, ẽpẽerã awaraɨcha mãɨnepa ĩjũacha mãɨrãnepemarãpa chi piudada ak'ɨdaipɨ ewari k'ak'o ũpeak'ari ya estarik'a. Chi piudada itu t'ɨbaripidaiwẽma.

¹⁰ Chi ẽpẽerã nãɨ ĩjũanepemarã chi piudada k'orea arapaapatama. Arapá p'anɨnepa ara ãchicha ne pari teadaipɨ Tachi Ak'õre pari pedeapataɨrãpa ãchiá minachia mĩapisida pẽra.

¹¹ Maamina ewari k'ak'o ũpea ya estarik'a pak'ari Tachi Ak'õrepa ãchi k'ĩrapapisima. Chi k'ĩrapamaa p'anɨ ununaanapa minachia p'erasidama.

¹² Maapae chi Tachi Ak'õre pae pedeapataɨrãpa pajãne pedea ɨbɨa ũrisidama. Nãɨya jarasima: «Nãma ɨt'aa chet'ɨ». Ara mãɨne chi nek'ĩramaapa ak'ɨ p'anɨne ãchi ɨt'aa pajãnea jɨ̃arane wãsidama.

¹³ Ara mãɨne iurumia ɨbɨa chesima. Mãɨpa Jerusalén p'uurude te minachia k'orap'et'ak'oasima. Ẽpẽerã siete mil piusidama. Ara mãɨne chi chok'ae beadapa chi pajãnepema Tachi Ak'õrea chi wap'eapa ichi pia bɨade a jarasidama.

¹⁴ Chi k'aadeapema minachia mĩanai jarada jõsima, maamina chi k'aadeapema minachia mĩanai jarada tãaraawẽa bɨde cheipɨ.

K'aadea ãnimara k'achu chaada

¹⁵ Tachi Ak'õrepa ɨt'aripa peeda sietedepema chi k'aadea bɨpa ichi ãnimara k'achu chaasima. Mãɨne pajãne chok'ará nãɨya jĩk'ua pedeasidama: «Chi nãɨ ĩjũanepema poro jũra jɨ̃parí jɨ̃ p'anɨrãpa ãchi jua ek'ari naena uru p'anana, Tachi Chipari mãɨnepa ichi Cristopa mãɨ ãarea ãchi juade uru p'aneesidama». Idiipa naa Tachi Ak'õre ewaricha ãareaɨrã Chipari baipɨ.

¹⁶ Maapae chi chõarã veinticuatro p'anɨ ãchi suak'a beeparí auk'ará bɨde Tachi Ak'õre k'ĩrari sĩraporode bedabari k'op'aneenak'ari Tachi Ak'õrea pia pedeasidama.

¹⁷ Nãɨya jarasidama: «Tai Chipari, chi Ne Ãarea P'ue Bɨ Tachi Ak'õre, pɨ idi bɨma, mãɨnepa naena basima. Pɨ jua chaarea waibɨa bɨ unupi bɨ pẽra mãɨnepa jõmãɨrã Chipari beeda pẽra taipa pia bɨade a p'anɨma.

¹⁸ Tuachapemarã pɨ ome k'ĩruusidama. Maamina pɨa ɨtɨai ewari chesima. Naapae pɨa piudaadarã ɨtɨaipɨ. Mãɨne chi pɨ pae pari mimiapataɨrã, chi pɨ pari pedeapataɨrã́, pɨ ẽpẽerã́, pɨ wap'ea be chi atepe berã́ mãɨnepa k'aepea berã́ pida pɨa nepia teaipɨ ãchia oodada jĩra. Maamina chi nãɨ ĩjũane nemietá oodada pɨa k'enaipɨ».

¹⁹ Maapae Tachi Ak'õre te minachia bɨ pajãne bɨ ewasima. Mãma chi Tachi Ak'õrepa oopida baulte mɨa unusima. Mãɨne pa wiwirá nɨbeesima, pa bae nɨbeesima, mãɨnepa minachia jĩk'ua bae nɨbeesima. Nãɨ ĩjũa ore nɨbeesima mãɨnepa hielo k'oe jĩra bae nɨbeesima.