Yohanɛsɛ 9 - ONUGBÙ NYƐNYÃ VUVƆ

Yesu Adanɛ Awɔ̃hu Kɔ Anɔ Gɛ Ba mɔ Nɛ Awɔ̃hupupu

¹ Gɛ Yesu àga afla, amɔ anyɛ teli gɛ ba mɔ nɛ awɔ̃hũpupu.

² Yɛ badɔkpasɛ nɛ bisi yɛ asɛ, “Adɔkasɛ, ane yɛ bhɛbhɛtɛ kizizi, anyɛa pɛnɔ yɛ ni nɛ yɛ aka?”

³ Yesu aɖɔ sɛ, “Ganɛ sɛ anyɛ nɛ ɔdɔgɔsɛ yɛeni anɛ yɛaka ba bhɛtɛ buzizi, pɔ kɛ bɛɛlɛ mɛ sɛ tɛ ba yɛkɔ ebu Kpaya kɛxwɛwɛwa akasɛ nɛ yɛ ɛkpã mɛ.

⁴ Anasɛ gɛ kinu kelizɛza, alasɛ tɛ buwa agɛ akpɛ mɛ nɛ xwɛ. Elishi aba, gɛ anɔnyanɔ atɛa waɛxwɛ.

⁵ Gɛ ɛlɛ kanɔ nɛ mɛ, inu kanɔ nɛ kifu.”

⁶ Kibui ɖɛɖɔ nɛede, ebu tutu elu kesukpa, ayɛkɔ bututu nɛ avɔ aputɔ klɛ ayɛkɔ trɔ anyɛ nɛ awɔ̃hu nɛabha.

⁷ Yesu etsre anyɛ nɛ asɛ, “Vɛ, dɔ plu awɔ̃hu nɛabha nɛ Siloam Kɛvɔ” (kibui nɛesi kɛlɛ nu sɛ Kpɛ). So anyɛ nɛ avɛ klɛ ede plu alɛ, klɛ aba bupa mɛ amɔ.

⁸ Ye shopoalɛ nɛ ba gɛ ba tɛ mɔɛ yɛ di ebisidɔ be bisi asɛ, “Anɛ anyɛ anɛ yɛ aza klɛ aganɛ dɔ ebisi?”

⁹ Banɔ teli ba ɖɔ sɛ yɛ. Be teli baɖɔ sɛ, “Ao, anɔ yɛ yi yɛ.” Pɔ yɛ nahwɛ aɖɔ sɛ “Mɛ nu anyɛ.”

¹⁰ Bɛ bisi yɛ asɛ, “Kɛlɛlɛ za gɛ wɔ awɔ̃hu nɛ adanɛ?”

¹¹ Ebu shunu asɛ, “Anɔ gɛ be klu asɛ Yesu ya vɔ aputɔ klɛ ayɛ kɔ atrɔ mɛ awɔ̃hu nɛabha. Etsre mɛ asɛ ɛvɛ Siloamɛ tɛ ɛda plu alɛ. So ɛvɛ klɛ ɛda plu alɛ klɛ ɛmɔ.”

¹² Be bisi yɛ asɛ “Fakɔ anyɛ na lɛ?” Aɖɔ sɛ “Iti nyi.”

Farisianɛ Bɛtsu Awɔ̃hu Dɛdanɛ Bui Nɛ Mɛ

¹³ Ba gbanɛ anɔ nɛ gɛ yɛ awɔ̃hu nɛ ni avɛnɔ Farisianɛ nɔ kɔ.

¹⁴ kiwui nɛabha gɛ Yesu adanɛ anyɛ nɛ awɔ̃hu, klɛ dzi Tɛmumonɛ wui.

¹⁵ Kɛlɛso Farisianɛ tsyɛ bisi yɛ kana gɛ kɛ ba flogo gɛ yɛ awɔ̃hu nɛ la danɛ. Anyɛ aɖɔ sɛ, “ayɛkɔ aputɔ atrɔ mɛ awɔ̃hu nɛabha, klɛ ɛda plu alɛ klɛ ɔtsɔnɛ ɛmɔ.”

¹⁶ Farisianɛ be teli aɖɔ sɛ, “Anyɛanɛ edi de Kpaya kɔ, alasɛ ata bhɛtɛ trɔ Tɛmumonɛ wui Ɔshã nɛabha.”

¹⁷ Gugɔɛ betsyina tɔ awɔ̃hu pupu elete, “Kide wɔ bɔ ɖɔ denɔ anyɛ nɛ shu? Wɔ awɔ̃hu alɛ yɛ adanɛ.”

¹⁸ Yuɖanɛ ɔtsɔ̃ nɛ tsyɛ ba dɛ yɛkɛŋa sɛ anyɛ nɛ yɛ awɔ̃hu eni klɛ ba danɛ alɛ akɔ yɛ, ɔdɔtɔnɔ kibe lɛlɛ gɛ ba kpɛ anɔ nɛ yɛeni nɛ yɛaka nɔ kɔ.

¹⁹ Be bisi asɛ, “Wunɔ yi na nɛ?” “Yɛ nɔ ɖɔ sɛ, ba mɔɛ nɛ awɔ̃hupupu? Kɛlɛlɛ ba gɛ amɔ ɔtsɔ lɛ?”

²⁰ Be bushunu asɛ, “Bu nyi sɛ blɔe yi, klɛ bu nyi sɛ ba mɔ yɛ nɛ awɔ̃hupupu.

²¹ Pɔ kana gɛ amɔ ɔtsɔ̃ nɛ, pɛ ane yɛ adanɛ yɛ awɔ̃hu, bu ti nyi. No bisi yɛ. Enu anɔ shishe, aba na kaɖɔ yɛnahwɛ.”

²² Yɛ ni nɛ ye aka ba ɖɔana alasɛ be sifu nɛ Yuɖanɛ, alasɛ Yuɖanɛ ba tɛ nya lu asɛ anɔnyanɔ gɛ aba dɛmɛ atrɔ sɛ Yesu enu Kristo ba be bui yɛ nɛ oxogokɔvu nɛ mɛ.

²³ Kibui lɛlɛ nɛ so gɛ eni anɛ aka baɖɔ sɛ, “Enu anɔ shishe; nɔ bisi yɛ.”

²⁴ Bubhla nyɔ na nɛ gɛ be tsodzi eklu anyɛ gɛ yɛ awɔ̃hu nɛ pu, klɛ be tsre yɛ asɛ, “Dɛmɛ trɔ nɛ Kpaya amɛ sɛ ɔbɔɖɔ kibui gbɛagba.” ba ɖɔ sɛ “Bu nyi sɛ anyɛanɛ enu ebuizizi bhɛbhɛtɛ elete.”

²⁵ Etsre alɛ sɛ, “Iti nyi tɛ abhɛtɛ ebuizizi pɛnɔɔ ata bhɛtɛ. Kibui tirikpo mɛ nyi. Mɛ awɔ̃hu pu pɔ ɔtsɔnɛ ɛmɔ!”

²⁶ Kɛlɛ be bisi yɛ asɛ, “Kide abhɛ tɛ kɔ wɔ? Kɛlɛ ayɛkɔ adanɛ wɔ awɔ̃hu?”

²⁷ Ebu shu nu sɛ, “Ɛtɛ tsre nɔ bafla klɛ nɔ dɛ ta tɔ nu. Kɛdeso gɛ nɔ pɛɛ sɛ tɛ no flo nu? Nɔ tsyɛ nɔ pɛɛ sɛ tɛ nɔ dzi yɛ badɔkpasɛ?”

²⁸ Ɔkɛlɛ ba kula yɛ klɛ be tsre yɛ asɛ, “Wɔ ko wɔ nu anyɛanɛ adɔkpasɛ! Bulɔ bunu Mose badɔkpasɛ!

²⁹ Bulɔ bu nyi sɛ Kpaya aɖɔaɖɔ kɔ Mose, pɔ anyɛanɛ, bu tɛ nyi ɔkɔnɔ kuratsyɛ gɛ ede.”

³⁰ Anyɛ nɛ bu shunu sɛ, “Ɔtsyɔnɛ kibui ɖueɖu kɛlɛ tsi mɛ onugbu ana! Nɔ tɛ nyi ɔkɔnɔ gɛ ede, pɔ adanɛ mɛ awɔ̃hu.

³¹ Bu nyi sɛ Kpaya ataa ta batɔ nɛ bagɛ ba bhɛtɛ buzizi. Ata batɔ nɛ kpayanɔ nɛ gɛ ba bhɛtɛ yɛ tɛpɛpɛɛ.

³² Anɔnyanɔ ekenu di sɛ ba danɛ awɔ̃hu kɔ anɔ gɛ yɛ awɔ̃hu pu.

³³ Onugɛ anyɛanɛ edide Kpaya kɔ, atɛ ba na kɛdɔnyɛdɔ bhɛtɛ.”

³⁴ Kɔ kɛnɛ be builɛnu asɛ, “Buzizi mɛ la mɔ wɔ nɔ, kidzo ɖuwɛɖu ɔmɔ sɛ ɔkasɛ lɔɛ dɔ!” Klɛ be bu yɛ atɛ̃.

Ɔfufɔɛmɛ Awɔ̃hupupu

³⁵ Yesu enu asɛ be bu awɔ̃hupupu elete nɛ atɛ̃ klɛ kibelɛlɛ gɛ amɔ yɛ, ebesi yɛ asɛ, “Ɔyɛkɛ Anɔdzyrame Yi nɛ abhaŋa?”

³⁶ Anyɛ ebisi Yesu asɛ, “Ane na lɛ, apalete?” “Tsre mɛ sɛ tɛ ɛyɛkɛ yɛ abhaŋa.”

³⁷ Yesu etsre yɛ asɛ, “Wɔ ɔtsɔ̃ nɛ ɔmɔ yɛ, kɛgbɛagba, yɛ nu agɛ wunɔ nɛ yɛ nɔ aɖɔaɖɔ.”

³⁸ Kɛlɛ anyɛ aɖɔ sɛ, “Apalete, ɛyɛkɛŋa,” klɛ akpɛ tɔkpuesi kɔ yɛ.

³⁹ Yesu aɖɔ sɛ, “Alasɛ kebhui kuklu so gɛ ɛba kanɔa nɛ mɛ, sɛ tɛ awɔ̃hupupu elete ba mɔɛ dɔ klɛ bagɛ baa mɔ be be dzi awɔ̃hupupu elete.”

⁴⁰ Farisianɛ be teli gɛ ba lɛ yɛ ɔbha gɛ be nu sɛ aɖɔ kibui nɛ, klɛ be bisi, “Kide? Bulɔ tsyɛ bu pu awɔ̃hu?”

⁴¹ Yesu aɖɔ sɛ, “Onugɛ wunɔ awɔ̃hu epu, be ti be bu nɔɛ pɔ kɔ buzizi, pɔ ɔtsɔnɛ gɛ nɔ yɛ kɔɛ lɛ sɛ nɔ mɔ, wunɔɛ pɔ bubu lɛ kɛlɛ ɔzakɔ.