Yohanɛsɛ 5 - ONUGBÙ NYƐNYÃ VUVƆ

Banya Bibeke Nɛ Kɛvɔ Nɛ Tɔ

¹ Kibe tili bafla, Yesu ewu avɛ Yerusalɛm kɔ Yuɖanɛ kiwui ŋɛŋa tili.

² Nɛ Yerusalɛm kɛvɔ tili lɛ ɔkɛlɛ gɛ kɛtsobunɔ Obhoshi Kedunu, be klu nɛ Aramaik bunuhu nɛ mɛ sɛ Betasda, klɛ be dzu bugba wuwa tuti kana kɛvɔ.

³ Nɛ ɔkɛlɛ banyɛnya edidedi gelee ba da wũsɔ ɔkɛlɛ awɔ̃hũpuelete, ba gɛ ba ta na ga, nɛ ba gɛ bagba.

⁴ Denɔ kibe ɔvɛnɔ kibe Apalete axwɛdɛ aba be zhiku klɛ aba hwanɛ beni nɛ mɛ. Anɔ tɛtɔpu nɛ gɛ ebetsoku kɛvɔ nɛ mɛ gɛ ba hwanɛ lɛ aba lɔ nɛ bunyã nɛ mɛ.

⁵ Anɔ teli gɛ agba agɔ lɔfɔnɛ tasɔɛ aza ɔkɛlɛ.

⁶ Gɛ Yesu amɔ yɛ gɛ awũsɔ ɔkɛlɛ klɛ enu asɛ alɛ tɛzɛzɛlɛ mɛ kibe dzidze, ebisi ya sɛ, “Ɔpɛɛ sɛ tɛ ɔlɔ nɛ bunya nɛ mɛ?”

⁷ Anyɛnya ebushunu asɛ, “Apalete, anɔnyanɔ ama mahwɛ gɛ aba plɛnɔ kibenɔ nɛ gɛ buni nɛ hwa. Kibe lɛlɛ gɛ ɛwlãkɛ sɛ tɛ ɛtsoku buni nɛ mɛ, anɔ bhlatɔ aba ga ebhui mɛnu etsoku.”

⁸ Ɔkɛlɛ Yesu ɛtsre yɛ asɛ, “Lɔ kititi! Yɛkɔ wɔ oputso tɛ ɔga.”

⁹ Ɔkɛlɛ nɛ ko bunya nɛ koeyi nɛ yɛ mɛ, ayɛkɔ yɛ oputso klɛ aga. Kiwui nɛ gɛ kibui nɛ vɛabha klɛ dzi Kimuenewui,

¹⁰ klɛ so Yuɖanɛ ne tsre anyɛ gɛ alɔ nɛ bunya nɛ mɛ asɛ, “Ki nu Kimuenewi, ɔshã ɔdɛ kɔ wɔɛ dzo sɛ tɛ otuku wɔ oputso.”

¹¹ Pɔ ɛbushunu asɛ, “Anyɛ gɛ yakɔ mɛ lɔ ye tsre mɛ sɛ, ‘Yɛkɔ wɔ oputso tɛ ɔga.’ ”

¹² Kɛlɛ be bisi ye asɛ, “Ane yɛ nu anɔ alɛlɛ gɛ etsre wɔ sɛ ɔyɛkɔ wɔ oputso tɛ ɔga?”

¹³ Anyɛ gɛ be bu bunya nɛ yɛ mɛ editi anɔ nɛ gɛ Yesu enu, alasɛ anawɔ̃ etsoku banɔɛza nɛ gɛ baza ɔkɛlɛ nɛ shi.

¹⁴ Nɛ kɛlɛede Yesu amɔ yɛ nɛ busɔlɛvu nɛ mɛ, klɛ etsre yɛ asɛ, “Di, wɔ shui mɛ zɛ gɛganɛ. Yɛlɔ ebui zizi bhɛtɛ odinuana kizizidɛ ba ba wɔ abha.”

¹⁵ Anyɛ nɛ ashɛ̃ klɛ ede tsre Yuɖanɛ asɛ Yesu yɛ enu anɔ nɛ gɛ akɔ sɛ alɛ mɔmɔ.

Ekpã Ganɔ Eyianyɛ Nɛabha

¹⁶ Alasɛ gɛ Yesu abhɛtɛ ebuianɛ nɛ kimuenewui nɛabha so, ba kpatɔnɔ yɛ.

¹⁷ Yesu etsre alɛ asɛ, “Ma Aka awa yɛ xwɛ kibenyɛbe ɔdɔtɔnɔ oboe wui, klɛ mɛ, tsyɛ, ɛwa me yɛ.”

¹⁸ Kibui nɛ so gɛ Yuɖanɛ ba pɛɛ kidzo gɛganɛ dɛ sɛ tɛ be yi yɛ, anɛ gɛ ata Tɛmumoene ɔshã nɛesi so, pɔ tsyɛ eze ke klu Kpaya sɛ yɛ nahwɛ yɛ Aka, klɛ abhɛtɛ shu asɔnɔ Kpaya.

¹⁹ Yesu akɔ alɛ kesinunuɛ nɛ sɛ “Itsrenɔ kɛgbɛagba sɛ, Eyianyɛ atɛ babhɛtɛ kɛdɛnyɛdɔ nɛ yɛnahwɛshu ahwɛ, abana abhɛtɛ kɛ gɛ ko amɔ yɛ Aka abhɛtɛ, alasɛ kɛkanyaka gɛ Aka nɛ abhɛtɛ klɛ Eyianyɛ nɛ tsyɛ abhɛtɛ.

²⁰ Alasɛ Aka adɛmɛnɔ Eyianyɛ, klɛ akasɛ yɛ kɛ gɛ lɛ petee abhɛtɛ. Ee kɔ wunɔ same mumɔɛ mɛ aba kasɛ yɛ ebui gbɛgbla tsyɛ gɛ aba bhɛtɛ adɛ.

²¹ Kana gɛ Aka anyɛmɛ banɔ tsitsi klɛ àkɔ alɛ ɛkpã, kanake Eyianyɛ àkɔ ɛkpã bagɛ adɛmɛ sɛ tɛ akɔ.

²² Alɛmɛ, Aka nɛ ete kluebhui nɛ anɔ, pɔ ayɛkɔ kebhui kuklu akpɛ Eyi nɛ ahwɛ,

²³ sɛ tɛ balɛ petee bakpɛ Eyianyɛ nɛ tɔkpu nɛabha anasɛ gɛ ba kpɛ Aka nɛ tɔkpu nɛabha. Anɔ nɛ gɛ adɛ kpɛ Eyianyɛ nɛ tɔkpu nɛabha, adɛ kpɛ Aka nɛ gɛ akpɛ yɛ kɛtɔkpu nɛabha.

²⁴ “Itsre nɔ kɛgbɛagba, ànɔ nɛ gɛ enu mɛ ebui klɛ ayɛkɛ agɛ akpɛ mɛ nɛabha ŋa ɛkpã mabeke lɛ yɛ ahwɛ klɛ beti be bhui kɛpɔ akɔ yɛ, adɔfla butsi avɛ ɛkpãmɛ.

²⁵ Itsre nɔ kɛgbɛagba sɛ, kibe ba klɛ kɛtɛ ba kuratsyɛ gɛ be tsitsi ba be nu Kpaya Eyianyɛ nɛ olimɛ klɛ bagɛ be nu ba baza nɛ kpã.

²⁶ Alasɛ anasɛ gɛ ɛkpã lɛ Aka yɛnahwɛ mɛ, kanake akɔ Eyianyɛ ɛkpã sɛ lɛza yɛnahwɛ mɛ.

²⁷ Klɛ akɔ yɛ kabhaŋɛŋa tɛ eklu kebhui alasɛ yɛ nu Anɔdzyrame Eyianyɛ.

²⁸ Kɛbuinɛ kɛtɛ bhɛtɛ nɔɛbi, alasɛ kibe tili ba ba gɛ bagɛ balɛ petee alɛ balɛ idzre mɛ ba be nu yɛ olimɛ

²⁹ klɛ ba be koeyi— bagɛ babhɛtɛ kibui dzyɔgo ba ba lɔ aza nɛ kpã, klɛ bagɛ babhɛtɛ kibui zizi ba ba lɔ sɛ tɛ bebu balɛ pɔ.

³⁰ Mɛ nahwɛ ɛtɛ bana kɛdɔnyɛdɔ bhɛtɛ, iklu kebhui anasɛ kɛgɛ inu nɛ ko klɛ mɛ kɛbhuikuklu kenu kadzyɔgo, alasɛ ɛtɛ pɛɛ sɛ kɛ ku mɛnahwɛ awɔ̃ pɔ kɔ agɛ akpɛ mɛ.

Ebuimɔɖɔ Denɔ Yesu Shu

³¹ “Onugɛ ɛɖɔaɖɔ denɔ mɛnahwɛ shu, mɛ buimɔɖɔ katɛ ba ŋa.

³² Pɔ abhlatɔ alɛ gɛ aɖɔaɖɔ denɔ mɛ shu, klɛ inyi sɛ kaɖɔɖuɖɔ nɛ mɛ shu na ŋa.

³³ “Wunɔ kpɛ anɔ nɛ Yohanɛsɛ ɔkɔ klɛ aɖɔaɖɔ denɔ kɛgbɛagba shu.

³⁴ Anɛ sɛ ɛyɛkɛ Anɔdzyrame bui ɖɛɖɔ, pɔ ɛyɛkɛ lɛ kpɛ sɛ tɛ nɔ bɔ mɔ tɛbhubhuiyɛkɛ.

³⁵ Yohanɛsɛ edzi kanɛgbɛ gɛ atɛ̃fu klɛ kɛ kɔ bubhubhui, klɛ nɔ pɛɛ kibe sɛ tɛ nɔ mɔ same nɛ yɛ kifutɛtã.

³⁶ “Ɛyɛkɛ kibuiɖɛɖɔ gɛ kɛlupudɛ Yohanɛsɛ yɛ. Alasɛ kɛxwɛ nɛ tututu gɛ Aka nakɔ mɛ sɛ tɛ ɛwa beke, klɛ mɛ ɛwa, kɛkasɛ sɛ Aka nɛ yɛ akpɛ mɛ.

³⁷ Klɛ Aka nɛ gɛ ya kpɛ mɛ yɛ nahwɛ atɛ̀ ɖɔaɖɔ denɔ mɛ shu. No ko nu yɛ oli mɛ odi ɔdɔgɔsɛ nɔ tɛ mɔ yɛ tɛzɛza mɛ,

³⁸ ɔdɔgɔsɛ yɛ kibui nɛ lɛ wɔ mɛ, alasɛ nɔ dɛ yɛkɛ agɛ akpɛ nɛabhaŋa.

³⁹ Nɔ kpasɛ kpayaplukpa mɛ ebui mɔmɔ alasɛ nɔ yɛ kɔ sɛ ɛlɛmɛ nɔ bɔ ga gɛ nɔ bɔ mɔ ɛkpã mabekemabeke. Kpayaplukpa mɛ ebui alɛ aɖɔaɖɔ denɔ mɛ shu,

⁴⁰ tsyɛ nɔ dɛpɛɛ sɛ tɛ nɔ ba mɛ ɔkɔ tɛ nɔ mɔ kpã.

⁴¹ “Ɛtɛɛ yɛkɛ kabhakpɛkpɛ denɔ banɔ kɔ,

⁴² pɔ inyi nɔ. Inyi sɛ Kpaya tɛdɛdɛmɛnɔ ma wunɔ idzyi mɛ.

⁴³ Ɛba nɛ maka nɛ nyi mɛ, klɛ nɔ dɛ yɛkɛ mɛ, pɔ onugɛ anɔ tɛli aba nɛ yɛnahwɛ nyimɛ, nɔ bɔ yɛkɛ yɛ.

⁴⁴ Kɛlɛ nɔ bɔ yɛkɛŋa onugɛ nɔ yɛkɛ kabhakpɛkpɛ denɔ wɔnɔhaglɔ kɔ, pɔ nɔ dɛbhɛtɛ kɛdɔnyɛdɔ tɛ nɔ yɛkɛ kabhakpɛkpɛ denɔ anɔ nɛ gɛ ede Kpaya Terikpo nɔ kɔ?

⁴⁵ “Pɔ nɔ tɛ yɛkɔ kpɛ kɛtɔkpu mɛ sɛ ɛba bhui nɔ nu kɔ Aka. Wunɔ shu bhubhui anɔ yɛ nu Mose, yɛ abha nɔ yɛ kɔ ishu ɔtrɔ.

⁴⁶ Onugɛ nɔ yɛkɛ Mose abhaŋa, nɔ yɛkɛ mɛabhaŋa, alasɛ aŋlɔmɛ ebui denɔ mɛ shu.

⁴⁷ Pɔ denɔ kibe gɛ nɔ dɛ yɛkɛ kɛbui nɛ gɛ aŋlɔmɛ abhaŋa, kɛlɛ nɔ bɔyɛkɛ mɛ ebui nɛ gɛ ɛɖɔ nɛabhaŋa?”