Yohanɛsɛ 21 - ONUGBÙ NYƐNYÃ VUVƆ

Yesu Nɛ Ebuiyinɔanɔ Kenimɛdzya Bubu

¹ Kɛlɛede Yesu eze bu ishuakasɛ yɛ badɔkpasɛ, nɛ́ Tiberiasɛ aƒu nɛ shu. Kɛbɛlɛmɛ nɛ kidzoe nɛa bha:

² Simɔn Petro, Toma (be klu asɛ Didamusɛ), Natanɛlɛ gɛ ede Kana nɛ́ Galelia, Zɛbɛdi yɛeyialɛ, anɛ badɔkpasɛ tɛabha bhlatɔ be xogoe li.

³ Simɔn Petro ɛtsre ale sɛ, “Ɛvɛ tɛ bu kɛnimɛdzya,” klɛ ba ɖɔ sɛ, “Bu ba tɔnɛ wɔ vɛ.” So ba vɛ de tsoku kɛniabha opupu nɛ mɛ, pɔ elishi alɛlɛ be di bu dɔnyɛdɔ.

⁴ Olizatɔ, Yesu alɔɛ titi nɛ kigbigbe nɛ tɔ, pɔ ba dɛ kpɛ lɛ susu sɛ Yesu yɛ alɛ ɔkɛlɛ.

⁵ Akpɛ ogugu ebisialɛ sɛ, “Ɛbhɛa, kɛnimɛdzya tili lɛ wunɔ ahwɛ?” Bebushunu sɛ, “Oo.”

⁶ Aɖɔ asɛ, “Nɔ tɛɛ̃ wunɔ dzikle nɛ ɔkpɛ keniabha opupu nɛ kɛŋa kapɛ nɛ mɛ, klɛ nɔ bɔ mɔ eteli.” Gɛ ba bhɛtɛ lɛ, ba dɛ na dziklenu he bu alasɛ kenimɛdzya nɛ kpe so.

⁷ Ɔkɛlɛ adɔkpasɛ nɛ gɛ Yesu adɛmɛnɔ ɛtsre Petro asɛ, “Apalete nɛ naa!” Kɛbelɛlɛ gɛ Simɔn Petro enu aɖɔ se, “Apalete nɛ naa,” ayɛkɔ yɛ kabha awui asama shu nɛ yɛ̃ te nɛ mɛ (alasɛ ɛbui yɛ elu) klɛ alɔtɛ̃ ku buni nɛ mɛ.

⁸ Badɔkpasɛ gugɔɛ nɛ ba za keniabha opupu nɛ mɛ atɔnɔa lɛ, nɛ dzikle nɛ gɛ eyuku nɛ kenimɛdzya, alasɛ ba dɛ vɛ odzidzɛkɔ nɛ keni nu tɔ, aba za anasɛ butsrukpɔ kɛfɔɛfɔ ɛzakɔ tɛta.

⁹ Gɛ ba ba dzurɔ nɛ kigbigbe nɛ tɔ, ba mɔ afɔɛ fu ɔkɛlɛ kɛdzya za afɔɛ nɛabha, klɛ nɛ̀ gbɛ̃gbɛvu.

¹⁰ Yesu ɛtsre ale sɛ, “Nɔ mɛna adzya teli gɛ nɔ bu ɔtsɔ.”

¹¹ Simɔnɛ Petro ewuku opupu nɛ mɛ klɛ ehe dzikle nɛ kɛdzya nɛ amɛna kigbigbe nɛa bha. Eyuku nɛ kenimɛadzya gbla, kɛfɔɛfɔ nɛ afeti nɛ tɛata, pɔ nɛ adzya geleea nɛ tsyɛ dzikle nɛ adɛ tsyɔɛ̃.

¹² Yesu ɛtsre alɛ se, “Nɔ ba tɛ bu ŋa kevlɔɛ dɔ.” Badɔkpasɛ kanyãka edi bisi yɛ asɛ, “An wɔ onu?” Be ti asɛ Apalete.

¹³ Yesu avɛ ada yɛkɔ gbɛ̃gbɛvu akɔ alɛ, kana abhɛtɛ nɛ kɛdzya nɛ tsyɛ.

¹⁴ Kɛnɛ kɛlɛnu butramɛ gɛ Yesu ebu ishu akasɛ yɛ badɔkpasɛ nɛ yɛ tɛnyɛnyɛ mɛ ede nɛ bekpui mɛ.

Yesu Etsodzi Ayɛkɛ Petro

¹⁵ Gɛ ba ŋa kedɔ nɛ beke, Yesu ebisi Simɔnɛ Petro asɛ, “Simɔnɛ Yohanɛsɛ yɛ eyi, ɔdɛmɛ mɛ bui dɛa na?” Asɛ “Ee, Apalete, onyi sɛ ɛdɛmɛ wɔɛ bui.” Yesu ɛtsre yɛ asɛ, “Nyunɔ mɛ ibhoshieyi.”

¹⁶ Yesu aza ɖɔ sɛ, “Simɔnɛ Yohanɛsɛ yɛ eyi, ɔdɛmɛ mɛ bui gbɛagba xã?” Ebu shu nu asɛ, “Ee, Apalete, ɔnyi sɛ ɛdɛmɛ wɔɛ bui.” Yesu aɖɔ sɛ, “Di mɛ ibhoshi nɛabha.”

¹⁷ Butramɛ aza ɖɔ tsre asɛ, “Simɔnɛ Yohanɛsɛ yɛ eyi, ɔdɛmɛ mɛ bui xã?” Kɛ puɛ Petro alasɛ butramɛ nyɔ na gɛ Yesu ebisi yɛ bui nɛ sɛ, “Ɔdɛmɛ mɛ bui?” Aɖɔ sɛ, “Apalete, ɔnyi ebui nɛ petee; onyi sɛ ɛdɛmɛ wɔɛ bui.” Yesu aɖɔ sɛ “Kɔ mɛ ibhoshi nɛ kɛdɔŋɛŋa.

¹⁸ Itsre wɔ bui gbɛagba sɛ kɛbelɛlɛ nɛ gɛ odzi anuvɔ, wɔnahwɛ onyumu kɛdɔ klɛ okoeyi ɔvɛ ɔkɛlɛ gɛ ɔpɛɛ, pɔ kibenɔ gɛ obo she obɔ bu wɔ ɛhwɛ klɛ anɔ bhlatɔ abe nyumu kɛdɔ kɔ wɔ klɛ aba gbanɛ wɔ avɛnɔ ɔkɛlɛ gɛ ɔdɛ pɛɛ sɛ tɛ ɔvɛ.”

¹⁹ Yesu aɖɔ kɛbuinɛ sɛ tɛ ayɛkɔ akasɛ butsi nɔ nɛdi gɛ Petro aba yɛkɔ akpɛ Kpaya nɛabha. Kɛlɛede ɛtsre yɛ asɛ, “Za mɛ ede!”

²⁰ Petro etsyina di kede klɛ amɔ adɔkpasɛ gɛ yɛ bui Yesu adɛmɛnɔ alɛa lɛede. (Yɛ nu agɛ akpaplɛnɔ Yesu gɛ ebisi yɛ nɛ ɔwulago kɛdɔ nɔŋa kɔ se, “Apalete, anɛ gɛ aba yɛ kɔ wɔ akpɛahwɛ?”)

²¹ Gɛ Petro amɔ yɛ, ebisi asɛ, “Apalete, kide wɔ ɖɔ nɛ yɛ shu?”

²² Yesu ebuilɛnu sɛ, “Onugɛ ɛpɛɛ sɛ tɛ aza nɛ ɛkpã ɔdɔtɔnɔ kɛbenɔ nɛ gɛ ɛba ba, kide lɛ nu kɔ wɔ? Kɛlɛ sɛ tɛ ɔza mɛede.”

²³ Kɛbuinɛ so, nɔ ɖɔ ebui ɔkana nɛ bala badzya nɛ mɛ sɛ adɔkpasɛ anɛ eti be tsi. Pɔ Yesu adɛ ɖɔ sɛ etibe tsi, aɖɔ ko sɛ, “Onugɛ ɛpɛɛ sɛ tɛ azanɛ kpã ɔdɔtɔnɔ kɛbe gɛ ɛbatsodzi ba, kɛde lɛ nu kɔ wɔ?”

²⁴ Yɛ nu adɔkpasɛ gɛ yɛ aɖɔaɖɔ nɛ ebuia nɛ shu klɛ yɛ aŋlɔmɛ alɛ elu. Bu nyi sɛ yɛ ebui ɖuɖɔa nɛ le nu kɛgbɛagba.

²⁵ Yesu abhɛtɛ ebui bhlatɔ gelee aplɛnɔ. Onugɛ ba ŋlɔmɛ alɛ petee lu, ɛyɛkɛŋa sɛ kanɔ petee tsyɛ katɛ ba mɔ buvu kɔ buplukpa gɛ ba ŋlɔmɛ.