Yohanɛsɛ 17 - ONUGBÙ NYƐNYÃ VUVƆ

Yesu Eklukpaya Kɔ Yɛnahwɛ Shu

¹ Gɛ Yesu aɖɔ kibui nɛ beke, ebu amɛ akpɛ owũsise klɛ eklukpaya: “Aka, kɛbe nɛ na. Kpɛ Wɔ Eyi nɛa bha, sɛ tɛ wɔ Eyi tsyɛ akpɛ wɔ nɛa bha.

² Alasɛ wɔ ɔkɔ yɛ kabhaŋɛŋa nɛ banɔ nɛ petee abha sɛ tɛ aba kɔ ɛkpã mabeke banɔ petee gɛ ɔyɛkɔ kpɛ ahwɛ kɔ yɛ.

³ Ɔtsɔ̃ kɛɛ nɛ kɛlɛ nu ɛkpã mabeke: sɛ tɛ be ti wɔ, kɛgba Kpaya terikpo, anɛ Yesu Kristo, gɛ yɛ wɔ kpɛ.

⁴ Ɛmɛna wɔ kabhakpɛkpɛ nɛ kesukpa nɛa bha, ganɔ kɛxwɛ nɛ gɛ ɔkɔ mɛ nɛ tɛwɛwa beke.

⁵ Klɛ ɔtsɔ̃ nɛ̃ nɛɛ, Aka, kpɛ mɛ nɛa bha nɛ wɔ ɔzakɔ anɛ kabhakpɛkpɛ nɛ ga za mɛ ahwɛ plɛnɔ wɔ flogo pɛ kanɔ na kakpɛe si.

Yesu Eklukpaya Kɔ Yɛ Badɔkpasɛ

⁶ “Ibu wɔ kasɛ banɔ nɛ gɛ ɔkɔ mɛ denɔ kanɔ nɛ mɛ. Be dzi wɔayɛalɛ, wɔ yɛkɔa lɛ ɔkɔ mɛ klɛ ba ta wɔ kibui na tɔ.

⁷ Ɔtsɔlɛ be nyi asɛ kɛdɔnyɛdɔ gɛ ɔkɔ mɛ kide wɔ kɔ.

⁸ Alasɛ ɛkɔ alɛ ebui gɛ ɔkɔ mɛ klɛ ba yɛkɛ alɛ. Be nyi nɛ kɛgbɛagba sɛ ɛde wɔ kɔ klɛ ba yɛkɛŋa sɛ wɔ kpɛ mɛ

⁹ Ɛklukpaya nɛ balɛ tɔkpu. Ɛtɛ klukpaya nɛ kanɔ nɛ tɔkpu, pɔ kɔ ba gɛ ɔkɔ mɛ, alasɛ be nu wɔ ayɛ alɛ.

¹⁰ Kɛdɔ nɛ petee gɛ ɛvunɔ wɔɛ yɛ lɛ nu, klɛ kɛ gɛ petee ovunɔ mɛ yɛ lɛ nu. Klɛ kabhakpɛkpɛ aba kɔ mɛ ganɔ balɛabha.

¹¹ Ɛtɛ ba wɔ kanɔ nɛ mɛ ɔvɛnɔ, pɔ ba ka lɛ kanɔ nɛ mɛ klɛ ɛba wɔ kɔ. Ishubhubhui Aka, kpɛ buka kpɛ alɛ nɛ wɔ kemi nɛ nyi mɛ—kinyi gɛ ɔkɔ mɛ—sɛ tɛ ba baza terikpo anasɛ gɛ bu lɛ terikpo.

¹² Kɛbelɛlɛ gɛ ɛlɛ ba lɛ ɔbha ɛkpɛ buka kpɛ alɛ klɛ idi ba lɛabha mɔmɔ ganɔ kɛ nyi gɛ ɔkɔ mɛ nɛabha. Anɔnyanɔ adɛ lɛla ɔdɛ nu agɛ yɛ ba trɔ sɛ tɛ alɛla nɛ sɛ tɛ be bu Kpayaplukpa mɛ ebui nɛ akasɛ.

¹³ “Ɛba wɔ kɔ ɔtsɔ̃, pɔ ɛɖɔ ebuia nɛ kɛbelɛlɛ gɛ ɛka lɛ kanɔ nɛ mɛ, sɛ tɛ ba bamɔ same nɛna gɛ ɛmɔ nɛ balɛ mɛ.

¹⁴ Ɛkɔ alɛ wɔe bui klɛ kanɔ ke ti gu alɛ, alasɛ anɛ kanɔa nɛ mɛ elete be ke nu dɛ mɛ gɛ ɛka nu kanɔ nɛ mɛ ayɛ.

¹⁵ Mɛ kpayakuklu edi nu sɛ tɛ obu alɛ nɛ kanɔ nɛ mɛ pɔ sɛ tɛ ɔkpɛ buka kpɛ alɛ denɔ ezizi na hwɛ mɛ.

¹⁶ Be di nu kanɔ nɛ mɛ ayɛ, anasɛ gɛ mɛ tsyɛ ɛdɛ nu kanɛ nɛ mɛ ayɛ.

¹⁷ Danɛ alɛ shu ganɔ kibui gbɛagba, wɔɛ bui nɛ nu kɛgbɛagba.

¹⁸ Anasɛ gɛ ɔkpɛ mɛ nɛ kanɔ nɛ mɛ, ɛkpɛ alɛ nɛ kanɔ nɛ mɛ.

¹⁹ Alasɛ iipulu mɛ nahwɛshu, sɛ tɛ ba lɛ tsyɛ ba ba plu shu kɛgbɛagba.

Yesu Eklukpaya Kɔ Bayɛyɛkɛŋa Petee

²⁰ “Mɛ kpayakuklu edi nu kɔ ba lɛ tite ko. Iklukpaya kɔ bagɛ ba ba yɛkɛ mɛabhaŋa ganɔ ba lɛ ebui ɖɛɖɔ tsyɛ abha,

²¹ sɛ tɛ balɛ petee ba be dzi terikpo, Aka, anasɛ gɛ ɔlɛ mɛ́ mɛ klɛ mɛ lɛ wɔɛ mɛ. Kɔ ba lɛ tsyɛ ba baza bulɔɛ mɛ sɛ tɛ kanɔ na ba yɛkɛŋa sɛ wɔ kpɛ mɛ.

²² Ɛkɔ alɛ Kabhakpɛkpɛ gɛ ɔkɔ mɛ, sɛ tɛ ba be dzi Terikpo anasɛ gɛ bu nu terikpo:

²³ Ɛlɛ ba lɛ mɛ klɛ wɔ ɔlɛ mɛ mɛ. Ba ba mɛna alɛ tɛ ba bhɛtɛ tɛɖikpo nahwɛ tɛ kɛ kɔ kanɔ ne ti sɛ wɔ kpɛ mɛ klɛ ɔdɛmɛnɔ nɛ alɛ anasɛ gɛ ɔdɛmɛnɔ nɛ mɛ.

²⁴ “Aka, ɛpɛɛ sɛ bagɛ ɔkɔmɛ sɛ tɛ baza mɛ ɔbha nɛ ɔkɛlɛ gɛ ɛlɛ, klɛ tɛ ba mɔ kabhaŋɛŋa, kɛbhaŋɛŋa nɛ gɛ ɔkɔ mɛ alasɛ ɔdɛmɛnɔ mɛ flogo gɛ kanɔ bhɛbhɛtɛ ka kpɛesi.

²⁵ “Aka Nɛna, kɛlɛlɛmɛ sɛ kanɔ nɛ ti nyi wɔ, mɛ nyi wɔ, klɛ benyi sɛ wɔ kpɛ mɛ.

²⁶ Ɛbhɛtɛ wɔ tɛ oti alɛ, klɛ tɛ kɛ vɛabha tɛ ba bhɛtɛ wɔ nɛ kɛlɛmɛ sɛ tɛdɛdɛmɛnɔ gɛ kɛlɛ wɔ ahwɛ kɔ mɛ tɛ kɛ ba za ba lɛ mɛ klɛ tɛ mɛ nahwɛ ɛba za bɛ lɛ mɛ.”