Titusɛ 1 - ONUGBÙ NYƐNYÃ VUVƆ

¹ Paolo, Kpaya axwɛdɛ anɛ Yesu Kristo anɔkpɛkpɛ kɔ Kpaya tɛyɛyɛkɛŋa gɛ be bu nɛ kɛgba anɛ kibuititi nɛ gɛ kɛɛ gbanɔ anɔ vɛnɔ kpayazɛza mɛ,

² tɛyɛyɛkɛŋa anɛ kibuititi nɛ gɛ kɛ kpaplɛnɔ kidzoenudidi kɔ ɛkpã gɛ tɛ ba beke, gɛ Kpaya, gɛ eti hu otro, nɛ aɖɔɛ lɛ elu denɔ kibe nɛ kesikpɛkpɛ mɛ,

³ klɛ nɛ yɛ kibe nɛ gɛ atrɔ nɛ mɛ amɛna yɛ kibui nɛ ɔtɔ ganɔ kibui nɛ tɛɖuɖɔ nɛ gɛ ayɛkɔ akpɛ mɛ ahwɛ mɛ ganɔ Kpaya agɛ ebe bulɔ nɛ tɛtutrɔ mɛ,

⁴ Kɔ Titusɛ, mɛ eyianyɛ nɛ kɛgbɛagba mɛ nɛ bulɔ tɛyɛyɛkɛŋa tite mɛ, Ɛyamyuyɔ anɛ ishuyuyɔ denɔ Aka Kpaya anɛ Kristo Yesu bulɔ Ayɛyɛkɛkɔ nɛ ɔkɔ.

Titusɛ Kɛxwɛ Nɛ Krete

⁵ Kɛdɔnɔ nɛ so pɛ ɛshɛ lɔ wɔ nɛ Krete kɛlɛ nu sɛ tɛ ɔna ebui nɛ gɛ agɔ pɛ ɛdɛ bhɛtɛ nɛ dzyɔ tɛ odzu kpayanɔ nɛ ɔma kanyaka mɛ, ansɛ gɛ ɛɖɔ sɛ ɔbhɛtɛ.

⁶ Ɔhamɛ anɔshishe ama sɛ tɛ kɛpɔ kanyaka za yɛ shu, pɔ edzi adzɛ terikpo yɛenyine, anɔnyɛ gɛ yɛeyialɛ nɛ ba yɛkɛaŋa klɛ be di nu banɔ gɛ ba pɛɛ ebla klɛ ba taa ta tɔ.

⁷ Gɛ kɛ tɛ dzi sɛ abhaŋa ahwɛmɛ la yɛkɔ Kpayɛxwɛ nɛ akpɛ, alasɛ tɛ edzi anɔ gɛ kɛpɔ ma yɛ shu—atɛ trɔ anɔa bha, obulo oti ku yɛ zɛazɛa, atɛ yɛkɔ ishu akɔ bulububuku, eti dzi eblapɛ, atɛ za otroedzoe de kɔ kɛdɔmumɔ.

⁸ Nɛ kɛlɛ shu so alasɛ tɛ edzi anɔ gɛ aba yɛkɛ anɔ, anɔ gɛ aɖɔ kɛdzyɔgo, gɛ aŋashuabha, gɛ afulɔ̃, yɛ shu bhui klɛ atatɔ.

⁹ Alasɛ tɛ anyɛna kibui nɛ gɛ kɛlɛ sɛ ba yɛkɛ kɛlɛ bha aŋa nɛ mɛ evunɔ gɛganɛɛ ansɛ gɛ ba kasɛ lɛ, sɛ tɛ ana bagɔgɔɛ nɛ kemiu kpɛ ganɔ kɛdɔkɛkasɛ nɛna tɛ atɛ dɛmɛ nɛ bagɛ balɔ kititi nɛ kɛlɛ shu.

¹⁰ Alasɛ banɔ dzyidzyeaga gelee alɛ, kaɖɔɖuɖɔte elete nɛ banɔ gɛ bawɛ anɔ, ɔyɛkɔdɛ nɛɛ bagɛ ba kpasɛ Yuɖanɛ bugu nɛ mɛ.

¹¹ Alasɛ tɛ ba bhɛtɛ alɛ tɛ ba da onugbu, alasɛ baa yɛɛ bapa gelee ganɔ balɛ kɛdɔkɛkasɛ nɛ gɛ kɛma sɛ ba kasɛ nɛ mɛ, klɛ apɛa sɛ tɛ ba mɔ kɛdɔ ganɔ otro mɛ so.

¹² Balɛ nahwɛ atɔnu nɛɔmayɛ teli tsyɛ aɖɔ sɛ, “Kreteanɛ be nu betroni kibenyɛbe, atɔkpum gɛganɛ ɛkpã, badɔŋagbla gɛ avɔ.”

¹³ Kibuimɔɖɔɛ nɛ nu kɛgba. Kɛlɛ so, kpa lɛ zia, sɛ tɛ ba na nɛ tɛyɛyɛkɛŋa nɛ mɛ

¹⁴ klɛ tɛ ba tɛ tatɔ nɛ Yuɖanɛ begu ɔdɔgɔsɛ ba tatɔ nɛ bagɛ ba shɛnahwɛ kɛgba nɛ shu.

¹⁵ Kɔ bagɛ balɛ shu bhui, kɛdɔnyɛdɔ shu bhui kɔa lɛ, pɔ kɔ bagɛ balɛ eti zi klɛ ba dɛ yɛkɛaŋa nɛɛ, kɛdɔnyɛdɔ shu dɛ bhui. Kɛgba nɛɛ, balɛ atɔkpu mɛ anɛ idzyi nɛ mɛ ezi.

¹⁶ Bee bu aɖɔa sɛ be nyi Kpaya, pɔ ganɔ balɛ ebui bhɛbhɛtɛ nɛ mɛ ba dɛ yɛkɛ yɛ. Be nu banɔ gɛ ba kpalɛɔha, ba ta taa tɔ klɛ ba dɛ na kɔ kibui dzyɔgo kanyaka tɛbhɛbhɛtɛ.