Tɛbubukasɛ 19 - ONUGBÙ NYƐNYÃ VUVƆ

Haleluya!

¹ Kɛɛ nɛ nɛe de inu kɛdɔ tili dɔ ansɛ banɔɛha gbla kɛlɛ kpɛ ogugu nɛ owũsise sɛ: “Haleluya! Tɛbubu anɛ kabhakpɛkpɛ anɛ kemi ke nu bulɔ Kpaya nɛa yɛ,

² alasɛ kɛgba anɛ tɛnɛna alɛ nu yɛ bubhuikukulu. Eti bu adzɛzhuzhɔlɛ gbla nɛ pɔ agɛ ezi kesukpa ganɔ yɛ azhuzhɔlɛbui mɛ. Eti bisi buwule nɛ yɛ baxwɛdɛ nɛ dzyosu nɛ tɔkpu denɔ adzɛ nɛ ɔkɔ.”

³ Klɛ ba za kpɛ ogugu: “Haleluya! Ɔnyɔ̃ nɛ gɛ ode adzɛ nɛ ɔkɔ nɛ ɔɔvɛa bha ɔyɛkɔ vɛnɔ mabeke mabeke.”

⁴ Banɔshishe afɛtabhantɛalɛ̃ anɛ kɛdɔbhɛ bhɛtɛ lulu tɛlɛ̃ nɛ wɔlɛ dɔ klɛ kɛ kpɛ kɛtɔkpuesi kɔ Kpaya, gɛ ezhidzi bukusiegbu nɛa bha. Klɛ ba kpɛ ogugu asɛ: “Tɛlɛbɛlɛm, Haleluya!”

⁵ Ɔkɛlɛ oli tilim oyi denɔ bukusiɔŋakɔ, ɔɔɖɔ sɛ: “Nɔ Kpɛ bulɔ Kpaya nɛa bha, wɔnɔ yɛ baxwɛdɛ nɛ petee, wɔnɔa gɛ no si yɛ fu, bebhliyi anɛ bagbɛgbla petee!”

⁶ Ɔkɛlɛ mɛ nu kɛdɔ tili dɔ gɛ yi ansɛ banɔɛzagbla, ansɛ buni kpɛkpɛ gɛɛ tɔkɔ klɛ bu yi gɛganɛɛ ansɛ subhalɛlɛ, ogugu sɛ: “Haleluya! Alasɛ bulɛ Apalete Kpaya Agɛadɛ yɛ aŋɛabha.

⁷ Nɔ kɔ lɔ wɔ tɛ bu mɔ same klɛ tɛ bu kpɛ yɛ nɛa bha! Alasɛ Obhoshieyi nɛ gbanɔwi nɛ tɛ ba, klɛ yɛedzini nɛ atɛ bala yɛ shu elu.

⁸ Kɛpɔtɛ dzyɔgo, kɛlɛ shu bhui klɛ kɛɛ tã, kɛlɛ la yɛkɔ akɔ yɛ sɛ enyumu.” (Kɛpɔtɛ dzyɔgo kɛlɛ nu banɔnɛna nɛ tɛnɛnamɛzɛza ebuibhɛbhɛtɛ.)

⁹ Ɔkɛlɛ kpayaxwɛdɛ nɛ etsrem asɛ, “Ŋlɔmɛ: ‘Bayula bagɛ balɛ be kulu akɔ Obhoshieyi nɛ adzɛ gbɛgbanɔ owulagoe dɔ ŋɛŋa!’ ” Klɛ aza yɛkɔ ata sɛ, “Anɛ nɛ alɛ nu Kpaya ebuiɖuɖɔ nɛ gɛ enu kɛgba.”

¹⁰ Nɛ kɛɛ nɛ nɛ shu ɛwɔlɛdɔ yɛ butsrukpɔ nu sɛ tɛ ɛkpɛ kɛtɔkpuesi kɔɛ. Pɔ aɖɔ etsre mɛ asɛ, “Tɛ bhɛtɛ lɛ! Mɛ tsyɛ nu wɔhayɛ axwɛdɛ plɛnɔ wɔ nɛ wɔadzyalɛ gɛ ba nyɛna ebui nɛ gɛ ba mɔa ɖɔ nɛ Yesu shu nɛ mɛ evunɔ. Kpɛ kɛtɔkpuesi kɔ Kpaya! Alasɛ ebui nɛ gɛ ba mɔa ɖɔ nɛ Yesu shu nɛ enu kibuiɖuɖɔlu ɔfufɔɛ.”

Agɛ Etsri Sɔ Fufu Nɛabha

¹¹ Ɛmɔ owũsise gɛ ɔdanɛ oli klɛ nɛ mɛ amɛ ɛsɔ fufu eli, gɛ agɛ etsri yɛa bha be kulua sɛ Tɛyɛyɛkɛŋa anɛ Kɛgba. Plɛnɔ tɛnɛna mɛ ekluebhui klɛ ata keyu.

¹² Yɛ anhũ nɛ edzi ansɛ kifu ɔlɛklɛmɛ, klɛ nɛ yɛ ada nɛ mɛ bukusiekutu gelee etsri. Kinyi lɛ yɛahwɛ gɛ ba ŋlɔmɛ at yɛ asɛ anɔnyanɔ eti nyi pɔ yɛnɛahwɛ enyi.

¹³ Akpɛ awidzidze gɛ ba vɔ akpɛ dzyosu mɛ, klɛ yɛ kɛnyi nɛ kɛlɛ nu Kpaya Kibui.

¹⁴ Owũsise behudugbani na lɛ yɛe de, gɛ be tsri basɔ fufua bha klɛ be nyumu apɔtɛ dzyɔgo, gɛ efuli klɛ alɛ shu ebhui.

¹⁵ Denɔ yɛ onugbu nɛ mɛ ɛhɛ shɛshɛ eekoeyi gɛ yɛ aba yɛkɔ ehu amadi nɛe si nɔ. “Aba ŋa balɛa bha nɛ ɔɖa dzyamgbɛ.” Aga Kpaya Gbɛgbladɛ nɛ kanya obulo bulu kizi nɛa bha.

¹⁶ Nɛ yɛ awidzidze anɛ yɛ kɛtsrɛta nɛ shu kinyii nɛ ŋlɔmɛ tsri ɔkɛlɛ sɛ: bekusi nɛ ekusi anɛ bapalete nɛ apalete.

¹⁷ Klɛ mɛ mɔ kpayaxwɛdɛ teli eli kititi nɛ buwui nɛa bha, gɛ akpɛ ogugu gɛganɛɛ etsre buzhuɔɛ nɛ petee gɛ pruru nɛ kɛlɛɛ nɛm asɛ, “Ba, no xogo kɔ Kpaya owulago kɛdɔŋagbla,

¹⁸ sɛ tɛ nɔ bɔ tã bekusi nɛ dzya, buyuaka, anɛ banɔgbla, basɔ anɛ bagɛ etsri alɛa bha, anɛ banɔ nɛ petee adzya, banɔdzidzi anɛ bagɛ be di dzi, be bhliyi anɛ bagbɛgbla.”

¹⁹ Ɔkɛlɛ mɛ mɔ agavuga anɛ kesukpa bha bekusi anɛ balɛ behudugbani gɛ be xogo sɛ tɛ ba ta keyu nɛ agɛ etsri sɔ nɛa bha anɛ yɛ behudugbani.

²⁰ Pɔ be vu agavuga, ɔplɛnɔ otro atɔnu nɛ gɛ abhɛtɛ ebuimumɔ nɛ gɛ abhɛtɛ bi nɛ yɛ nu. Ɔyɛkɔ plɛnɔ ebui mumɔa nɛɛ alɛ ayɛkɔ awɛ bagɛ ba yɛkɛ agavuga nɛ ebi pɛ ba kpɛ kɛtɔkpuesi kɔ yɛ abhubhɔ. Ba yɛkɔ batɛabha nɛ atɛ̃ elulu akpɛ kɛklãgbui fui vɔ nɛ mɛ.

²¹ Bagɔgɔɛ nɛ be yialɛ nɛ ɛhɛ nɛ gɛ ede agɛ etsri sɔ nɛa bha nɛ onugbu nɛ mɛ, klɛ buzhuɔɛ nɛ petee ba tsyui balɛ adzya.