Tɛbubukasɛ 10 - ONUGBÙ NYƐNYÃ VUVƆ

Kpayaxwɛdɛ Nɛ Kazaplukpa Bhli

¹ Ɔkɛlɛ mɛ mɔ kpayaxwɛdɛ gbɛgbla gɛ ede owũsise aaba. Enyumu ɔmunɔ, ɔplɛnɔ eniga nɛ yɛ ada nɛ mɛ; yɛ amɛ nɛ mɛ edzi ansɛ kiwi, klɛ yɛ butsrukpɔ nɛ dzi ansɛ kifu buvuisi.

² Evunɔ kazaplukpa bhli tieli, gɛ ka danɛ eli nɛ yɛ ahwɛ nɛ mɛ. Atrɔ yɛ kɛŋa ɔtsrɛ nɛ aƒu nɛa bha klɛ yɛ kɛbɛtɛkpɛ ɔtsrɛ nɛ otsri kesukpa nɛa bha,

³ klɛ alɛɛ gɛganɛɛ ansɛ adzyata. Gɛ akpɛ ogugu nɛɛ, subhalɛlɛ tiegene nɛ ili nɛ mɛ ɖɔaɖɔ.

⁴ Klɛ gɛ subhalɛlɛ tiegene nɛ aɖɔaɖɔ nɛɛ, ɛbhɛtɛ sɛ tɛ ɛŋlɔ̃mɛ dɔ; pɔ inu olim toli dɔ denɔ owũsise gɛ ɔɔɖɔ sɛ, “Da kibui nɔ nɛ gɛ subhalɛlɛ tiegene na ɖɔ nɛ dɔ tɛ ɔtɛ ŋlɔmɛ lɛ olu.”

⁵ Ɔkɛlɛ kpayaxwɛdɛ nɛ gɛ ɛtɛ mɔ gɛ eli kititi nɛ aƒu anɛ kesukpa nɛa bha nɛ ebu yɛ kɛŋahwɛ nɛ akpɛ owũsise.

⁶ Klɛ atanɔ agɛ yɛ alɛ mabeke mabeke, gɛ yɛ abhɛtɛ iwũsise anɛ kɛdɔnyɛdɔ gɛ lɛ ɛlɛ mɛ, kesukpa anɛ kɛdɔnyɛdɔ gɛ kpasɛ kalɛ mɛ, anɛ aƒu anɛ kɛdɔnyɛdɔ gɛ kpasɛ yɛ mɛ, klɛ asɛ, “Kideyiyi tɛa za!

⁷ Pɔ nɛ ewi nɛ mɛ gɛ kpayaxwɛdɛ tiegene nɛ aba bɔ yɛa xũlɛ̃ nɛɛ, Kpaya ebuikpukpu nɛ aba bɛ lɛ mɛ beke, ansɛ gɛ ebu aɖɔ etsre yɛ batɔnu.”

⁸ Ɔkɛlɛ olim nɛ mɛ dɔ gɛ inu ba flanɔ nɔ zɔ ɖɔ kaɖɔ otsre mɛ ɔsɛ: “Vɛ, yɛkɔ kazaplukpa nɛ ga danɛ eli nɛ kpayaxwɛdɛ nɛ gɛ eli kititi nɛ aƒu anɛ kesukpa nɛa bha.”

⁹ So ɛtɔnɔ kpayaxwɛdɛ nɛ vɛ klɛ mɛ bisi yɛ sɛ ayɛkɔ kazaplukpa bhli nɛ akɔ mɛ. Aɖɔ etsre mɛ asɛ, “Yɛkɔa lɛ tɛ ɔtɛ̃ lɛ. Ka ba za nyagbanyagba nɛ wɔ ɛya mɛ, pɔ nɛ wɔ onugbu mɛ kaba za tsyɛmɛtsyɛmɛ ansɛ betsiuni.”

¹⁰ Ɛyɛkɛ kazaplukpa bhli nɛ kpayaxwɛdɛ nɛ ahwɛ klɛ mɛ tɛã lɛ. Ka za ɔdzyɛ ansɛ betsiuni nɛ mɛ onugbu mɛ, pɔ gɛ ɛtã kalɛ beke, mɛ ɛya mɛ tsyina nyagbanyagba.

¹¹ Ɔkɛlɛ be tsre mɛ asɛ, “Alasɛ tɛ ɔflɔ ɖɔ ebui olu nɛ mɛ banɔ nɛ shu, amadigbla, benuhu anɛ bekusi nɛ shu.”