Romanɛ 2 - ONUGBÙ NYƐNYÃ VUVƆ

Kpaya Kebhui Dzyudzyɔ

¹ So, wɔnɔ nɛɛ, kideyiyi ma kɔnɔ, wɔnɔa gɛ okulu bhui nɛ anɔ bhlatɔ, alasɛ kibenyɛbe gɛ okulu kebui nɛ wɔhayɛ, wɔ nahwɛ shu ozi, alasɛ wɔ nɛ gɛ okulu bhui nɛ anɔ nɛ tsyɛ ɔbhɛtɛ ebui alɛ nɛɛ di.

² Ɔtsɔ̃ bunyi sɛ Kpaya kebhui kukulu nɛ banɔ nɛ gɛ abhɛtɛ ebuia nɛ di nɛ abhɔatrɔ kɛgba nɛa bha.

³ So onu gɛ wɔ, anɔ tite ko, okulu bubhui nɛ banɔ flogo pɛ wɔ tsyɛ ɔbhɛtɛ ebuia lɛ nɛ di, ɔyɛkɛŋa sɛ obo na si ɔlɔ Kpaya kebhui kukulu nɛ wɔ dza?

⁴ Ɔdɔgɔsɛ ɔkasɛ awɔ̃kuku kɔ kikesrɔdɔ nɛ gɛ de yɛ ɛyamyuyɔ nɛ wɔ, amɛkukɔ anɛ tɛdɛdɔfɔ̃ nɛ wɔ, ɔtɔɔ mɔ sɛ Kpaya eyamyuyɔ nɛ gbanɔ wɔ ɔvɛnɔ kitem tsyitsyina shu?

⁵ Pɔ akpɛ wɔ batɔ matamata nɛ wɔ kitem matsyina matsyina idzyi nɛ so, oxogo batɔtɛtɛta kɔ ishu kɔ Kpaya batɔtɛtɛta wi, nɛ gɛ be be bu yɛ kebhui kuklu dzyɔgo nɛ akasɛ.

⁶ Kpaya, “aba kɔ anɔnyanɔ nɛ yɛ kɛxwɛ nɛ gɛ awa nɛ nu.”

⁷ Banɔ nɛ gɛ ganɔ tɛyɛyɛkɔ trɔshu nɛ kɛdzyɔgo bhɛbhɛtɛ mɛ pɛ ba pɛɛ ishubhubhui, kabha kpɛkpɛ anɛ ɛkpãzɛza, aba kɔ ɛkpã mabeke mabeke.

⁸ Pɔ kɔ banɔ nɛ gɛ ba pɛɛ ishuiyɛ ko, klɛ ba shɛnahwɛ kɛgba nɛ shu, pɛ ba lɛ butsutsɔmɔe de, batɔtɛtɛta anɛ oblo obɔ za kɔa lɛ.

⁹ Butɔ nɛ ebui tutrɔ anɔabha alɛ aba za kɔ anɔdzyrame kanyaka gɛ abhɛtɛ kibui tsutsɔmɔ: putɔnɔ kɔ Yuɖanɛ, flogo pɛɛ kɔ bagɛ edi nu Yuɖanɛ;

¹⁰ pɔ ishubhubhui, kabhakpɛkpɛ anɛ ishuyuyɔ kɔ anɔnyanɔ gɛ aabhɛtɛ kɛdzyɔgo: putɔnɔ kɔ Yuɖanɛ, flogo pɛɛ kɔ bagɛ edi nu Yuɖanɛ.

¹¹ Alasɛ Kpaya yɛ ete di anɔa mɛ.

¹² Banɔ nɛ petee gɛ ba bhɛtɛ kɛgɛ ma ɔshã nɛ mɛ, ba ba lɛla nɛ ɔshã nɛm maza maza, klɛ banɔ petee gɛ ba bhɛtɛ buzizi nɛ ɔshã nɛesi, ɔshã nɛ obo kuluebhui nɛ balɛ.

¹³ Alasɛ ganɛ banɔ nɛ gɛ be nu ɔshã nɛ balɛ enu banɔnɛna nɛ Kpaya amɛ, pɔ ba gɛ balɛ abhɛtɛ atrɔ ɔshã nɛa bha balɛ la ba ɖɔ sɛ be nu banɔnɛna.

¹⁴ (Kɛlɛɛ lɛm sɛ, kibelɛ gɛ bagɛ edi nu Yuɖanɛ, pɛ ɔshã nɛ ɔma balɛ ahwɛ, nɛ kanɔmɛ nu balɛ abhɛtɛ ebui nɛ gɛ ɔshã nɛ obisi, balɛ nahwɛ nɛ be nu ɔshã kɔ shu, ɔshã nɛ ɔnyɔ ma balɛ ahwɛ pɔ,

¹⁵ denɔ kibe lɛm gɛ be bu kasɛ asɛ ebui nɛ gɛ ɔshã nɛ obisi nɛ aŋlɔmɛ etsri balɛ idzyia bha ko, balɛ idzyi nɛm tsyɛ amɔ plɛnɔa lɛ, klɛ balɛ atɔkpum bhɛbhɛtɛ ɔtsɔ̃ ebualɛ pɔ, ɔtsɔ̃ le bualɛ nu tsyɛ.)

¹⁶ Kibui nɛ ba ba kɛlɛm nɛ kiwi nɛa bha gɛ Kpaya ebe kuluebhui nɛ banɔ nɛ ebuikpukpu ganɔ Yesu Kristoa bha, anasɛ gɛ mɛ kibuidzyɔgo nɛ buɖɔ.

Yuɖanɛ Nɛ Ɔshã

¹⁷ Ɔtsɔ̃ wɔ, onu gɛ okulu wɔshu sɛ onu Yuɖaeyi; onu gɛ otsri ɔshã nɛa bha klɛ ofekeshu nɛ kishopo nɛ gɛ kpasɛ wɔ nɛ Kpaya kishi;

¹⁸ onu gɛ onyi yɛ tɛpɛpɛɛ klɛ ɔtrɔ ahwɛ nɛ kɛ gɛ kɛpɛ̃ dɛ nɛa bha, alasɛ ɔshã nɛ ɔkasɛ wɔ kɛgabi so;

¹⁹ onu gɛ ki ku wɔ awɔ̃ sɛ onu agbɛgbanɔ kɔ anhũpu, kanɛgbɛ kɔ bagɛ ba kpasɛ otumu mɛ,

²⁰ adɔkasɛ kɔ agã, adɔkasɛ kɔ banuvɔ, alasɛ nɛ ɔshã nɛ mɛ kibuititi anɛ kɛgba lɛ wɔahwɛ—

²¹ kɛlɛ, wɔ, gɛ, ɔkasɛ banɔɛ dɔ, ɔtɔɔ kasɛ wɔnahwɛ shu? Wɔ nɛ gɛ ɔɖɔaɖɔ ɔlɔ kititi anɛ buzi shu, ozuru xãa?

²² Wɔ nɛ gɛ ɔɔɖɔ sɛ banɔa ta bhɛtɛ aglɔbui, ɔdɔɔ ɔbhɛtɛ aglɔbui? Wɔ nɛ gɛ otsyri kɛdɔbhubhɔ, odo zuru nɛ busɔlɛevu mɛ?

²³ Wɔ nɛ gɛ ofekeshu sɛ onyi ɔshã, ɔtɔɔ kpɛ Kpaya nɛa bha ganɔ ɔshã nɛa bha mabhɛtɛ mabhɛtɛ?

²⁴ Anasɛ gɛ ba ŋlɔmɛ elu asɛ: “Be tutru Kpaya kinyi nɛ bagɛ edi nu Yuɖanɛ nɛ shi akpɛ wɔ so.”

²⁵ Kɛdzyɔgo lɛ bunyɛnyɛ bhubhui shu onu gɛ ɔnyɛna ɔshã nɛm ovunɔ, pɔ onu gɛ ɔdɛ bhɛtɛ ɔshã nɛa bha, odzi anasɛ anɔ nɛ gɛ edi bhui bunyɛnyɛ.

²⁶ Onu gɛ bagɛ edɛ bhui bunyɛnyɛ nɛ anyɛna kɛdɔnɔ nɛ gɛ ɔshã obisi nɛm evunɔ, be te di alɛ anasɛ banɔ gɛ bhui bunyɛnyɛ?

²⁷ Anɔ nɛ gɛ edi bhui bunyɛnyɛ nɛ ishuidzya nɛ mɛ klɛ tsyɛ pɛ anyɛna ɔshã nɛm evunɔ, ebe bu wɔabha agɔ, onu gɛ ɛshãeplukpa nɛ bunyɛnyɛ bhubhui lɛ wɔahwɛ tsyɛ, onu anɔ gɛ ɔda ɔshã.

²⁸ Anɔ eti be dzi Yuɖaeyi onu nɛ amɛ ko, ɔdɔgɔsɛ bunyɛnyɛ bhubhui tite nɛ amɛ nɛ ishuidzyam ko.

²⁹ Ao, anɔ enu Yuɖaeyi gɛ onu nɛ kɛmɛ mɛ; klɛ bunyɛnyɛ bhubhui nu bunyɛnyɛ bhubhui kɔ idzyi, ganɔ Ɔfufɔɛ mɛ, ganɛ ganɔ ɔshãeplukpam. Anɔa lɛlɛ nɛ di nɛ kabhakpɛkpɛ nɛ di de banɔ ɔkɔ, pɔ kide Kpaya ɔkɔ.