Romanɛ 13 - ONUGBÙ NYƐNYÃ VUVƆ

Kɛtɔkpuesi Kpɛkpɛ Kɔ Bagɛaŋɛabha

¹ Anɔnyanɔ akpɛ kɛtɔkpuesi kɔ bagɛaŋɛabha pɛ ba gbanɔ anɔ, alasɛ kabhaŋɛŋa kanyaka ma gɛ odinu sɛ Kpaya yɛ edzua lɛ. Bukusi ɛŋakɔ nɛ petee gɛ lɛ Kpaya yɛ edzu ɛlɛ.

² Nɛ kɛlɛm nɛɛ, anɔɔ nɛ gɛ alɔ kititi nɛ kabhaŋɛŋɛa lɛ nɛ shu enu anɔ gɛ alɔ kititi nɛ kɛdɔnɔ nɛ gɛ Kpaya edzu nɛ shu, klɛ banɔ nɛ gɛ ba bhɛtɛ ana nɛɛ ba ba mɛna kebhuikukulu kɔ balɛ nahwɛ shua.

³ Alasɛ bagɛ ba ŋa kabha ne di vunɔ kanya kanyaka kɔ bagɛ abhɛtɛ kɛdzyɔgo, pɔ kɔ bagɛ babhɛtɛ kizizi. Ɔpɛ sɛ tɛ kifu taa za wɔm nɛ aanɔ nɛ gɛ aŋɛabha? Kɛlɛ alɛ bhɛtɛ kɛgɛ bɔ klɛ aba kpɛ wɔ nɛa bha.

⁴ Alasɛ yɛ enu Kpaya axwɛdɛ gɛ aba bhɛtɛ wɔ mɔmɔ. Pɔ onu gɛ ɔbhɛtɛ kizizi, sii fu, alasɛ edi vunɔ kɛpamɛ nɛ tite ko. Yɛ enu Kpaya axwɛdɛ, gɛ evunɔ Kpaya obulo sɛ tɛ amɛna butɔtɛtɛta kɔ agɛ abhɛtɛ kizizi.

⁵ Klɛso, ki bisi sɛ tɛ ozhinɔ ishuesi kɔ bagɛ ba ŋɛabha, anɛ sɛ butɔtɛtɛta tite so pɔ alasɛ kana gɛ wɔ idzyi nɛm alɛ nɛ tsyɛ so.

⁶ Klɛso tsyɛ pɛ nɔ buya kadzyɔ, alasɛ bagɛ ba ŋɛabha balɛ nu Kpaya baxwɛdɛ, gɛ ba yɛkɔ balɛ kibe nɛ petee akpɛ anɔ gbɛgbanɔ mɛ.

⁷ Buya anɔnyanɔɛ bhɛ gɛ lɛ wɔshu nɛ ɔkɔ yɛ: Onu gɛ kadzyɔ alɛ wɔshu, buya kadzyɔ; onu gɛ kinu ɔdzyɔ kɛlɛ alɛ ɔdzyɔ; kinu tɛyɛyɔkɔ nɛ anɔɛbui mɛ, kɛlɛ alɛ yɛkɔ nɛ Anɔɛbui mɛ, kinu tɛkpɛkpɛ nɛabha, kɛlɛ alɛ kpɛ anɔ nɛabha.

Ɖɔ Anɔ, Alasɛ Kiwi Nɛ Tsuuba

⁸ Nɔ tɛ kɔ anɔnyanɔ kɛbhɛ za wɔnɔ shu, ɔyɛkɔdɛ ɔhayɛ ɖuɖɔɛ bhɛ, alasɛ anɔɔ nɛ gɛ aɖɔ yɛɔhayɛ nɛɛ abhɛtɛ ɔshã nɛabha.

⁹ Ɛshã nɛ sɛ, “Tɛ dɛ ɔmam,” “Ti yi anɔ,” “Ti zuru,” “Tɛ nya nɛ ɔhayɛ shu,” klɛ ɛshã kanyaka gɛ ɔzɔ bɔ za, ba yɛkɔ ɛlɛ akpɛ torikpo aɖɔ asɛ: “Ɖɔ wɔhayɛ anasɛ wɔnahwɛ shu.”

¹⁰ Tɛɖuɖɔ tɛ zi kɛdɔ nɛ ɔhayɛ shu. Klɛso nɛɛ, tɛɖuɖɔ nɛ nu ɔshã nɛa bha bhɛbhɛtɛ.

¹¹ Klɛ bhɛtɛ kɛɛnɛ sɛ no nu kibee nɛ mɛ so. Ɔɖɔ nɛ mɛ ɔna sɛ tɛ nɔ nyɛmɛ denɔ wɔnɔ tra nɛ mɛ, alasɛ bulɔ tɛyɛyɛkɛkɔ nɛ tsobunɔ lɔ ɔtsɔ̃ nɛ dɛ kana gɛ bu yɛkɛŋa putɔnɔ.

¹² Otumu nɛ ɔɔfla beke; keli nɛ kaza beke. So nɔ kɔ lɔ shɛ̃nahwɛ otumum ebui nɛ shu tɛ bu yɛkɔ kelizɛza keyuawi nɛ kpɛ.

¹³ Kɔ lɔ za nɛ ɛkpã gɛ ɛlɛshu danɛ, ansɛ kemuze mɛ lɔ lɛ, anɛ nɛ kɛdɔŋa gbɛgbla anɛ bulu bubuku mɛ, anɛ azhuzhɔlɛbui anɛ ishuabha bubugɔ mɛ, anɛ nɛ ebui wũwlãnkɛ anɛ kawɔ̃kpɛ mɛ.

¹⁴ Nɛ kɛlɛ mɛ, nɔ yɛkɔ Apalete Yesu Kristo nɛ onyumu, klɛ no tɛ bhɛtɛ kɛtɔkpum nɛ kana gɛ nɔ bɔ kpɛ buzizi mɛ tɛzɛza tɛpɛpɛɛ nɛ kabha.