Luka 22 - ONUGBÙ NYƐNYÃ VUVƆ

Yuɖasɛ Adɛmɛ Akpɛ Yesu Ahwɛ

¹ Ɔtsɔnɛ Bunamayeke Gbɛ̃gbɛvu kiwuiŋɛŋa gɛ be klu asɛ Tefɛflawui, kɛtsobunɔ,

² klɛ kpayaɔzakɔanɔ anɛ̀ eshãdɔkasɛ ba pɛɛ kidzo tili sɛ tɛ be yi Yesu alasɛ be sifu nɛ̀ banɔ.

³ Ɔkɛlɛ Satana ebe tsoku Yuɖasɛ mɛ, gɛ beklu asɛ Iskarɔtɛ gɛ enu kɛfɔntɛabha mayɛ teli.

⁴ Klɛ Yuɖasɛ avɛ kpyaɔzakɔanɔ anɛ̀ busɔlɛvu bepupo banɔ gbɛgbla nɛ ɔkɔ klɛ ada nyɛna kana gɛ aba ga gɛ aba yɛkɔ Yesu akpɛ ahwɛ.

⁵ Kɛkualɛ samɛ klɛ ba dɛmɛ sɛ ba bakɔ yɛ kɔba.

⁶ Yuɖas adɛmɛ, klɛ edi kidzoenu tɛ ayɛkɔ Yesu akpɛ ahwɛ kɔ alɛ kibenɔ gɛ banɔɛza ma.

Ɔwlago Kɛdɔŋɛŋa Gugɔɛ

⁷ Gɛ kiwui nɛ na kɔ Gbɛ̃gbɛvu Mayeke wui nɛ na gɛ kɛlɛabha ba ba yɛkɔ Tɛfɛflawi obhoshieyi nɛ egu bugu nɛ nɔ.

⁸ Yesu akpɛ Petro anɛ Yohanɛsɛ, aɖɔ sɛ, “Nɔ vɛ tɛ nɔ dɔ bala kɔ lɔ tɛ bu ŋa Tɛfɛflɛwi.”

⁹ Bebisi asɛ, “Fakɔ wɔ pɛɛ sɛ tɛ bubala kɔɛ lɛ?”

¹⁰ Ebuilɛnu asɛ, “Onugɛ nɔ tsoku ɔmagbɛgbla nɛ mɛ, anyɛ teli etuku ketsukpu nɛ buni aba tsyanɛ nɔ. Nɔ za yɛede ɔvɛ bupa nɔ nɛ mɛ gɛ etsoku,

¹¹ klɛ nɔ tsre bupaka nɛ asɛ, ‘Adɔkasɛ nɛ ebisi asɛ: Fakɔ efu ɔyakɔvu nɛ lɛ, gɛ ɛba ŋa Tɛfɛflawi nɛ̀ mɛ badɔkpasɛ?’

¹² Aba kasɛ nɔ kabhavu gbɛgbla tuli mɛ gɛ be ŋuse lu. Nɔ bhɛtɛ tɛ bɛbala nɛ ɔkɛlɛ.”

¹³ Ba vɛ ba da mɔ kɛdɔ anasɛ gɛ Yesu etsre alɛ. So ba da bala kɔ Tɛfɛflawi tɛŋɛŋa.

¹⁴ Gɛ ɔɖɔ nɛ mɛ ɔna, Yesu nɛ yɛ bakpɛkpɛ ba da za kɛwɔɛ̃ nɛ kɛ dɔ nɛ ɔŋakɔ.

¹⁵ Klɛ etsre ale se, “Ɛtrɔ gɛganɛ sɛ tɛ ɛŋa Kiwui nɛ nɔ flogo tɛ eba mɔ butɔ.

¹⁶ Alasɛ itsre nɔ sɛ ɛtɛa ŋa lɛ ɔdɔnanɛ kibɛ lɛlɛ nɛ gɛ kɛ bana nɛ́ Kpaya bukusiɔŋakɔ.”

¹⁷ Kɛlɛe de Yesu ayɛkɔ kantse, ehuahwɛ, klɛ aɖɔ sɛ, “Nɔ yɛkɛ yanɛ klɛ tɛ nɔ ya kpɛ aglɔ mɛ.

¹⁸ Alasɛ itsre nɔ sɛ ɛtɛa wɔɛ̃ vãyɛ̃ eyuyu buni nɛ di ɔdɔtɔnɔ kibe lɛlɛ nɛ gɛ Kpaya kusiɔŋakɔ nɛ ɔbɔ ba.”

¹⁹ Klɛ ayɛkɔ gbɛgbɛvu, ehuahwɛ, klɛ ayɛ yɛmɛ klɛ aɖɔ sɛ, “ Kɛɛ nɛ klɛ nu mɛ shuidzya gɛ ba kɔ nɔ, nɔ bhɛtɛ kana tɛ nɔ yɛkɔ zɔ baka mɛ bui.”

²⁰ Nɛ kidzoe lɛlɛ nɛabha ke, nɛ ɔwlago kɛdɔŋɛŋa nɛe de, ayɛkɔ kantse, klɛ aɖɔsɛ, “Kantsea nɛɛ kalɛ enu mɛ onugbu nyɛnya vuvɔ nɛ mɛ dzyosu mɛ, gɛ ba balɛ elu kɔ nɔ.

²¹ Pɔ ɔhwɛ gɛ lɔbɔ yɛ kɔ mɛ akpahwɛ, lɔ lɛ plɛnɔ mɔyɛ nɛ kɛdɔɛnɛ ɔŋa kɔ.

²² Anɔdzyrame Yi aba shɛ̃ anasɛ gɛ ba kpɛ elu, pɔ butɔ kɔ anɔ nɛ gɛ aba yɛ kɔ yɛ akpɛahwɛ.”

²³ Betenɔ ɔhaglɔ bisi sɛ balɛ mayɛ ɖueɖu ebedzi gɛ abhɛtɛ ebuia nɛ.

²⁴ Kibui wũwlãkɛ tsyɛ baku balɛ shi sɛ, ane yɛ be dzi agbɛgbladɛ.

²⁵ Yesu etsre alɛsɛ, “Bagɛ edi nu Yuɖanɛ anɛ bekusi balɛ trɔ ebui nɛ ba lɛabha, klɛ bagɛ baŋa lɛabha be klu balɛshu asɛ balɛnu Bapɛplɛnɔ.

²⁶ Pɔ ama kɔ nɔ sɛ tɛ nɔ za ana. Kɛlɛmaza, agbɛgbladɛ nɛ wunɔ mɛ edzi anasɛ anuvɔ bhlidɛ, klɛ tɛ agɛ aŋɛabha aza anasɛ agɛ adɛ axwɛ.

²⁷ So ane gɛ enu agbɛgbladɛ, agɛ alɛ kɛdɔnɔŋakɔ pɛnɔ agɛ adɛ axwɛ? Anɛ agɛ alɛ kɛdɔ nɛ ɔŋakɔ? Pɔ ɛlɛ wunɔɛshi anasɛ agɛ adɛ axwɛ.

²⁸ Wunɔ nu banɔ nɛ gɛ nɔ lɛ mɛ shu nɛ mɛ tɛfifekedi mɛ.

²⁹ Klɛ eshɛnahwɛ bukisiɔŋakɔ kɔ nɔ anasɛ gɛ mɛ Aka tsyɛ ashɛ̃nahwɛ tuli shu atrɔ mɛabha,

³⁰ sɛ tɛ nɔ bɔ ŋaɛdɔ tɛ nɔ wɔɛ̃dɔ nɛ mɛ dɔŋakɔ nɛ mɛ bukisiɔŋakɔ klɛ tɛ nɔ za bugbu abha, nɔ zɔ klubhui nɛ Izraɛl anɛ apatsu lɔfɔnɛtabha.

³¹ “Simɔn, Simɔn, Satana ebisi asɛ tɛ apɛ nɔ anasɛ amɔ.

³² Pɔ iklukpaya nɛ wunɔɛ tɔkpu, Simɔn, sɛ tɛ wɔ tɛyɛyɛkɛŋa tɛ wɔlɛ. Klɛ kibenɔ gɛ otsodzi otsyina ɔtɔ mɛ, kpɛ wɔ adzyalɛ nɛ kemi.”

³³ Ebuilɛnu asɛ, “Apalete, ɛbala sɛ buvu anɛ̀ butsi mɛ ɛba vɛ plɛnɛ wɔ.”

³⁴ Yesu ebuilɛnu sɛ, “Itsre wɔ, Petro, flogo gɛ ɔkukɔ lɔ bɔbɔ obonɛ, ɔbɔ daɛda ada tata sɛ onyi mɛ.”

³⁵ Klɛ Yesu ebisi alɛ asɛ, “Kibelɛlɛ gɛ ɛkpɛ́ nɔ gɛ ɔkpɛtɛ, kakputɔ nɛ̀ ɔtsrɛklɔ dɛ zɛlɛm, kizi dɔ tili nɛ wunɔ shu?” Be builɛnu sɛ “Kidi zi kɛdɔnyɛdɔ.”

³⁶ Yesu aɖɔ etsre alɛ sɛ, “Pɔ ɔtsɔ̃ nɛ onugɛ ɔkpɛtɛ lɛ̀ wunɔ ahwɛ, yɛkɔ lɛ, klɛ kakputɔ tsyɛ, klɛ onugɛ kɛpamɛ ma wunɔ ahwɛ, dɔ dɛ wɔ awuidzidze tɛ ɔdɔ dzi tili.

³⁷ Baɖɔ lu asɛ, ‘Klɛ ba kla yɛ akpɛ bagɛ ba bhɛtɛ ebui zizi nɛ shi’ klɛ itsre nɔ sɛ, kɛnɛ kɛlɛsɛ tɛ kɛbɛlɛmɛ nɛ mɛ shu. Ee, kɛbui nɛ gɛ ba ŋlɔmɛ nɛ mɛ shu, kɛlɛ tɛbɛba na.”

³⁸ Badɔkpasɛ nɛ aɖɔ sɛ, “Di, Apalete, bupamɛ tubha na nɛ.” Yesu aɖɔ sɛ, “Kɛ lɛ tsyɛ bɔ.”

Yesu Ede Klukpaya Nɛ Olivɛ Butu Nɛabha

³⁹ Yesu anasɛ gɛ abhɛtɛ Kibenyɛbe ekoeyi avɛ Olivɛ Butu nɛabha, klɛ yɛ badɔkpasɛ batɔnɛ yɛ.

⁴⁰ Ɔkɛlɛ nɛ tɛkuku ko, etsre alɛsɛ, “Nɔ klukpaya sɛ tɛ nɔ tɛ bɔ wɔlɛ ku tɛfifekedi mɛ.”

⁴¹ Etsodzi avɛ kede kɛklãgbu tɛtɛta tirikpo kpɛ balɛ otugba, akpla ekuisiesi klɛ eklukpaya,

⁴² “ Aka, onugɛ wɔ ɔpɛɛ, tsɛ kantsea nɛ mɛa bha; anɛ mɛ tɛpɛpɛɛ, pɔ wɔɛ yɛ abha bu ba bhɛtɛ trɔ.”

⁴³ Axwɛdɛ teli ede owũsise ebushu akasɛ yɛ klɛ akpɛ bugɛganɛ nɛ́ yɛ shui mɛ.

⁴⁴ Klɛ butɔ za yɛ abha gɛganɛ, eklukpaya gɛganɛdɛ ana, klɛ yɛ buhihe nɛ za anasɛ dzyosu gɛ awɔlɛ lu kesukpa.

⁴⁵ Gɛ alɔ de kpayakuklu nɛabha, klɛ etsodzi avɛ badɔkpasɛ nɛ ɔbha, pɔ amɔ sɛ ba vɛnɔ tra, butɔ gɛ bu tsri alɛ abha so.

⁴⁶ Ebisi alɛ sɛ, “Kideso gɛ nɔ dɔtra?” Nɔ lɔ klɛ tɛ nɔ klukpaya sɛ tɛ nɔ tɛ bɔ wɔlɛ oku tɛfifekedi mɛ.”

Bevu Yesu

⁴⁷ Kɛbelɛlɛ nɛ gɛ aza ɖɔaɖɔ banɔɛza ba be xogo, klɛ anɔ nɛ gɛ bɛ́ klu asɛ, Yuɖasɛ, Kɛfɔnɛtɛabha nɛ teli, yɛ putɔ nɔ nɛ alɛ. Etsobunɔ Yesu tɛ amukɔ yɛ onugbu.

⁴⁸ pɔ Yesu ebisi yɛ asɛ, “Yuɖasɛ, ɔyɛkɔ onugbu mumukɔ ɔkpɛ Anɔdzyrame Yi nɛ ahwɛ.”

⁴⁹ Gɛ Yesu baxwɛdɛ nɛ amɔ kɛgɛ tɛ ba, ba ɖɔ sɛ, “Apalete, bu tẽ alɛ nɛ̀ bulɔ bupa mɛ?”

⁵⁰ Klɛ balɛmayɛ teli afatɛ anɔ gbɛgbla teli yɛ axwɛdɛ kɛŋa batɔ nɛ atɛ̃.

⁵¹ Pɔ Yesu ebuilɛnu asɛ, “Oo kɛnɛ nɛdi ta ba!” Klɛ Yesu ehunɔ anyɛ nɛ batɔ klɛ ebele yɛ butɔ.

⁵² Ɔkɛlɛ Yesu aɖɔ tsre kpayaɔzakɔ, busɔlɛvu bepupo banɔ gbɛgbla anɛ̀ beshishe, gɛ ba ba sɛ tɛ bevu yɛ, “Ɛgbanɔ banɔ sɛ tɛ ɛyɛ nɔ bukusi, kɛlɛso gɛ nɔ ba nɛ bupamɛ, anɛ̀ busukpogunu?

⁵³ Kiwuinyɛwui Mɛ ɛlɛ wunɔ bha nɛ́ kpayavu nɛ mɛ, klɛ nɔ dɛ trɔ ahwɛ nɛ mɛa bha sɛ nɔ vu mɛ. Pɔ wunɔe be nɛɛ—gɛ otumu ɔŋa abha.”

Petro Atɛkenyi Yesu

⁵⁴ Be vu Yesu, ba gbanɛ yɛ ashɛ̃nɔ klɛ bayɛkɔ yɛ avɛnɔ kpayaɔzakɔanɔ ɖɛɖama nɛ bupa mɛ. Petro atɔnɔ alɛ nɛ odzroɖokɔ.

⁵⁵ Pɔ gɛ ba kpɛ fu nɛ buka nɛ kɛshitɛbha klɛ ba zaesi nɛ aglɔbha, Petro aza balɛ ɔbha.

⁵⁶ Adzɛ axwɛdɛ teli amɔ yɛ nɛ́ kɛfu nɛ shu. Etsobunɔ yɛ edi yɛ klɛ aɖɔ sɛ, “Anɔ anɛ aza Yesu ɔbha.”

⁵⁷ Pɔ adɛ lɛ. Aɖɔ sɛ “Adzɛ, ɛtɛ nyi yɛ.”

⁵⁸ Kibe bhliede, anɔ teli tsyɛ amɔ yɛ klɛ aɖɔ sɛ, “Wɔ tsyɛ onu balɛ mayɛ̃ teli.” Petro ebushunu asɛ “Anyɛ, Anɛ mɛ!”

⁵⁹ Anasɛ ɔɖa tɛta torikpo ede abhlatɔ aɖɔ tɛtɛtrɔ gɛganɛ sɛ, “Kɛgbɛagba anɔ anɛ aza Yesu ede, alasɛ enu Galilea yi.”

⁶⁰ Petro ebuilɛnu sɛ, “Anyɛ, ɛtɛ nyi kibuinyɛbui denɔ kibui nɛ gɛ ɔɖɔ nɛ shu!” Kibelɛlɛ gɛ aɖɔ kibui nɛ, ɔkukɔ nɔ bɔ.

⁶¹ Apalete etsyina klɛ edi Petro amɛ. Ɔkɛlɛ Petro abaka kɛbui nɛ gɛ Apalete nɛ aɖɔ tsre yɛ: “Flogo gɛ ɔkukɔ nɔ bɔ bɔ obonɛ, ɔbɔ dɛada ada tata nɛ mɛ shu.”

⁶² Klɛ Petro ekoeyi avɛ ɔtɔ klɛ ede biyo gɛganɛ.

Bepupo Nakpɛ Yesu Butsɔ

⁶³ Banɔ nɛ gɛ bɛ̀po Yesu betenɔ yɛ butsɔ kpɛ klɛ bɛ tu yɛ.

⁶⁴ Ba nya yɛ amɛ klɛ be bisi denɔ yɛ ɔkɔ sɛ, “Ɖɔdi! Ane yɛ hu wɔɛdɔ?”

⁶⁵ Klɛ ba ɖɔ aklatu ebui gelee bhlatɔ kɔ yɛ.

Bagbanɔ Yesu Avɛnɔ Pilato Anɛ Heroɖesɛ Ɔkɔ

⁶⁶ Nɛ kelizɛzamɛ, bamani, beditabha kpayazakɔanɔ ekusi nɛ̀, Eshã adɔkasɛ, bexogo klɛ bagbanɔ Yesu amɛna balɛ amɛ.

⁶⁷ Baɖɔ sɛ, “Onugɛ wɔ nu Kristo, Tsre lɔ.” Yesu ebuilɛnu, “Onugɛ itsre nɔ tsyɛ, nɔ tɛ bɔyɛkɛ mɛ abhaŋa,

⁶⁸ klɛ onugɛ ebisi nɔ, nɔ tɛ bɔ bushunu.

⁶⁹ Pɔ denɔ ɔtsɔ ɔvɛnɔ, Anɔdzyrame Yi aba za Kpaya gbɛgbla nɛ kɛŋa nɛ mɛ.”

⁷⁰ Balɛ petee be bisi asɛ, “Kpaya ye Yi wɔ nu?” Ebuilɛnu asɛ, “Kɛgbɛagba nɔ ɖɔ sɛ Mɛ nu yɛ.”

⁷¹ Ɔklɛ baɖɔ sɛ, “Kideso gɛ buka pɛɛ ebuimɔɖɔ? Bu nuilɛ denɔ yɛ nahwɛ onugbui mɛ.”