Hebriuanɛ 3 - ONUGBÙ NYƐNYÃ VUVƆ

Yesu Avɛ Otugbadɛ Mose

¹ Kɛlɛso ishubhubhui badzyalɛ Dzyɔgo, gɛ be klu denɔ owũsise, nɔ yɛkɔ wɔnɔɛ bui ɔtrɔ Yesu abha, anɔkpɛkpɛ anɛ Kpaya ɔzakɔanɔ gbɛgbla gɛ buyɛkɛ yɛabhaŋa.

² Abhɛtɛ atrɔ anɔ nɛgɛ eklu yɛ nɛ ebui nɛabha, anasɛ gɛ Mose abhɛtɛ atrɔ Kpaya ebui nɛabha nɛ yɛ bupa nɛ mɛ.

³ Bamɔ Yesu aŋa kedzi adɛ Mose, anasɛ gɛ evudzu aŋa kedzi adɛ buvu nahwɛ.

⁴ Alasɛ buvu nyɔvu anɔ teli yɛ dzu lɛ, pɔ Kpaya yɛ dzu kɛdɔnyɛdɔ.

⁵ Mose abhɛtɛ atrɔ Kpaya ebui petee abha nɛ yɛ bupa nɛmɛ, klɛ aɖɔ ebui nɛ gɛ la ba ba nɛ otugba.

⁶ Pɔ Yesu abhɛtɛ atrɔ ebui nɛabha anasɛ Kpaya yɛ yi nɛ yɛ bupa nɛ mɛ. Bulɔ nu yɛ bupa, onugɛ bu yɛkɔ ishu trɔ yɛabha klɛ budi yɛ dzoenu nɛ tɛyɛyɛkɛŋa.

Bagɛ Ba Dɛ Yɛkɛaŋa Nɛ Awɔ̃lulu

⁷ So anasɛ gɛ Ɔfufɔɛ Dzyɔgo nɔ ɖɔ: “Obo nɛ, onugɛ onu yɛ olimɛ,

⁸ tɛ gɛganɛ wɔnɔ dzyi anasɛ gɛ nɔ bhɛtɛ nɛ kititilɛlɔ mɛ, nɛ kibelɛlɛ gɛ tɛfifekedi za nɛ ayakpa nɛ mɛ,

⁹ ɔkɛlɛ wɔnɔ akalɛ nɛ feke mɛdi klɛ be tsyina mɛ edi klɛ nɛ agɔ afɛtalɛ̃ mɛ ba mɔ kɛdɔnɔ gɛ ɛbhɛtɛ.

¹⁰ Kɛlɛso gɛ ɛmɔ oblo nɛ tɛmumɔɛ nɛ, klɛ mɛ̀ ɖɔ sɛ, ‘Kibenyɛbe balɛ dzyi adɔ kidzo afla, klɛ be tinyi mɛ edzo.’

¹¹ So nɛ mɛ obloe mɛ ɛtanɛdɔ sɛ, ‘Be ti be tsoku mɛ omuenekɔ nɛɛ di.’ ”

¹² Badzya mɔ, nɔ di mɔ sɛ, ebuizizi, mayɛkɛŋa dzyi atɛza wɔnɔmɛayɛ nyɛmayɛ ahwɛ tɛ etsyinaede nɛ ɛkpã Kpaya shu.

¹³ Pɔ nɔ kpɛ ɛhaglɔ kemi kibenyɛbe, anasɛ gɛ be klu alɛ Obonɛ, so tɛ kizizi tɛ wɔɛ nɔ wɔnɔmɛayɛ kanyaka.

¹⁴ Bu ba sɛ tɛ bubhɛtɛ terikpo nɛ Kristo onugɛ bu nyɛna yɛ gɛganɛ ɔdɔtɔnɔ tɛbibeke anɛ tɛyɛyɛkɛŋa gɛ bunyɛna vunɔ denɔ kesikpɛkpɛ.

¹⁵ Anasɛ gɛ ba ɖɔ lu: “Obo nɛ, onugɛ nɔ nu yɛ olimɛ, nɔ tɛ gɛganɛ idzyi anasɛ gɛ wɔnɔ akalɛ lɔɛtiti nɛ Kpaya shu.”

¹⁶ Bane balɛ nu bagɛ be nui bui klɛ balɔɛtiti nɛ kɛlɛ shu? Ganɛ ba gɛ balɛ petee Mose agbanɔ ekoeyi nɔ nɛ Egipte?

¹⁷ Klɛ bane shu amɔ oblo agɔ afɛtalɛ̃? Ganɛ ba gɛ ba bhɛtɛ buzizi, gɛ betsi nɛ ayakpa nɛ mɛ?

¹⁸ Klɛ bane Kpaya atanɛdɔ akpɛ sɛ beti betsoku kɛsukpa gɛ akɔ alɛ sɛ tɛ be muene onugɛ odunu sɛ bagɛ ba dɛ tatɔ?

¹⁹ So bu mɔ sɛ ba dɛna tsoku, alasɛ ba dɛ yɛkɛŋa.