Filipianɛ 4 - ONUGBÙ NYƐNYÃ VUVƆ

¹ Kɛlɛso, madzyalɛ mɔ, wɔnɔ bagɛ ɛdɛmɛnɛnɔ klɛ ɛpɛɛ sɛ tɛ ɛmɔ nɔ, mɛ same anɛ ekusikutu, mɛ ɛbhɛyalɛ mɔ kana kɛlɛ sɛ nɔ za gɛganɛ nɛ́ Apalete nɛ mɛ.

Ahwɛhuhu Anɛ Kpayakuklu

² Ɛkpɛtɔpuesi kɔ nɔ Ewudia klɛ ɛkpɛtɔkpuesi kɔ Sintitsyi tɛ nɔ dɛmɛ nɛ ɔhaglɔ anɛ́ Apalete nɛ mɛ.

³ Ee, klɛ ibisi wɔ, mɛ abhla mumɔa, plɛnɔ badzɛ nɛ gɛ ba wa xwɛ nɛ́ mɛ kɔ kibui dzyɔgo tɛ ɖɛɖɔ, nɛ Klɛmɛt anɛ mɛ baxwɛwa gugɔɛ, gɛ balɛ enyi akpasɛ ɛkpãe plukpa nɛ mɛ.

⁴ Nɔ mɔ same nɛ́ Apalete nɛ mɛ kibenyɛbe. Ɛka baɖɔ lɛ sɛ: Nɔ mɔ same!

⁵ Kɔ nɔ tɛyɛyɔ dzi kibui ɖɛɖɔ kɔ anɔnyanɔ. Apalete tɛbɛba tsyobunɔ.

⁶ Tɛ kɔ wɔnɔ idzyi ahwa nɛ kɛdɔnyɛdɔ shu, pɔ nɛ kibuinyɛbui mɛ, kpayakuklu anɛ tɛbibisi, anɛ ahwɛhuhu, kɔ wɔɛdɔ bibisi vɛ Kpaya kɔ.

⁷ Klɛ Kpaya ishuyuyɔ, gɛ kɛdɔfla ebuiesinunu petee, kɛ ba po wɔnɔ idzyi anɛ wɔnɔ atɔkpu mɛ nɛ́ Kristo Yesu mɛ.

⁸ Gɔgɔɛ, badzya mɔ, kɛgɛ nu kɛgbɛagba, kɛgɛ gbɛgbla, kɛgɛ kɛlɛ nu kɛdzyɔgo, kɛgɛ kɛlɛ shu bhui, kɛgɛ kɛlɛ nu anɔɛ bui dɛdɛmɛnɔ, kɛgɛ kɛɛ pudi--onugɛ kɛdɔ tili pɛɛ̃ ɔdɔgɔsɛ kɛlɛ gɛ ba ba kpɛ nɛa bha--bhɛtɛ alɛlɛ nɛɛ di kɛtɔkpu mɛ.

⁹ Kɛdɔnyɛdɔ gɛ ɔtɛ kpasɛ ɔdɔgɔsɛ ɔyɛkɛ ɔdɔgɔsɛ onu denɔ mɛ ɔkɔ, ɔdɔgɔsɛ ɔmɔ nɛ mɛmɛ--yɛkɔ kɛlɛ ɔkpɛ tɛbhɛbhɛtɛ mɛ. Klɛ ishuyuyɔ Kpaya aba za plɛnɔ nɔ.

Ahwɛhuhu Kɔ Balɛ Kɛdɔkukɔ

¹⁰ Ɛmɔ same gelee nɛ Apalete nɛ mɛ sɛ kɛ gɔgɔɛ nɔ kasɛ sɛ nɔ yɛkɔ kibui tili nɛ mɛ buiɛ mɛ. Kɛgbɛagba, nɔ yɛkɔ kibui nɛ mɛ kibui mɛ, pɔ nɔ dɛ mɔ kɛdzo tɛ nɔ builɛ ɔkasɛ.

¹¹ Ɛtɛ ɖɔ kibuinɛ alasɛ ɛpɛɛ dɔ so, pɔ alasɛ ɛtɛ mɔ sɛ kɛ gɛ lɛ mahwɛ kɛkumawɔ̃ nɛ kɛkanyaka di gɛ kɛ zɛ dzyɔ.

¹² Inyi kɛdɔnɔ gɛ kɛ nu sɛ tɛ ɔpɛɛ dɔ, klɛ inyi kɛdɔnɔ nɛ gɛ kɛ nu sɛ kɛdɔ za wɔ ahwɛ gelee. Ɛkpasɛ kibui kpukpu nɛ kɛ dɔ kukuawɔ̃ kɛkanyaka nɛ̀ kɛdzonyɛdzo abha, kibenɔ nɛ gɛ ba kɔ mɛ ŋa xwui ɔdɔgɔsɛ bubhɛyimɛ, kɛdɔ gelee ɔdɔgɔsɛ ɛpɛɛ dɔ.

¹³ Ɛbana kɛdɔnyɛdɔ bhɛtɛ ganɔ yɛ abha agɛ akɔmɛ bugɛganɛ.

¹⁴ Pɔ kɛnu kɛdzyɔgo nɛ nɔ sɛ nɔ plɛnɔ nɛ mɛ butɔ nɛ mɛ.

¹⁵ Ɔyɛkɔdɛana, anasɛ wunɔ Filipianɛ nɔ nyi, nɛ ewui tɛtɔpu nɛ mɛ gɛ nɔ ti kibui dzyɔgo, gɛ ɛshɛ nɛ Makedonia, busɔlɛha torikpo tsyɛ dɛ bhɛtɛ kɛdɔkukɔ nɛ kɛdɔyɛyɛkɔ nɛ kibui nɛ mɛ ɔyɛkɔ dɛ wɔ ko,

¹⁶ alasɛ gɛ ɛza Tɛsalona, nɔ sɛsɛ mɛ dɔ, asɛsɛ tabha kɛbelɛlɛ gɛ ɛpɛɛ dɔ.

¹⁷ Ganɛ sɛ ɛpɛɛ kɛdɔkukɔ, pɔ idi kɛdɔnɔ nɛ gɛ ba ba yɛkɔ ata kɔ wɔ.

¹⁸ Ɛtɛ yɛkɛ kɛbhɛbubuya nɛna, klɛ ɔyɛkɔdɛ kuratsyɛ, ɔtsɔ̃nɛ gɛ ɛtɛ yɛkɔ dɔ gɛ nɔ sɛsɛ mɛ denɔ Epafroditu abha. Kɛdɔ nɛ nu anasɛ buŋa nɛ tã gɛ ku Kpaya awɔ̃.

¹⁹ Klɛ mɛ Kpaya aba kɔ nɔ wɔnɔɛ dɔ petee gɛ nɔ pɛɛ, nɛ yɛ ishubhubhui ehoeyi aganɔ Kristo Yesu abha.

²⁰ Ba bakpɛ bulɔ Kpaya anɛ Aka nɛ nyi nɛabha denɔ mabeke mabeke mɛ. Kɛbɛlɛmɛ.

Tɛsɛsɛnɔ Gɔgɔɛ

²¹ Sɛnɔ kpayabanɔ nɛ petee nɛ Kristo Yesu kinyi mɛ. Madzyalɛ gɛ balɛ mɛ ɔbha ba sɛnɛ nɔ.

²² Kpaya banɔ nɛ petee ba sɛnɛ nɔ, kɛgɛlɛdɛ bagɛ balɛ Kaizaro bupa nɛ mɛ.

²³ Apalete Yesu Kristo kɛdɔkukɔ kɛ za plɛnɔ wɔnɔ ɔfufɔɛ. Tɛlɛbɛlɛm.