Axwɛwɛwa 9 - ONUGBÙ NYƐNYÃ VUVƆ

Saolo Tɛ Tsyitsyina

¹ Nɛ kibee nɛ mɛ, Saolo eke tsri yɛ kɛtɔkpum gɛganɛ anɛ tɛkɛka kɔ Apalete nɛ badɔkpasɛ nɛa bha. Atɔnɔ kpayanɔgbla na vɛ

² klɛ ede bisi sɛ ba kɔyɛ keplukpa tɛ ayɛkɔ evunɔ avɛnɔ oxogokɔevu nɛm nɛ Damaskosɛ, sɛ tɛ onu gɛ amɔ teli nɛ ɔklɛ gɛ alɛ Kidzo nɛede, onu banyɛo badzɛo, tɛ evua lɛ ansɛ bevuza tɛ ayɛkɔ vɛnɔ Yerusalɛm.

³ Gɛ etsobunɔ Damaskosɛ nɛ yɛ kidzo nɛa bha, kɛbhɛtɛ tili ko kifu tili de owũsise bu ɔlɛklɛmɛ ɔkana yɛ.

⁴ Awɔlɛ adɔ kesukpa klɛ enu oli toli mɛ gɛ otsre yɛ ɔsɛ, “Saolo, Saolo, kide so pɛ ɔkpatɔnɔ mɛ?”

⁵ Saolo ebisi asɛ, “Wonu ane, Apalete?” Etsre yɛ asɛ, “Mɛ nu Yesu, nɛ gɛ ɔɔkpatɔnɔ.”

⁶ “Ɔtsɔ̃ nɛɛ lɔ tɛ ɔvɛ ɔmagbla nɛm, klɛ be be tsre wɔ kɛdɔnɔ nɛ gɛ alasɛ tɛ ɔbhɛtɛ.”

⁷ Banɔ nɛ gɛ ba ga kidzo nɛ Saolo nɛ awɔ ɔkɛlɛ nɛ kaɖɔ maɖɔmaɖɔ. Bee nu oli nɛm pɔ ba dɛ mɔ anɔnyanɔ.

⁸ Saolo evualɔ nɛ kesukpa, pɔ gɛ adanɛ yɛ awɔ̃hũ adɛ mɔ kɛdɔnyɛdɔ. So ba nyɛna yɛ ahwɛ klɛ la gbanɛ yɛ avɛnɔ Damaskosɛ.

⁹ Alasɛ epu awɔ̃hũ ewi tata, klɛ adɛ ŋa kɛdɔnyɛdɔ ɔdɔgɔsɛ awɛ̃ kɛdɔnyɛdɔ.

¹⁰ Nɛ Damaskosɛ nɛ adɔkpasɛ teli aza klɛ gɛ be kulu asɛ Ananiasɛ. Apalete nɛ da wɛ̃ nɛ yɛ kɛdɔ mumɔm, klɛ eklu yɛa sɛ, “Ananias!” Adɛmɛ asɛ, “Ee, Apalete.”

¹¹ Klɛ Apalete nɛ etsrea sɛ, “Vɛ Yuɖasɛ bupa mɛ nɛ Kidzo Dzyudzyɔ nɛa bha tɛ obisi anɔ teli gɛ ede Tarusɛ gɛ yɛ kinyi nu sɛ Saolo, alasɛ ezee klukpaya.

¹² Nɛ kɛdɔmumɔ mɛ atɛ mɔ anyɛ teli gɛ beklu asɛ Ananiasɛ gɛ aba trɔ ahwɛ nɛa bha sɛ tɛ yɛ awɔ̃hũ na danɛ.”

¹³ Ananiasɛ adɛmɛ asɛ, “Apalete,” “Ɛtɛ nu ebui gele denɔ anyɛa nɛ shu nɛ kɛdɔ nɛ gɛ eti zi nɛ wɔ banɔ nɛ gɛ balɛ shu dana nɛ Yerusalɛm.

¹⁴ Klɛ aba ɔkɛ̃ nɛ kabhaŋɛŋa denɔ kpayanɔgbla nɛ ɔkɔ sɛ tɛ ebe vu anɔnyanɔ gɛ eklu wɛ nyi.”

¹⁵ Pɔ Apalete nɛ etsre Ananiasɛ asɛ, “Vɛ! anya nɛɛ enu mɛ kɛɖaŋudɔ gɛ eklu sɛ tɛ aba yɛkɔ mɛ kinyi nɛ avɛnɔ bagɛ ede nu Yuɖanɛ anɛ balɛ bekusi anɛ Izraɛlanɛ.

¹⁶ Ɛba kasɛ yɛ kana gɛ kɛ lɛ sɛ tɛ atɔ ebunɔ nɛ mɛ kinyi nɛ tɔkpu.”

¹⁷ Klɛ Ananiasɛ avɛ bupa nɛ shu klɛ etsoku bulɛ mɛ. Atrɔ ahwɛ nɛ Saolo abha, klɛ aɖɔ sɛ, “Adzya Saolo, Apalete—Yesu nɛ gɛ awɛ̃ nɛ wɔ amɛ nɛ kidzo nɛm gɛ ɔɔba ɔkɛ̃nɛ—akpɛ mɛ asɛ eba bhɛtɛ wɔ tɛ otsodzi ɔzɔ mɔ tɛ oyuku nɛ Ɔfufɔɛ Dzyɔgo.”

¹⁸ Ɔkɛlɛ nɛ ko, kɛdɔ tili kpa ansɛ aklɔ awɔlɛ nɛ Saolo awɔ̃hũ nɛa bha, klɛ aza kpa mɔ. Evua lɔ klɛ ba kpɛ buni akɔɛ,

¹⁹ klɛ nɛ lɛe de gɛ aŋa kɛdɔ, etsodzi amɔ yɛ ishum gɛganɛ. Saolo aŋa ewi gelee nɛ badɔkpasɛ nɛ Damaskosɛ.

Saolo Ede Ku Damaskosɛ Nɛ Yerusalɛm

²⁰ Tsɛɔ̃ ko Saolo agbla kpa Kpayɛbui nɛ ɖɔ nɛ oxogokɔ bevugbla nɛm asɛ Yesu yɛenu Kpaya yɛ Eyi.

²¹ Banɔ nɛ petee gɛ be nu yɛ Kpaya kibui ɖuɖɔ nɛ kɛbhɛtɛa lɛ kibi klɛ be bisi asɛ, “Ganɛ anya nɛ ya kpatɔnɔ banɔ nɛ ge klu kinyii nɛ Yerusalɛm nɛ naa? Ganɛ yɛ atɛ ba ɛkɛ nɛ ebe vu banɔ na vɛnɔ kpayanɔgbla nɛ akɔ buvu kpɛkpɛ?”

²² Tsyɛ Saolo bushe ko eshe nɛ kemim klɛ yɛ tɛbhɛbhɛtɛ nɛ bhɛtɛ Yuɖanɛ nɛ gɛ ba lɛ Damaskosɛ nɛ kibi sɛ edzi bu akasɛ asɛ Yesu yɛ enu Kristo.

²³ Nɛ ewi gelee de, Yuɖanɛ na da nya nɛ yɛ shu sɛ tɛ be yi,

²⁴ pɔ nɛ Saolo ebe ti balɛ tɛtɛtrɔ. Elishi nɛ kemuze petee be po ɔmagbla nɛ budunu sɛ tɛ bamɔɛ tɛ be yi yɛ.

²⁵ Pɔ, yɛ bedeza nɛ feke yɛ akpɛ kashɔm klɛ be zhinɔ yɛ aganɔ kidri ozi tolim ebu eyinɔ.

²⁶ Gɛ Saolo ebe ku Yerusalɛm nɛɛ, edi sɛ tɛ etsoku badɔkpasɛ nɛ kishi, pɔ be si kifu nɛ yɛ shu, ba taa yɛkɛ aŋa kɛgbɛagba sɛ enu adɔkpasɛ.

²⁷ Pɔ Banabasɛ agbanɛ yɛ klɛ ayɛkɔ vɛnɔ banɔkpɛkpɛ nɛ ɔkɔ. Etsre alɛ kana gɛ Saolo aaga kidzo nɛ pɛ amɔ Apalete klɛ Apalete nɛ aɖɔ kaɖɔ etsre yɛ, nɛ kana gɛ ada ɖɔ Kpaya kibui nɛ Damaskosɛ nɛ kifu masimasim nɛ Yesu kinyim

²⁸ Klɛ so Saolo aza plɛnɔ balɛ klɛ aaga nɛ kifu masimasim nɛ Yerusalɛm, aaɖɔ kaɖɔ nɛ kite nɛ Apalete nɛ kinyim.

²⁹ Aaɖɔ kaɖɔ klɛ ebu ebuim nɛ Griki Yuɖanɛ, pɔ baa pɛɛ kidzo sɛ tɛ be yi yɛ.

³⁰ Gɛ badzya nɛ nu kibui nɛɛ, bagbanɔ yɛ ezhinɔ avɛnɔ Sizeria klɛ ba yɛkɔ yɛ asɛsɛ Tasusɛ.

³¹ Klɛ busɔlɛha nɛ Yuɖia, Galelia anɛ Samaria petee ba za ishu yuyɔm. Busɔlɛɔha nɛ ɔgɛganɛ ɔtrɔ; klɛ Ɔfufɔɛ Dzyɔgo nɛ lɔ kpɛ alɛ kemi, lo she nɛ tikpikpem, ba za nɛ kifusisim kɔ Apalete.

Eneasɛ Anɛ Dɔkasɛ

³² Gɛ Petro aaga nyɔ nɛ kɛmadi nɛ mɛ, avɛ banɔnɛna nɛ ɔbha nɛ Lidda.

³³ Ɔkɛlɛ ada mɔ anyɛ teli gɛ be kulu asɛ Eneasɛ, gɛ awɔesukpa nɛ oputsoa bha agɔ tasuɔɛ.

³⁴ Petro etsre yɛ asɛ, “Eneasɛ, Yesu Kristo ebeke wɔ bunya. Lɔ tɛ ɔyɛkɔ wɔ oputso.” Ɔkɛlɛɔlɛlɛ nɛ ko, Aeneasɛ evua lɔ.

³⁵ Banɔ nɛ petee ga lɛ Lidda anɛ Sharonɛ na mɔ yɛ klɛ be tsyina amɛ atɔnɔ Apalete.

³⁶ Nɛ Yoppa adɔkpasɛ teli aza ɔkɛlɛ gɛ be klu asɛ Tabita (gɛ onu be bu kɛlɛesi nɛɛ, kinu sɛ Dɔkasɛ) gɛ kɛdzyɔgo ko aabhɛtɛ aplɛnɔ betsyutsyuini.

³⁷ Nɛ kibe lɛ nɛmɛ aba dɔ bunya klɛ etsi, klɛ be ŋuse yɛ klɛ ba yɛkɔɛ ede lu kabhavu tulim.

³⁸ Lidda etsoebunɔ Yoppa; so gɛ badɔkpasɛ nɛ nu sɛ Petro alɛ Lidda nɛɛ ba kpɛ banɔ tɛa bha nɛ yɛesi klɛ betsrea sɛ, “Bu dzu kɛtɔkpue si kɔ wɔ ba ɔtsɔtsiɔ̃!”

³⁹ Petro avɛ plɛnɔa lɛ, klɛ gɛ bede ku ba gbanɔ yɛ avɛnɔ kabhavu nɛm. Badzɛ banyɛtsi nɛ petee beli kititi akana yɛ, nɛ iyuyo klɛ ba yɛkɔ bawi nɛ apɔtɛ gɔgɔɛ nɛ gɛ Dɔkasɛ akamɛ nɛ kibe lɛ gɛ aka lɛ balɛ ɔbha nɛ akasɛ.

⁴⁰ Petro akɛka balɛ petee ebu nɛ buvu nɛm, klɛ ezhiakpla nɛ ekoeyisia bha klɛ eklukpaya. Gɛ etsyina tɔ adzɛ tsitsi nɛɛ, aɖɔa sɛ, “Tabita, vu ɔlɔ.” Adanɛ yɛ awɔ̃hũ, klɛ gɛ amɔ Petro alɔ aza.

⁴¹ Anyɛna yɛ ɔhwɛ klɛ aplɛnɔ yɛ alɔ za nɛ yɛ ɛtsrɛa bha. Klɛ eklu bagɛ bayɛkɛŋa anɛ banyɛtsi klɛ ayɛkɔ yɛ akpɛ ahwɛ kɔa lɛ elulu.

⁴² Kɛba dzi kibui titi nɛ Yoppa petee, klɛ banɔ gelee ba yɛkɛaŋa nɛ Apalete nɛm.

⁴³ Petro aza Yoppa kɔ kibe tili nɛ anyɛ teli gɛ akamɛ buzaplukpa gɛ beklua sɛ Simɔnɛ ɔbha.