Axwɛwɛwa 3 - ONUGBÙ NYƐNYÃ VUVƆ

Petro Ebeke Kɛkpata Adɔbisi Nɛ Bunya

¹ Kiwi tirikpo nɛɛ Petro anɛ Yohanɛsɛ baa vɛ busɔlɛvu nɛm nɛ Kpaya kiklube, nɛ kemuze ɛɖa tɛtam.

² Nɛ ɔkɛlɛ be tuku kɛkpata tili gɛ ba mɔɛ yɛ ana nɛ ayɛkɔ ebe lu busɔlɛvu nɛ kedunu gɛ be klu asɛ Kɛdɔpupudi, ɔklɛ bee dzu yɛ kiwinyɛwi pɛ ebisi kɛdɔ banɔ nɛ gɛ etsoku busɔlɛvu nɛ mɛ.

³ Gɛ amɔ Petro anɛ Yohanɛsɛ gɛ ba be tsoku busɔlɛvu nɛ mɛ, ebisi balɛ asɛ bakɔ yɛ kɔba.

⁴ Petro edi kɛkpata nɛ amɛ, ansɛ gɛ Yohanɛsɛ tsyɛ abhɛtɛ. Klɛ Petro aɖɔ asɛ, “Di bulɔ!”

⁵ So, anyɛ nɛ etsyinatɔ alɛ, nɛ kidzoenu didi sɛ aba yɛkɛ kɛdɔ tili edenɔ balɛ ɔkɔ.

⁶ Petro efeke aɖɔ asɛ, “Sɛkafufu ɔdɔgɔsɛ adzɛdzã ama mahwɛ, pɔ kɛgɛ lɛ mahwɛ nɛ mɛ ɛba kɔ wɔ. Nɛ Yesu Kristo Nazarɛtɛ eyi nɛ kinyi mɛ, lɔ ga.”

⁷ Petro anyɛna yɛ kɛŋahwɛ, klɛ efeke yɛ edzu, klɛ ɔkɛlɛ nɛ ko, bugɛganɛ ku kɛkpata nɛ ɛtsrɛ anɛ butsrukpɔ oli nɛm.

⁸ Alɔtɛ̃ nɛ yɛ butsrukpɔ nɛa bha klɛ akpaa ga. Klɛ etsoku busɔlɛvu nɛm nɛ balɛ, akpaa ga klɛ alɔtɛ̃, klɛ akpɛ Kpaya nɛa bha.

⁹ Gɛ banɔ na mɔɛ pɛ aga pɛ akpɛ Kpaya nɛa bha nɛɛ,

¹⁰ banɔ na mɔ anyɛ klɛ ba kpɛ yɛ kɛxawũ asɛ yɛ edzi anyɛ nɛ gɛ aaza pɛ ebisi dɔ nɛ busɔlɛvu nɛe dunu gɛ be klu asɛ Kɛdɔpupudi, kɛbhɛtɛ alɛ bi anɛ kibuiyiyinɔanɔ gɛ ba anyɛ nɛa bha.

Petro Aɖɔaɖɔ Etsre Babhaza

¹¹ Nɛ kibe lɛ nɛ gɛ kɛkpata nɛ ta plɛnɔ Petro anɛ Yohanɛsɛ nɛɛ, kɛ bhɛtɛ banɔ nɛ petee kibi klɛ ba kpatɔnɔa lɛ avɛ ɔkɔ toli gɛ beklua sɛ Salomo Kagbaesi.

¹² Gɛ Petro amɔ kibui, etsre balɛ asɛ, “Izraɛlanɛ mɔ, kide so pɛ kibui nɛ bhɛtɛ wɔnɔɛ bi? Kide pɛ noo yele lɔ ansɛ kɛdɔ gɛ bulɔ nahwɛ kemim ɔdɔgɔsɛ ɔfufɔɛ mɛzɛza nu lɔ yɛkɔ bhɛtɛ anyɛ nɛ pɛ aga?

¹³ Abraham Kpaya, Isaka anɛ Yakɔpu, bulɔa ka lɛ Kpaya, nɛ atɛ danɛ yɛ axwɛdɛ Yesu shu. Nɔ yɛkɔ yɛ ɔkpɛ ahwɛ kɔ sɛ tɛ be yi, klɛ nɔ shɛ̃nahwɛ yɛ shu nɛ Pilato amɛ, nɛ kibe lɛ gɛ yɛ apɛa sɛ tɛ akɔ yɛ kidzo tɛ aga vɛ flogo.

¹⁴ No tsyri Anɔnɛna anɛ Adzyɔgo klɛ no bisi sɛ ba shɛnahwɛ anɔkpã gɛ eyi anɔ nɛ shu kɔ nɔ.

¹⁵ No yi anɔ nɛ gɛ akɔ ɛkpã, pɔ Kpaya ebu yɛ edenɔ be tsitsi nɛ kishi. Bulɔ nahwɛ dzi bebuimɔɖɔ kɔɛ lɛ.

¹⁶ Ganɔ tɛyɛyɛkɛŋa nɛ Yesu kinyim nɛɛ, anɔa nɛ gɛ nɔɔ mɔ klɛ no nyi nɛɛ ba bhɛtɛ yɛ agɛganɛ. Yesu kinyi nɛ tɛyɛyɛkɛŋa nɛ gɛ de yɛm koeyi nɛɛ klɛ kɔ yɛ bunya nɛ beke, ansɛ gɛ wɔnɔ petee ɔmɔ.

¹⁷ “Badzya mɔ, ɔtsɔ̃ nɛɛ, ɛmɔ sɛ ganɔ matimatim nɔ bhɛtɛ kana, ansɛ gɛ baga gbanɔ nɔ tsyɛa bhɛtɛ.

¹⁸ Pɔ kana Kpaya abhɛtɛ kɛgɛ atɛ ɖɔ elu ganɔ batɔnu nɛ peteea bha, sɛ yɛ Kristo nɛ aba tɔ.

¹⁹ No tsyina kitem, tɛ no tsyina amɛ ɔtɔnɔ Kpaya, sɛ tɛ be xule wɔnɔ buzizi, tɛ kimuenebe ba kɔnɔ denɔ Apalete nɛ ɔkɔ,

²⁰ klɛ sɛ tɛ asɛsɛ Yesu Kristo, nɛ tsyɛ gɛ eti bu kɔ nɔ.

²¹ Alasɛ tɛ aza owũsise ɔdɔ nanɔ kibe lɛ gɛ kɛ ba ba kɔ Kpaya sɛ tɛ etsodzini kɛdɔnyɛdɔ ana dzu, ansɛ gɛ aɖɔ elu kuku ganɔ yɛ batɔnu nɛna nɛa bha.

²² Alasɛ Mose aɖɔ sɛ, ‘Apalete wɔnɔ Kpaya nɛ ebe bu atɔnu ansɛ mɛ ana edenɔ wɔnɔ nahwɛ banɔm, gɛ alasɛ tɛ nɔ ta tɔ nɛ kibuinyɛbui gɛ etsre nɔ.

²³ Anɔnyanɔ gɛ atɛ ba ta yɛ batɔ nɛ be bu yɛ atɛɛ petee nɛ yɛɔhayɛalɛ shi.’

²⁴ “Ɔpɛɔdɛmɔ wɔnɔ nu, batɔnu nɛ petee gɛ aza denɔ Samuɛlɛ abha ɔyɛkɔ vɛnɔ, ansɛ gɛ be gelee aɖɔ nɛɛ, ba tɛ ɖɔ ewia nɛdi elu.

²⁵ Klɛ wɔnɔ nu be yi kɔ batɔnu nɛ onugbu nɛ gɛ wɔnɔ akashishe alɛ nɛ ba nya nɛ Kpaya. Etsre Abraham asɛ, ‘Ganɔ weyi mumɔa bha ba ba yula banɔ nɛ petee nɛ kesukpa nɛa bha.’

²⁶ Gɛ Kpaya efeke yɛ axwɛdɛ nɛ, ebhuso yɛ asɛsɛ wɔnɔ sɛ tɛ aba yula nɔ ganɔ wɔnɔ tɛ tsyitsyina anɛ wɔnɔ atɔkpum edzokpã nɛa bha.”