3 Yohanɛsɛ 1 - ONUGBÙ NYƐNYÃ VUVƆ

¹ Denɔ Eshishe nɔ ɔkɔ, Kɔ mɛ ɔbhɛya mumɔa Gaius, gɛ yɛ mɛ dɛmɛnɔ nɛ kɛgbɛ mɛ.

² Ɔbhɛya mumɔa, ɛklukpaya sɛ tɛ ɔza nɛ ɛkpã gɛganɛ klɛ tɛ kɛkanyaka vɛ lɛabha mɔmɔ kɔ wɔ anasɛ gɛ wɔɛ tɔwui nɛ tsyɛ lɛ mɔmɔ.

³ Kɛ ku mɛ same gɛganɛ sɛ badzya teli ba tsre mɛ edenɔ wɔ tɛyɛyɛkɛŋa kɔ kibui gbɛagba anɛ̀ kana gɛ nɔ ga nɛ́ kibuigbɛagba mɛ.

⁴ Kibuinyɛbui dɛ kpɛ mɛ same gbɛgbladɛ sɛ inu sɛ me yialɛ ba ga nɛ kibui dzyɔgoɛ mɛ.

⁵ Ɔbhɛya mumɔa, tɛyɛyɛkɛŋa lɛ wɔ ahwɛ nɛ kɛdɔ nɛ gɛ ɔbhɛtɛ kɔ badzya, kɛlɛlɛmɛ tsyɛ sɛ be nu befu kɔ wɔ.

⁶ Be tɛ tsre busɔlɛɔha denɔ wɔ tɛdɛdɛmɛnɔ. Nɔ bɔ bhɛtɛ mɔmɔ tɛ nɔ plɛnɔ alɛ tɛ ba vɛ balɛ kidzogɛga nɛabha nɛ kɛgɛ baku Kpaya awɔ̃.

⁷ Kinyi nɛ so gɛ ba tɔnɔɛ dzo ekoeyi, gɛ ba dɛ yɛkɛ kɛdɔnyɛdɔ nɛ bagɛ be dinu Kristo ayɛ na hwɛ.

⁸ Kɛlɛso kɛlɛsɛ tɛ bu kasɛ ɛyɛmɛyɛyɔ kɔ banɔ alɛlɛ nɛɛ di sɛ tɛ bu ba na kɛxwɛ wa kpɛetsu kɔ kibuigbɛagba.

⁹ Ɛŋlɔmɛ keplukpa kɔ busɔlɛɔha, pɔ Diotrefɛse, gɛ anawɔ̃ faã sɛ tɛ edzi atɛtɔpu, adɛ pɛɛ sɛ tɛ abhɛtɛ kibuinyɛbui nɛ lɔ.

¹⁰ Kɛlɛso onugɛ ɛba ba, ɛba kɔ nɔ ti kɛgɛ abhɛtɛ, itro ebui kpã ɖɛɖɔ nɛ bulɔ shu. Kɛlɛ lɛ nɛ dɛ xui yɛ, atɛ yɛkɛ yɛ adzyalɛ. Adzrɔ nɛ bagɛ ba pɛɛ asɛ tɛ ba yɛkɛ banɔ klɛ ebualɛ nɛ busɔlɛɔha nɛ mɛ.

¹¹ Ɔbhɛa mumɔa, tɛ kpasɛ kibui kpã bhɛbhɛtɛ pɔ kɛgɛ nu kɛdzyɔgo. Anɔnyanɔ gɛ abhɛtɛ kɛ gɛnu kɛdzyɔgo ede Kpaya kɔ. Anɔnyanɔ gɛ abhɛtɛ kɛgɛ nu kizizi atɛ mɔ Kpaya.

¹² Anɔnyanɔ aɖɔaɖɔ dzyɔgo nɛ Demetrio shu-klɛ kibuigbɛagba nahwɛ tsyɛ ɖɔ. Bulɔ tsyɛ bu ɖɔ yɛ bui dzyɔgo, klɛ no nyi sɛ bulɔ kibuiɖuɖɔ denɔ yɛ shu kinu kɛgbɛagba.

¹³ Ebui gelee la lɛ gɛ ɛba ŋlɔmɛ sɛsɛ nɔ, pɔ ɛdɛ pɛɛ sɛ tɛ ɛbhɛtɛ lɛ nɛ̀ kɛdɔŋlɔ̃mɛshi anɛ buni.

¹⁴ Ididzoenu sɛ ɛba mɔ nɔ kpata, klɛ bu ba ɖɔaɖɔ amɛ nɛ amɛ. Nɔ za mɔ. Ɛbhɛya gɛ lɛ ɔkɛnɛ sɛnɛ nɔ sɛsɛ. Sɛnɛ ɛbhɛya nɛ gɛ lɛ ɔkɛlɛ kɔ mɛ