2 Petro 1 - ONUGBÙ NYƐNYÃ VUVƆ

¹ Mɛ Simɔn Petro, Yesu Kristo axwɛdɛ anɛ̀ anɔkpɛkpɛ, Ɛŋlɔmɛ keplukpa anɛ akɔ bagɛ ɔganɔ kɛdzyɔgo bhɛbhɛtɛ bulɔ Kpaya anɛ Yesu Kristo gɛ ebhulɔayɛkɛ atɛ mɔ tɛyɛyɛkɛŋa ŋɛŋaedzi anasɛ bulɔ yɛ.

² Ɛyamyuyɔ anɛ̀ ishuyuyɔ dzi wũnɔɛyɛ nɛ́ tɛkpikpe mɛ ganɔ Kpaya anɛ̀ Yesu bulɔ Apalete kibuititi abha.

Anɔ Tɛkuklu Nɛ Tɛbubu Tɛbhɛbhɛtɛ Kɛklãgbutɛtrɔ

³ Kpaya kemi ka kɔ lɔ kɛdɔnyɛdɔ gɛ bu pɛɛ kɔ ɛkpã nɛ kpayamɛ zɛza ganɔ agɛ eklu lɔ nɛ tɛtiti mɛ nɛ́ yɛnahwɛ ishubhubhui anɛ̀ kɛdzyɔgo bhɛbhɛtɛ.

⁴ Ganɔ anɛ nɛabha akɔ lɔ yɛ dɔ gbɛgbla anɛ̀ kedziŋɛŋa gɛ aɖɔlu kɔ lɔ so tɛ ganɔ balɛ abha nɔ bɔ bhɛtɛ nɛ́ kanɔ mɛ kemi klɛ nɔ bɔ koeyi nɛ otumu mɛ kɛdɔ yɛyɛkɛ anɛ kanɔ mɛ gɛ ke de ɔfufɔɛ zizi tɛpɛpɛɛ ɔkɔ.

⁵ Alasɛ kɛnɛnɛ tututu so, bhɛtɛ tɛwũwlãnkɛ kanyaka tɛ ɔyɛkɔ ɔplɛnɔ wɔ tɛyɛyɛkɛŋa dzyɔgo, anɛ kɔ kɛdzyɔgo, kibuititi,

⁶ klɛ kɔ kibuititi, ɛshu nyɛnyɛna, klɛ kɔ ishu-nyɛnyɛna, kɛxwɛwɛwa, nɛ̀ kɔ kɛxwɛwɛwa, kpayamɛzɛza,

⁷ klɛ kɔ kpayamɛzɛza, badzya ɛyɛmɛyɛyɔ, nɛ̀ kɔ badzya ɛyɛmɛyɛyɔ, tɛdɛdɛmɛnɔ.

⁸ Alasɛ onugɛ ebuianɛ lalɛ wũnɔ ahwɛ nɛ alɛ tɛkpikpe mɛ, la ba nyɛna nɔ evunɔ sɛ no ti bo dzi banɔ gɛ nɔ tɛ bɔ za kibuinyɛbuim klɛ nɔ tɛ bɔ na kɛdɔnyɛdɔ bhɛtɛ nɛ wɔnɔ Apalete Yesu Kristo nɛ tɛtiti mɛ.

⁹ Pɔ onugɛ aanɛ la ma anɔ teli ahwɛ, pɛ ataa mɔ nɛ odzidzekɔ klɛ epu anhũ, klɛ adzɛkɛ sɛ be ti plu yɛ shu aba fla nɛ yɛ buzizi.

¹⁰ Kɛlɛso, madzyalɛ mɔ, nɔ wlãkɛ dɛana tɛ nɔ bhɛtɛ wɔnɔ tɛkuklu nɛ tɛbubu ba pɛɛ̃. Alasɛ onugɛ nɔ bhɛtɛ ebuianɛ, nɔtɛ bɔ dɔ oboe,

¹¹ klɛ nɔ bɔ yɛkɛ kedziŋɛŋa tɛyɛyɛkɛ ɔkpɛ bukusiɔŋakɔ mabekemabeke nɛ́ bulɔ Apalete anɛ Yesu Kristo gɛ ebhulɔayɛkɛ.

Kpayaeplukpa Nɛ Kibuiɖuɖɔlu

¹² Kɛlɛso ɛba bakanɔ ebuianɛ kibenyɛbe, kɛlɛmɛ kuratsyɛ sɛ nɔ nyi alɛ klɛ la lɛ tɛtitimɛ gɛganɛ nɛ́ ebuigba gɛ la lɛ wũnɔ ahwɛ ɔtsyɔnɛ.

¹³ Kɛ bamɛ tɔkpuimɛ gbɛagba sɛ ɛdanɛ nɔ kɛtɔkpu mɛ anasɛ gɛ ɛka lɛ nɛ ɛkpã nɛ́ ishuidzya kagba nɛ mɛ,

¹⁴ alasɛ inyi sɛ ɛba yɛkɔɛ lɛ lu kɛwã zia, anasɛ gɛ bulɔ Apalete Yesu Kristo abhɛtɛ kɛlɛ mɛ bhui kɔ mɛ.

¹⁵ Klɛ ɛba bhɛtɛ kɛkanyaka tɛ ɛmɔ sɛ nɛ mɛ tɛshɛshɛ̃e de nɔ bɔ zɔ baka ebuianɛ kibenyɛbe.

¹⁶ Bu dɛ za ebuifɛfatɛ ede kibelɛlɛ gɛ bu tsre nɔ denɔ kemi anɛ̀ bulɔ Apalete Yesu Kristo yɛ tɛbɛba, pɔ bu dzi ebuimɔɖɔ kɔ yɛ tɛgbɛgbla.

¹⁷ Alasɛ ayɛkɛ kabhaŋɛŋa anɛ tɛbhubhui denɔ Aka Kpaya kɔ nɛ kibelɛlɛ gɛ kaɖɔɖuɖɔ nɛ aba kɔ yɛ denɔ Kabhakpɛkpɛ Gbɛgbladɛ ɔkɔ, kaɖɔ sɛ, “Ye nu mɛ Eyianyɛ, gɛ ɛdɛmɛnɔ, nɛ yɛ ɛpɛɛ yɛ bui mɔmɔ.”

¹⁸ Bulɔ nahwɛ nu kaɖɔɖuɖɔ nɛ gɛ kede owũsise kibelɛlɛ nɛ gɛ bu za yɛ ɔbha nɛ butu bhubhui nɛabha.

¹⁹ Klɛ bu yɛkɛ kibui gɛ atɔnu na bhɛtɛ gɛ kɛlɛmɛdɔ dɛ, klɛ nɔ bɔ bhɛtɛ mɔmɔ sɛ nɔ ta tɔ nɛ lɛ, anasɛ gɛ kifu tã nɛ otumuimɛ, ɔdɔtɔnɔ kibelɛlɛ nɛ gɛ olizatɔ na, klɛ kɛvulɔɛ wũwɔɛ̃ neyi nɛ wũnɔ idzyi mɛ.

²⁰ Nɛ alɛ petee de, alasɛ tɛ nɔ nu kɛlɛesi sɛ anɛ kibuiɖɔlu nɛ Kpayaplukpa shu ka ba ganɔ kibuiɖɔlu nahwɛ kɛlɛesi bubu.

²¹ Alasɛ kibuiɖɔlu kɛtɛde kɛlɛ odekɔ nɛ anɔ tɛ pɛpɛɛ mɛ, pɔ banɔ baɖɔaɖɔ denɔ Kpaya kɔ anasɛ gɛ Ɔfufɔɛ Dzyɔgo nɛ otuku alɛ.