2 Kɔrintioanɛ 13 - ONUGBÙ NYƐNYÃ VUVƆ

Tɛtsitsrenɔ Gugɔɛ

¹ Kɛnɛ kɛlɛ badzi butramɛ gɛ ɛba wɔnɔ kɔ. “Kibuinyɛbui gɛ bayɛkɔ nɛ anɔ shu ebuimɔɖɔ tɛabha ɔvɛnɔ tɛata baɖɔaɖɔ denɔ kɛlɛ shu.”

² Ɛtɛ kɔ nɔ tɛtsitsrenɔ nɛ kɛbelɛlɛ gɛ ɛba wɔnɔ bha bubhla. Ɛka tsodzi ɖɔ ɔtsɔnɛ gɛ ɛma: Nɛ mɛ tɛtɛtsodziba mɛ, ɛtɛ ba yɛkɔ tsye ba gɛ ba bhɛtɛ ebuizizi eputɔ pɛnɔ abhlatɔ kanyaka,

³ nɛ kɛlɛmɛ gɛ nɔ pɛɛ sɛ tɛ nɔ ti sɛ Kristo aɖɔaɖɔ ganɔ mɛabha. Eke botso sɛ tɛ atɛta wunɔ batɔ, pɔ kemi alɛ yahwɛ nɛ wunɔɛ shi.

⁴ Tɛ nɔ yɛkɛ lɛabhaŋa, bakplɛasɔ nɛ osi shu nɛ tɛbubotso mɛ, pɔ nɛ Kpaya kemi abha aza nɛkpã.

⁵ Nɔ vɛ wunɔnahwɛ shui mɛ odi sɛ kɛlɛlɛ mɛ sɛ nɔ lɛ tɛyɛyɛkɛŋa mɛ, wunɔnahwɛ nɔ di lɛ mɛ. Nɔ dɛ mɔ lɛ sɛ Kristo Yesu alɛ wunɔɛ mɛ—kɛlɛmaza, kɛlɛlɛmɛ, nɔ dɛna tɛbibisi nɛesi bu?

⁶ Klɛ ɛyɛkɛŋa sɛ nɔ bɔ mɔ sɛ bu na tɛbibisi nɛesi bu.

⁷ Ɔtsɔ̃nɛ buklukpaya sɛ Kpaya akɔsɛ nɔ tɛ bhɛtɛ buizizi kanyaka. Ganɛ sɛ tɛ banɔ ba mɔ sɛ bu na tɛbibisi nɛesi bu pɔ sɛ tɛ nɔ bhɛtɛ kɛgɛ nu kɛdzyɔgo kɛlɛlɛmɛ tsyɛ sɛ bu dɛna bhɛtɛ.

⁸ Alasɛ bu tɛbabhɛtɛ kɛdɔnyɛdɔ gɛ kɛba lɔɛtiti nɛ kibui gbɛagba shu, pɔ kibui gbɛagba ko.

⁹ Same ku lɔ kibenyɛbe gɛ bu botso pɔ wunɔ xũ nɛ nɔ gɛganɛ, klɛ bulɔ kpayakuklu ki nu kɔ wunɔ tɛpɛpɛ̃.

¹⁰ Kɛnɛ nɛ so gɛ ɛŋlɔmɛ ebui anɛ kibenɔ nɛ gɛ ɛma, sɛ kibenɔ nɛ gɛ ɛba ɛtɛ ba yɛkɔ bugɛganɛ kabhaŋɛŋa ɛnyɛna nɔ—kabhaŋɛŋa kalɛ Apalete akɔ mɛ sɛ tɛ ɛyɛkɔ zɛ bhɔ nɔ trɔ, ganɛ sɛ tɛ ɛyɛkɔ zɛ yɛ nɔ lu kesukpa.

Tɛsɛsɛnɔ Gugɔɛ

¹¹ Gugɔɛ, badzya, nɔ za mɔ. Nɔ za ɛkpã dzyɔgo, nɔ nu mɛ ebui nɛ gɛ ɛkpɛ nɔ kɔ, nɔ za nɛ kɛtɔkpui mɛ terikpo, nɔ za nɛ ishuyuyɔ mɛ. Klɛ Kpaya tɛdɛdɛmɛnɔ anɛ ishuyuyɔ lɛ ba za plɛnɛ nɔ.

¹² Nɔ sɛnɔ ɔhaglɔ nɛ ishubhubhui ahwɛyɛyɛkɛ

¹³ Kpaya banɔ petee ba sɛnɛ nɔ asɛsɛ.

¹⁴ Kɔ Apalete Yesu Kristo ɛyamyuyɔ, anɛ Kpaya tɛdɛdɛmɛnɔ, anɛ Ɔfufɔɛ Dzyɔgo ɔhakpɛkpɛ lɔ za plɛnɔ wɔnɔ petee.