2 Kɔrintioanɛ 11 - ONUGBÙ NYƐNYÃ VUVƆ

Paolo Nɛ Itro Bakpɛkpɛ

¹ Ɛdi kidzoenu kɔ nɔ sɛ bɔ yɛkɛ mɛ bugãdudɔ nɛ bɔɛ, pɔ nɔ tɛ flɛ bhɛtɛ lɛ.

² Ɛwlãnkɛ abha nɛ wunɔɛ tɔkpu nɛ Kpaya. kabhawuwlãnkɛ. Ɛɖɔ anyɛ terikpo bui lu kɔ wɔ, kɔ Kristo, sɛ tɛ ɛba yɛkɔ wɔ kɔ yɛ anasɛ adzɛ gɛ etinyi anyɛ.

³ Pɔ isifu sɛ anasɛ gɛ eblidzya bushɛ wuwa wɔɛ Eva, wunɔ tɔkpuimɛ kɛba na tsyina lɛla denɔ wunɔ kɛmumɔ nɛ kɛdzyɔgo kɔ Kristo.

⁴ Alasɛ onugɛ anɔteli aba wunɔ kɔ klɛ aba ɖɔaɖɔ denɔ Yesu teli shu ɔyɛkɔ dɛ Yesu nɛ gɛ yɛ shuibui lɔ ɖɔ, ɔdɔgɔsɛ onugɛ nɔ yɛkɛ ɔfufɔɛ bhlatɔ toli ɔyɛkɔ dɛ ɔgɛ ɔlɛ nɔ yɛkɛ, ɔdɔgɔsɛ kibui dzyɔgo bhlatɔ gɛ ga ɔtɔ nɛ kɛgɛ nɔ yɛkɛ nɛ shu, wɔnɔ nɔ yɛkɔɛ lɛ bhɔnɔ mɔmɔ.

⁵ Pɔ ɛdɛ mɔɛlɛ sɛ mɛ nu agugɔɛ kɔ “bakpɛkpɛ gbɛgbladɛ.”

⁶ Ɛtɛ ba dzi agɛ bakasɛ kaɖɔɖuɖɔ, pɔ kibuititi lɛ mɛ ahwɛ. Bu bhɛtɛ kibuinɛ kɛlɛmebui mɔmɔ kɔ nɔ nɛ kidzo nyɛdzo abha.

⁷ Kibuikpã lɛ nu kɔ mɛ sɛ ɛzhinɔ mɛshu kpɛesi sɛ tɛ etii nɔ wunɔ nɛ Kpaya kibui dzyɔgo ɖɛɖɔ kɛbhɛ mabuya mabuya?

⁸ Ɛyɛkɛ dɔ denɔ busɔlɛha bhlatɔ mɛ gɛ kinu sɛ ezru alɛ sɛ tɛ ɛyɛkɔ plɛnɔ wɔnɔ nɔ.

⁹ Klɛ kibelɛlɛ gɛ ɛza wunɔ bha klɛ ɛpɛɛ kedɔ tili, ɛdɛ dzi kituku kɔ anɔnyanɔ, alasɛ badzya gɛ be de Makedonia ba kɔ mɛ kɛdɔnɔ nɛ gɛ ɛpɛɛ. Ɛbu mɛshu sɛ ɛtɛ dzi kituku kɔ nɔ nɛ kidzo nyɛdzo abha, klɛ ɛba za lɛabha zɛ bhɛtɛ lɛ ana.

¹⁰ Anasɛ gɛ Kristo bui gbɛagba lɛ mɛ mɛ, anɔnyanɔ ama Akaia gɛ aba dzrɔnɛ mɛ ishufifeke nɛ́.

¹¹ Kideso? Alasɛ ɛdɛ pɛɛ wunɔ bui? Kpaya enyi sɛ ɛpɛɛ wunɔ bui!

¹² Klɛ ɛba zaɛ lɛabha bhɛtɛ kɛ gɛ ɛbhɛtɛ sɛ tɛ ibhui kesukpa denɔ ba lɛesi bagɛ ba pɛɛ kidzo sɛ tɛ ba yɛkɔ sɛ balɛ tɛsusɔɛ mɛ nɛ lɔ nɛ kɛdɔ nɛ mɛ gɛ be fekeshu nɔ.

¹³ Alasɛ banɔa nɛɛ di benu itro bakpɛkpɛ, baxwɛwa gɛ ba wɛanɔ, be tsyina shu anasɛ Kristo bakpɛkpɛ.

¹⁴ Klɛ kɛdɛyinɔ anɔ, alasɛ Satana nahwɛ etsyina anasɛ axwɛdɛ gɛ atɛ̃fu.

¹⁵ Kɛdɛ bhui temohui, nɛlɛmɛ, onugɛ yɛ baxwɛdɛ betsyina shu anasɛ baxwɛdɛ nɛna dzyɔgo. Balɛ obekekɔ ba dzi kɛgɛ balɛ kɛdɔbhɛbhɛtɛ ba kɔ alɛ.

Paolo Efekeshu Denɔ Yɛ Butɔmumɔ Shu

¹⁶ Ɛkaɖɔ: Tɛ kɔ anɔnyanɔ ayɛkɔ mɛ sɛ ɛnu agã. Pɔ onugɛ nɔ yɛkɔ mɛ sɛ ɛnu agã, kɛlɛalɛ yɛkɛmɛ anasɛ agã, sɛ tɛ ɛba fekeshu bɔɛ.

¹⁷ Nɛ kɛnɛ ishuabha-yɛyɛkɛŋa shufifeke ɛtɛ ɖɔaɖɔ anasɛ Apalete tɛ pɛpɛɛ, pɔ anasɛ agã

¹⁸ Nɛ kibelɛlɛ gɛ banɔ gelee be fekeshu nɛ kidzo nɛabha gɛ kanɔ navɛ mɛ tsyɛ ɛba fekeshu.

¹⁹ Wunɔ nɛ bagã nɔ ga nɛ kɛbelɛlɛ nɛ gɛ onyibui paa.

²⁰ Kɛgbɛagba nɛ, wunɔ tsyɛ nɔ ganɔ nɛ anɔnyanɔ gɛ ayɛkɔ nɔ anasɛ anɔdzidzi pɛnɔ ezru nɔ pɛnɔ aga wɔabha edzi anɔ pɛnɔ efekeshu pɛnɔ abɔ wɔɛ dɔ nɛ amɛ.

²¹ Nɛ mɛ kɛwɔɛ̃ mɛ ɛdɛmɛ sɛ bu za tɛgblɔdzɔ mɛ fanɔ kɔ kɛ lɛ! Kide anɔ teli tsyɛ apɛɛ sɛ tɛ efekeshu—Ɛɖɔaɖɔ anasɛ agã—Mɛ tsyɛ kɛlɛ sɛ tɛ ɛfekeshu.

²² Hebriuanɛ le nu? So yɛ mɛ nu. Izraɛlanɛ le nu? So yɛ mɛ nu. Abraham tɛmumɔ lɛ nu? So yɛ mɛ.

²³ Kristo baxwɛdɛ lɛ nu? (Ɛmamɔ sɛ tɛ ɛɖɔ kaɖɔa nɛ di.) Ɛdɛ́ alɛ. Ɛtɛ waɛxwɛ gɛganɛ dɛ, ɛza vu gelee ziazia, be tu mɛ ebe gelee, klɛ be tii mɛ akpɛ butsi mɛ etsodzi etii akpɛ.

²⁴ Atɛ teti ɛyɛkɛ Yuɖanɛ tɛtutu eshi afɛtalɛ̃ be bu terikpo nɛ lɛ mɛ.

²⁵ Atɛ tata lɛ tu mɛ nɛ kɛɖashi, be hu mɛ aklãngbu buhu trukpo, atɛ tata keniabha ipupu ɔyɛ nɛ mɛ, ɛza aƒu abha akpɛkpa kiwui tirikpo nɛ elishi terikpo.

²⁶ Ɛgaedzo ebe gelee. Ɛmɔ butɔ nɛ beni tsutsɔkɛ mɛ, ɛmɔ butɔ nɛ bezi ahwɛ mɛ, ɛmɔ butɔ nɛ mɛnahwɛ ɔmamɛanɛ nɛ ahwɛ mɛ, ɛmɔ butɔ nɛ bagɛ be dinu Yuɖanɛ nɛ ahwɛ mɛ, ɛmɔ butɔ nɛ ɛmagbɛgbla nɛ mɛ, ɛmɔ butɔ nɛ ɛma bhlibhli nɛ mɛ, ɛmɔ butɔ nɛ aƒu abha, ɛmɔ butɔ nɛ itro badzya ahwɛ mɛ.

²⁷ Ɛwa kɛxwɛ gɛganɛ klɛ ɛmɔ butɔ klɛ ɛzanɛ awɔ̃ ebemɛ, eti bubhɛ anɛ oniwɛ klɛ ɛza ebe mɛ kɛdɔ maŋamaŋa, bublɔ yimɛ ebemɛ klɛ ɛza alagba.

²⁸ Nɛ alɛlɛ petee de, kituku baza mɛabha kibenyɛbe nɛ busɔlɛha nɛ petee shu.

²⁹ Ane yɛ agblɔdzɔ klɛ mɛ ɛdɛgblɔdzɔ? Ane ba gbanɔ akpɛ buzizi mɛ klɛ kɛdɛ pɔɛ mɛ shui mɛ?

³⁰ Onugɛ alasɛ tɛ ɛfekeshu, ɛba fekeshu nɛ ebui nɛ gɛ la kasɛ mɛ tɛ bugblɔdzɔ.

³¹ Kpaya anɛ Apalete Yesu Aka, gɛ yɛ nyi ba bakpɛabha ɔvɛnɔ faã, enyi sɛ ɛtɛ hu otro.

³² Nɛ Damaskosɛ kabhaŋɛŋanɔ gɛ alɛ Ekusi Arɛtasɛ yesi akɔ be po Damasenɛ ɔmagbɛgbla sɛ tɛ be vu mɛ.

³³ Pɔ be zhinɔ mɛ nɛ kashɔɛmɛ aganɔ fɛsrɛ nɛ kidri nɛ mɛ klɛ ɛkpɛ kɛ lɛɛ ganɔ yɛ ahwɛ mɛ ɛshɛ.