1 Yohanɛsɛ 5 - ONUGBÙ NYƐNYÃ VUVƆ

Tɛyɛyɛkɛŋa Nɛ́ Kpaya Yɛ Yi Mɛ.

¹ Anɔnyanɔ gɛ ayɛkɛŋa sɛ Yesu yɛ nu Kristo enu Kpaya ye yi, klɛ anɔnyanɔ gɛ adɛmɛnɔ nɛ aka adɛmɛnɔ nɛ yɛ eyi tsyɛ.

² Kɛnɛ kɛlɛmɛ bu nyi sɛ bu dɛmɛnɔ Kpaya yɛ yialɛ: ganɔ Kpaya tɛdɛdɛmɛnɔ anɛ̀ yɛ ɛshã abha bhɛbhɛtɛ.

³ Kɛnɛ kɛlɛ nu tɛdɛdɛmɛnɔ nɛ̀ Kpaya, tɛ ɔbhɛtɛ ɔtrɔ yɛ ɛshã nɛabha. Klɛ yɛ ɛshã nɛ dɛ nu kɛdɔ gɛganɛ,

⁴ alasɛ anɔnyanɔ gɛ enu Kpaya ye yi aŋa kanɔ nɛabha. Kɛnɛ kɛlɛ nu kabhaŋɛŋa nɛ gɛ kaŋa kanɔ nɛabha, bulɔ tɛyɛyɛkɛŋa tsyɛ.

⁵ Ane yɛ abana kanɔ nɛabha ŋa? Anɔ nɛ ko gɛ ayɛkɛŋa sɛ Yesu enu Kpaya yɛ Eyi.

⁶ Yɛ enu agɛ aba ganɔ buni anɛ̀ dzyosu mɛ—Yesu Kristo. Adɛ ba ganɔ buni tite mɛ, pɔ aba ganɔ buni anɛ̀ dzyosu mɛ. Klɛ Ɔfufɔɛ ɔlɛ ɖɔaɖɔ, alasɛ Ɔfufɔɛ ɔlɛ nu kɛgba.

⁷ Alasɛ kɛdɔ tɛta kɛlɛ ɖɔaɖɔ,

⁸ Ɔfufɔɛ, buni anɛ̀ dzyosu, klɛ kɛdɔ tɛ̀ta nɛ lɛ tɛtɛtrɔ mɛ.

⁹ Bu dɛmɛ trɔ anɔ buiɖɛɖɔ abha, pɔ Kpaya ebuiɖuɖɔ la gɛganɛ adɛ alasɛ kɛlɛ nu Kpaya yɛ buiɖɛɖɔ, gɛ akɔ denɔ yɛ Yi nɛ shu.

¹⁰ Anɔnyanɔ gɛ ayɛkɛ Kpaya yɛ Yi nɛabhaŋa ayɛkɛ yɛ kaɖɔɖuɖɔ nɛ yɛ idzyi mɛ. Anɔnyanɔ gɛ adɛ yɛkɛ Kpaya bhaŋa ebu eyinɔ asɛ Kpaya enu otro elete, alasɛ adɛ yɛkɛ Kpaya kɛbui ɖɛɖɔ nɛabhaŋa gɛ aɖɔ denɔ ye Yi shu.

¹¹ Klɛ kɛlɛ nu kibuiɖɛɖɔɛ: Kpaya akɔ lɔ ɛkpã mabeke mabeke, klɛ ɛkpãɛ nɛ lɛ yɛ Yi nɛ mɛ.

¹² Anɔ nɛ gɛ ayɛkɛ Eyi ayɛkɛ ɛkpã, anɔ nɛ gɛ adɛ yɛkɛ Kpaya yɛ Yi ɛkpã ma yɛ ahwɛ.

Ebui Ɖuɖɔ Gugɔɛ

¹³ Ɛŋlɔmɛ ebuianɛ kɔ wunɔ agɛ nɔ yɛkɛŋa nɛ Kpaya ye Yi nɛ nyi mɛ sɛ tɛ nɔ bɔ ti sɛ ɛkpã mabeke mabeke lɛ nɔ ahwɛ.

¹⁴ Kɛnɛ kɛlɛ nu idzyi gɛ lɛ bulɔ ahwɛ gɛ butsobunɔ Kpaya, sɛ onugɛ bu bisi yɛ kɛdɔ tili nɛ́ yɛ tɛpɛpɛɛ nu, énu bulɔɛ bui.

¹⁵ Klɛ onugɛ bu nyi sɛ énu bulɔɛ bui—kanyaka gɛ bu bisi—bu nyi sɛ bu yɛkɛ kɛgɛ bu bisi nɛ yɛ ahwɛmɛ.

¹⁶ Onugɛ anɔ teli amɔ yɛ adzya abhɛtɛ kibui kpã gɛ kɛ tɛ ba gbanɛ yɛ kpɛ butsi mɛ, eklukpaya klɛ Kpaya aba kɔ yɛ ɛkpã. Ɛɖɔɛbui denɔ ba gɛ balɛ ebuikpã tɛ ba gbanɛ alɛ akpɛ butsi mɛ. Kibuikpã tili lɛ gɛ kɛ gbanɛ anɔ kpɛ butsi mɛ. Ɛtɛ ɖɔ sɛ èklukpaya kɔ alɛlɛ nɛɛ di.

¹⁷ Kibuikpã bhɛbhɛtɛ kanyaka nu kizizi, klɛ kizizi tili lɛ gɛ kɛ tɛ gbanɛ anɔ akpɛ butsi mɛ.

¹⁸ Bu nyi sɛ anɔnyanɔ gɛ ba mɔ nɛ Kpaya mɛ ata za lɛabha abhɛtɛ kibui kpã, agɛ yɛ la mɔ nɛ Kpaya mɛ akpɛ buka akana yɛ, klɛ ɔfufɔɛ kpã nɛ lɔ tɛ bɔ bhɛtɛ yɛ kizizi.

¹⁹ Bu nyi sɛ bu nu Kpaya yɛ yialɛ, klɛ sɛ kanɔ nɛ petee kabhaŋɛŋa lɛ ezizi nɛesi.

²⁰ Bu ka nyi sɛ Kpaya ye Yi nɛ aba klɛ akɔ lɔ kibuititi, sɛ tɛ bu ti yɛ gɛ enu agbɛagba. Klɛ bulɛ yɛ mɛ gɛ enu anɔɛgbɛagba—nɛ yɛ Yi Yesu Kristo tsyɛ mɛ. Ye nu kɛgbɛagba Kpaya anɛ̀ ɛkpã mabeke mabeke.

²¹ Banuvɔ mumɔa, no bu wɔnɔ shu denɔ bakpaya bhubhɔ mɛ.