1 Yohanɛsɛ 4 - ONUGBÙ NYƐNYÃ VUVƆ

Feke Ɛfufɔɛ Nɛ Odi

¹ Ɛbhɛalɛ mumɔa, nɔ tɛ yɛkɛ ɛfufɔɛ ɛkanyaka abhaŋa, pɔ feke ɛfufɔɛ nɛ odi tɛ nɔ mɔ sɛ lɛ de Kpaya kɔ, alasɛ itro batɔnu gelee ba tɛ ga ekoeyi etsoku kanɔ nɛ mɛ.

² Kɛnɛ kɛlɛ ba kɔ nɔ mɔ sɛ Kpaya Ɔfufɔɛ lo nu: Ɔfufɔɛ kanyaka gɛ lɔ dɛmɛ ɔtrɔ sɛ Yesu Kristo aba nɛ Anɔdzyrame tɛzɛzamɛ lɔ de Kpaya ɔkɔ,

³ pɔ ɔfufɔɛ kanyaka gɛ lɔ dɛ dɛmɛ ɔyɛkɛ Kristo lɔ dɛ de Kpaya kɔ. Ɔnɛ ɔlɛ nu otrokristo ɔfufɔɛ, gɛ nɔ tɛ nu sɛ lɔ ba klɛ ɔtsɔnɛ kuratsyɛ lɔ tɛ boku kanɔ nɛ mɛ.

⁴ Wunɔ, banuvɔ mumɔa, nɔ de Kpaya kɔ klɛ nɔ ŋa ɛlɛabha, alasɛ agɛ alɛ wunɔɛ mɛ etri adɛ ɔgɛ lɔ lɛ kanɔ nɛ mɛ.

⁵ Be de kanɔ nɛ mɛ, klɛ kɛlɛso ba ɖɔaɖɔ denɔ kanɔɛ mɛ ebui shu, klɛ kanɔ na ta lɛ atɔ.

⁶ Bulɔ bu de Kpaya ɔkɔ, klɛ anɔ nɛ gɛ enyi Kpaya aba ta bulɔ atɔ, pɔ anɔ nɛ gɛ edi de Kpaya atɛ ba ta bulɔ atɔ. Kɛnɛ kɛlɛ kɔ sɛ bu ba ti Ɔfufɔɛ kɛgbɛagba anɛ̀ otro ɔfufɔɛ.

Kpaya Anɔ Dɛdɛmɛnɔ Anɛ Bulɔaɛyɛ

⁷ Ɛbhɛya mumɔa, nɔ kɔ lɔ dɛmɛnɔ ɔhagblɔ, alasɛ tɛdɛdɛmɛnɔ de Kpaya ɔkɔ. Anɔnyanɔ gɛ adɛmɛnɔ anɔ Kpayaɛ mɛ la mɔ yɛ klɛ enyi Kpaya.

⁸ Anɔ nɛ gɛ adɛ dɛmɛnɔ nɛ anɔ eti nyi Kpaya alasɛ Kpaya enu adɛdɛmɛnɔ.

⁹ Kɛnɛ nɛ mɛ Kpaya akasɛ yɛ tɛdɛdɛmɛnɔ nɛ́ bulɔɛ shi: Asɛsɛ yɛ eyi klɛ ɛnu Eyianyɛ terikpo nɛ kanɔ nɛ mɛ sɛ tɛ bu za nɛ ɛkpã ganɔ yɛa bha.

¹⁰ Kɛnɛ kɛlɛ nu tɛdɛdɛmɛnɔ, ganɛ sɛ bulɔ tɛdɛdɛmɛnɔ nɛ Kpaya, pɔ sɛ adɛmɛ bulɔɛ bui klɛ asɛsɛ yɛ Eyianyɛ anasɛ ishu kukɔ kɔ bulɔ buzizi tsyitsye.

¹¹ Ɛbhɛya mumɔa, nɛlɛmɛ Kpaya adɛmɛ bulɔɛ bui ɔdɛ, bulɔ tsyɛ alasɛ tɛ budɛmɛ bulɔ ɔhaglɔ bui.

¹² Anɔnyanɔ aka mɔ Kpaya edi, pɔ onugɛ budɛmɛnɔ ɔhaglɔ, Kpaya alɛ bulɔɛ mɛ klɛ yɛ tɛdɛdɛmɛnɔ nɛ na nɛ́ bulɔɛ mɛ.

¹³ Bunyi sɛ bulɛ nɛ ɛkpã nɛ yɛ mɛ klɛ alɛ bulɔɛ mɛ, alasɛ ayɛkɔ yɛ Ɔfufɔɛ akɔ lɔ.

¹⁴ Klɛ bu tɛ mɔ klɛ bu buɖɔ sɛ Aka asɛsɛ yɛ Eyianyɛ tɛ edzi Ayɛyɛkɛkɔ kanɔ.

¹⁵ Onugɛ anɔ teli adɛmɛ atrɔ sɛ Yesu enu Kpaya yɛ Yi, Kpaya alɛ yɛ mɛ klɛ alɛ Kpaya mɛ.

¹⁶ Klɛ so bu nyi klɛ bu tsiri tɛdɛdɛmɛnɔ nɛ gɛ Kpaya akɔ lɔ nɛabha. Kpaya enu adɛdɛmɛnɔ. Anɔ gɛ alɛ tɛdɛdɛmɛnɔ mɛ alɛ Kpaya mɛ klɛ Kpaya alɛ yɛ mɛ.

¹⁷ Nɛ kidzoɛ nɛabha, tɛdɛdɛmɛnɔ na nɛ bulɔɛ mɛ sɛ tɛ idzyi aza bulɔ ahwɛ nɛ kebhuikuklu wui nɛabha, alasɛ nɛ kanɔa nɛ mɛ bu lɛ anasɛ yɛ.

¹⁸ Kifusisi ma tɛdɛdɛmɛnɔ mɛ. Pɔ tɛdɛdɛmɛnɔ dzyɔgo kɛ kɛka kifusisi ebu, alasɛ kifusisi lɛ nɛ batɔ tɛtɛta. Agɛ esifu tɛdɛdɛmɛnɔ dzyɔgo ma yɛ mɛ.

¹⁹ Budɛmɛ anɔɛ bui alasɛ Kpaya eputɔ adɛmɛ bulɔɛ bui.

²⁰ Onugɛ anɔ teli aɖɔ sɛ, “Ɛdɛmɛ Kpaya bui,” pɔ egu yɛ adzya, enu otro lete. Alasɛ anɔnyanɔ gɛ adɛ dɛmɛnɔ adzya, gɛ amɔ, atɛ bana Kpaya gɛ yɛ ata mɔ mɛ bui adɛmɛnɔ.

²¹ Klɛ akɔ lɔ ɔshã nɛ asɛ: Anɔnyanɔ gɛ adɛmɛnɔ Kpaya alasɛ tɛ adɛmɛnɔ yɛ adzya.