1 Yohanɛsɛ 3 - ONUGBÙ NYƐNYÃ VUVƆ

¹ Kɛlɛ Aka nɛ tɛdɛdɛmɛnɔ nɛ anɔ etri gɛ ayɛkɔ akɔ lɔ, sɛ tɛ be klu lɔ asɛ Kpaya ye yialɛ! Klɛ kɛlɛ kɔ sɛ bu nu yɛ ayɛ! Kibui nɛ so gɛ kanɔ nɛ tinyi lɔ kɛlɛ nu sɛ ke tɛ nyi yɛ.

² Ɛbhɛya mumɔa, ɔtsɔ̃nɛ bu nu Kpaya ye yialɛ, klɛ kɛdɔnɔ nɛ gɛ bu badzi ba ka kɔ lɔ ti lɛ. Pɔ bu nyi sɛ kibe nɔ gɛ aba koeyi, bu ba dzi anasɛ yɛ, alasɛ bu ba mɔ yɛ anasɛ gɛ alɛ.

³ Anɔnyanɔ gɛ kidzoenudidi nɛ lɛ yɛ mɛ yɛnahwɛ eplu shu, anasɛ gɛ yɛ shu bhui.

⁴ Anɔnyanɔ gɛ abhɛtɛ kibuikpã, ada ɔshã abha, kɛgbɛagba, kibuikpã nu ɔshɛ̃abhadɛda.

⁵ Pɔ nɔ nyi sɛ aba sɛ tɛ ayɛkɔ bulɔ ebuikpã ashɛnɔ. Klɛ yɛ mɛ kibuikpã ma.

⁶ Anɔnyanɔ ma gɛ alɛ Kristo mɛ pɛ etsri kɛlɛa bha abhɛtɛ kibuikpã. Anɔnyanɔ ma gɛ etsri lɛabha abhɛtɛ kibuikpã aba mɔ yɛ gɛ ebe ti yɛ.

⁷ Banɛvɔ mumɔa, nɔ tɛ kɔ anɔnyanɔ awɔɛ nɔ. Anɔ gɛ abhɛtɛ kɛdɔ dzyɔgo enu anɔ dzyɔgo, anasɛ gɛ Kristo enu adzyɔgo.

⁸ Anɔ nɛ gɛ abhɛtɛ kibuizizi enu ɔfufɔɛkpã ayɛ, alasɛ ɔfufɔɛkpã nɛ lɔ bhɛtɛ kizizi denɔ kesikpɛkpɛ ke. Kibui nɛ so gɛ Kpaya yɛ Yi aba kɛlɛ nu sɛ tɛ ezi ɔfufɔɛkpã nɛ kɛxwɛwɛwa.

⁹ Anɔnyanɔ gɛ ba mɔ nɛ Kpaya mɛ ata zɛlɛabha abhɛtɛ kizizi, alasɛ Kpaya eyuyu alɛ yɛ mɛ, atɛ bana lɛabha avɛ azabhɛtɛ kizizi alasɛ ba mɔ yɛ nɛ Kpaya mɛ.

¹⁰ Kɛnɛ kɛlɛ kɔ bu ti bagɛ benu Kpaya yɛ yialɛ klɛ ganɛ̀ bagɛ benu ɔfufɔɛkpã yɛ yialɛ. Anɔnyanɔ gɛ adɛ bhɛtɛ kɛ gɛ nu kɛdzyɔgo edɛnu Kpaya yɛ yi, ɔdɔgɔsɛ adɛ dɛmɛnɔ nɛ yɛ adzya, edi nu Kpaya yɛ yi.

Dɛmɛnɔ Nɛ Ɔhaglɔ

¹¹ Kɛnɛ nɛ nu kibui dzyɔgo gɛ nɔ nu denɔ kesikpɛkpɛ: Bu dɛmɛnɔ nɛ ɔhaglɔɛ.

¹² Nɔ tɛ za anasɛ Kain, gɛ edzi ɔfufɔɛkpã ayɛ klɛ eyi yɛ adzya. Klɛ kideso gɛ eyi yɛ? Alasɛ yɛnahwɛ ebui bhɛbhɛtɛ nɛ dzi kizizi klɛ yɛ adzya yɛ edzi kɛdzyɔgo.

¹³ Ma dzyalɛ tɛ kɔɛ lɛ bhɛtɛ nɔɛ bi, onugɛ kanɔ ne gu nɔ.

¹⁴ Bu nyi sɛ bu ga denɔ bu tsi mɛ ba ɛkpã mɛ, alasɛ bu dɛmɛnɔ nɛ bulɔ adzyalɛ. Anɔnyanɔ gɛ adɛdɛmɛnɔ nɛ yɛ ɔhaglɔɛ awɔ butsi mɛ.

¹⁵ Anɔnyanɔ gɛ egu yɛ adzya enu anɔ gɛ eyi anɔ, klɛ nɔ nyi sɛ agɛ eyi anɔ ɛkpã mabeke ma yɛ mɛ.

¹⁶ Kɛnɛ kɛlɛ kɔ sɛ bu nyi kɛdɔnɔ gɛ tɛdɛdɛmɛnɔ nu: Yesu Kristo ayɛkɔ yɛ ɛkpã nɛ etsye nɛ bulɔɛ tɔkpu. Klɛ alasɛ bulɔ tsyɛ bu yɛkɔ bulɔ ɛkpã nɛ tsye nɛ bulɔ adzyalɛ tɔkpu.

¹⁷ Onugɛ kanɔɛmɛdɔ lɛ anɔteli ahwɛ klɛ amɔ sɛ kɛdɔnyɛdɔ ma yɛ adzya ahwɛ pɔ edi di yɛ eshutukubui, kɛlɛ Kpaya tɛdɛdɛmɛnɔ ba za yɛ mɛ?

¹⁸ Banuvɔ mumɔa, nɔ tɛ kɔ lɔ tɛdɛdɛmɛnɔ anɔ nɛ ebuiɖuɖɔ ɔdɔgɔsɛ kɛnɛkɛ titee pɔ kɛ za tɛbhɛbhɛtɛ anɛ kɛgba mɛ.

¹⁹ Kɛnɛ nɛede, no nu kana gɛ bu nyi sɛ kɛgbɛagba ayɛ bu nu, klɛ kana gɛ bu kɔ bulɔ idzyi emuene nɛ yɛ amɛ

²⁰ kibenɔ gɛ bulɔ dzyi ebu lɔ kɛpɔ. Alasɛ Kpaya etri adɛ bulɔ idzyi, klɛ enyi kibuinyɛbui.

²¹ Ɛbhɛya mumɔa, onugɛ bulɔ dzyi edi bulɔɛpɔ, kemikpɛkpɛ alɛ bulɔ ahwɛ nɛ Kpaya mɛ

²² klɛ bu yɛkɛ kɛdɔnyɛdɔ gɛ bu bisi, alasɛ bu tatɔ yɛ ɛshã klɛ bu bhɛtɛ kɛgɛ apɛɛ.

²³ Klɛ kɛnɛ kɛlɛ nu yɛ ɛshã: tɛ bu yɛkɛŋa nɛ yɛ Yi Yesu Kristo nyimɛ, klɛ tɛ budɛmɛnɔ bulɔhaglɔ anasɛ gɛ akɔ lɔ ɔshã.

²⁴ Bagɛ ba tatɔ nɔ yɛ ɛshã balɛ yɛ mɛ klɛ alɛ balɛ mɛ. Klɛ kɛnɛ kɛlɛ kɔ sɛ bu nyi sɛ alɛ bu lɔɛ mɛ: Bu nyi lɛ denɔ Ɔfufɔɛ nɛ gɛ akɔ lɔ nɛ mɛ.