1 Yohanɛsɛ 2 - ONUGBÙ NYƐNYÃ VUVƆ

¹ Me yialɛ mumɔa, ɛŋlɔmɛ kɛnɛ sɛsɛ nɔ sɛ tɛ nɔ tɛ bhɛtɛ kibuikpã. Pɔ onugɛ anɔ teli abhɛtɛ kibuikpã, anɔ terikpo alɛ bulɔ ahwɛ gɛ aɖɔaɖɔ kɔ Aka gɛ awlãkɛ bulɔɛ tɔkpu—Yesu Kristo, Adzyɔgo Terikpo.

² Yɛ ayɛkɔ ishu etsye kɔ bulɔ ebuizizi, klɛ ganɛ bulɔ tite pɔ kɔ kanɔ nɛ petee buzizi.

³ Bu nyi sɛ bu ba sɛ tɛ bu ti yɛ onugɛ bu bhɛtɛ trɔ yɛ ɛshã nɛabha.

⁴ Anɔ nɛ gɛ aɖɔ sɛ, “Ɛnyi yɛ,” pɔ ata bhɛtɛ atrɔ yɛ ɛshã nɛ gɛ akpɛ nɛabha enu otro lete, klɛ kibuigbɛagba ma yɛ mɛ.

⁵ Pɔ onugɛ anɔ teli ata yɛ ebui nɛ atɔ, Kpaya tɛdɛdɛmɛnɔ kɛgbɛagba petee lɛ yɛ mɛ. Kɛnɛ kɛlɛ kɔ sɛ bu nyi sɛ bu lɛ yɛ mɛ:

⁶ Agɛ ayɔkɔ sɛ alɛ Kpaya mɛ, alasɛ tɛ aga anasɛ gɛ Yesu abhɛtɛ.

⁷ Ɛbhɛya mumɔa, ɛtɛ ŋlɔmɛ ɔshã vuvɔ kɔ nɔ pɔ ɛkuku tirikpoe lɛ, gɛ nɔ tɛ yɛkɛ denɔ kesikpɛkpɛ. Ɔshã kukuɔ nɛ ɔlɛ nu kibuiɖɛɖɔ gɛ nɔ tɛ nu.

⁸ Tsyɛ nɛ ɛŋlɔmɛ ɔshã vuvɔ kɔ nɔ, ba mɔ ɔlɛ kɛgbɛagba nɛ yɛ mɛ nɛ̀ wũnɔɛ mɛ, alasɛ otumu lɔ fla klɛ kifu kɛgbɛagba kɛ tɛ tenɛ tã.

⁹ Anɔnyanɔ gɛ ayɛkɔ sɛ alɛ kanɔ bhubhui mɛ pɔ egu yɛ adzya akalɛ otumui mɛ.

¹⁰ Anɔ nɛgɛ adɛmɛnɔ nɛ yɛadzya alɛ nɛ obhubhui kɔ, klɛ kɛdɔnyɛdɔ ma yɛ mɛ gɛ kɛ bakɔ sɛ etuitsrɛ.

¹¹ Pɔ anɔ nɛgɛ egu yɛ adzya alɛ otumu mɛ klɛ aga nyɔ nɛ otumu mɛ, eti nyi ɔkɔnɔ gɛ avɛ, alasɛ otumu nɛ pu yɛ awɔ̃hu.

¹² Ɛŋlɔmɛ kɔ nɔ, banɛvɔ mumɔa, alasɛ ba yɛkɔ wũnɔ buzizi etsye nɛ yɛ nyi nɛ so.

¹³ Ɛŋlɔmɛ kɔ nɔ, baka, alasɛ nɔ tɛ ti yɛ agɛ alɛ denɔ kesikpɛkpɛ. Ɛŋlɔmɛ kɔ nɔ, banyɛnɛvɔɛ, alasɛ nɔ ŋa ezizi nɛabha. Ɛŋlɔmɛ kɔ nɔ, bunuvɔɛ mumɔa, alasɛ nɔ nyi Aka.

¹⁴ Ɛŋlɔmɛ kɔ nɔ, baka, alasɛ nɔ tɛ ti yɛ agɛ alɛ denɔ kesikpɛkpɛ. Ɛŋlɔmɛ kɔ nɔ, banyɛsɔ, alasɛ nɔ lɛ gɛganɛ, klɛ Kpaya ɛbui nɛ la lɛ wunɔɛ mɛ, klɛ nɔ ŋa ezizi nɛabha.

Nɔ Tɛ Dɛmɛnɔ Nɛ Kanɔ

¹⁵ Nɔ tɛ dɛmɛnɔ nɛ kanɔ ɔdɔgɔsɛ kɛdɔnyɛdɔ gɛ kɛlɛ kanɔ nɛ mɛ. Onugɛ anɔteli adɛmɛnɔ nɛ kanɔ, Aka nɛ dɛdɛmɛnɔ ma yɛ mɛ.

¹⁶ Alasɛ kɛdɔnyɛdɔ nɛ kanɔ nɛ mɛ—anɔkpã awɔ̃hu dzɛdzã, kɔɛ dɔ klɛ nɛ̀ ɛshu fifeke kɔ kɛdɔ gɛ kɛ lɛ yahwɛ anɛ̀ kɛgɛ abhɛtɛ— kɛ dɛ de Aka nɔ kɔ pɔ kɛ de kanɔ nɛ ɔkɔ.

¹⁷ Kanɔ nɛ kalɛ ebui bhɛbhɛtɛ nɛ nu bafla, pɔ anɔ nɛ gɛ abhɛtɛ Kpaya yɛ tɛpɛpɛɛ aba za nɛ ɛkpã avɛnɔ mabeke mabeke mɛ.

Ɔshãkpɛkpɛ Nɛ Itrokristo Shu

¹⁸ Banuvɔ mumɔa, ɔɖatɛta gugɔɛ mɛ na nɛ, klɛ anasɛ gɛ nɔ tɛ nu sɛ otrokristo aba, ɔtsɔ̃nɛ kuratsyɛ otrokristo atɛ ba. Kana lɔ nyi kɛ nu ɔɖatɛta gugɔɛ.

¹⁹ Ba shɛ nɛ bulɔɛ shi, pɔ ba dɛ nu bulɔ banɔ kɛgbɛagba. Alasɛ onugɛ benu bulɔ banɔ ba ta wɔ bulɔ bha, pɔ balɛ tɛ shɛshɛ̃ nɛ kasɛ sɛ balɛ akanyaka edi nu bulɔ ayɛ.

²⁰ Pɔ nɔ yɛkɛ bubɔ sɛsra denɔ Ishubhubhui Anɔ nɛ ɔkɔ, klɛ wũnɔ petee nɔ nyi kɛgbɛagba.

²¹ Ɛtɛ́ ŋlɔmɛ kɔ nɔ alasɛ nɔ ti nyi kɛgbɛagba, pɔ alasɛ nɔ nyi lɛ klɛ alasɛ oturo oti de kɛgbɛagba mɛ.

²² Ane yɛ enu otroelete? Enu anɔ nɛ gɛ adaɛda sɛ Yesu enu Kristo. Anɔ alɛlɛ nɛ di yɛ nu otrokristo—yɛ adaɛda nɛ Aka anɛ̀ Eyi nɛ shu.

²³ Anɔnyanɔ gɛ ada kada nɛ́ Eyi nɛ́ shu Aka lɛ yɛ ahwɛ, ánɔ nɛ gɛ adɛmɛ atrɔ sɛ Eyi nɛ alɛ Aka nɛ tsyɛ alɛ yɛ ahwɛ.

²⁴ Nɔ di lɔ kɔ sɛ kɛgɛ nɔ nu denɔ kesikpɛkpɛ kɛ wɔ nɔɛ mɛ. Onugɛ kɛ bhɛtɛ ana, wũnɔ tsyɛ nɔ bɔ wɔ Eyi anɛ̀ Aka nɛ mɛ.

²⁵ Klɛ kɛnɛ nɛ aɖɔlu kɔ lɔ—ɛkpã mabekemabeke kuratsyɛ.

²⁶ Ɛŋlɔmɛ ebuia nɛ kɔ nɔ denɔ bagɛ ba wlãnkɛ sɛ tɛ ba gbanɛ nɔ ada lɛla.

²⁷ Wɔnɔ xũ nɛ, bubɔsɛsra nɛ gɛ nɔ yɛkɛ denɔ yɛ ɔkɔ bu wɔ nɔɛ mɛ, klɛ nɔ dɔ pɛɛ anɔnyanɔ sɛ tɛ akasɛ nɔɛ dɔ. Pɔ anasɛ gɛ yɛ bubɔsɛsra kasɛ nɔ nɛ ebui nɛ petee shu klɛ anasɛ gɛ bubɔsɛsra nɛ nu kɛgbɛagba, ganɛ kɛdɔ gɛ kɛyi dɔ—anasɛ gɛ kɛ kasɛ nɔ, nɔ wɔ yɛ mɛ.

Kpaya Yɛ Yialɛ

²⁸ Klɛ ɔtsyɔnɛ, banuvɔ mumɔa, nɔ za kɛlɛa bha nɛ yɛ mɛ, sɛ tɛ kibenɔ gɛ abe koeyi idzyi aba za bulɔ mɛ klɛ tɛ kɛwɔɛ̃ tɛku lɔ nɛ yɛ amɛ nɛ́ yɛ tɛbɛba mɛ.

²⁹ Onugɛ nɔ nyi sɛ enu anɔ dzyɔgo, nɔ nyi sɛ anɔnyanɔ gɛ abhɛtɛ kɛgɛ nu kɛdzyɔgo yɛ mɛ la mɔ yɛ.