1 Petro 5 - ONUGBÙ NYƐNYÃ VUVƆ

Kɔ Beshishe Nɛ Bayɛ̃sɔ

¹ Kɔ beshishe gɛ balɛ wũnɔɛ mɛ ibisi denɔ wũnɔ kɔ sɛ, anasɛ wɔnɔ mayɛ eshishe, kibuimɔɖɔ anɛ́ Kristo butɔ nɛ̀ agɛ yɛ tsyɛ aba mɔ tɛbhubhui gɛ ba be bukasɛ:

² Nɔ dzi Kpaya Ibhoshiha agbɛgbanɔ gɛ alɛ wɔnɔe si, nɔ de axwɛ anasɛ kpayaɔzakɔanɔ— ganɛ sɛ tɛ nɔ bhɛtɛ, pɔ nɔ bhɛtɛ anasɛ gɛ Kpaya apɛasɛ tɛ nɔ za, anɛ kɔba gbɛgbla pɛpɛɛ, pɔ tɛtɛtrɔ kɔ axwɛdɛdɛ,

³ tɔ ŋa bukusi nɛ bagɛ lɛ wɔesi, pɔ odzi kɛdɔ gɛ bamɔabhɛtɛ kɔ Ibhoshiha.

⁴ Klɛ kibenɔ gɛ Agbɛgbanɔ Ekusi ebe koɛyi, nɔ bɔ yɛ kɛ kabhaŋɛŋa kikutu gɛ kɛtɛ ba klo.

⁵ Bayɛ̃sɔ, nɛ kidzolɛlɛ nɛabha nɔ zhinɔ shu kɔ bagɛ benu wɔnɔ beshishie. Wũnɔ petee, nɔ nyumu aglɔ nyɛnyɛna kɛpɔtɛ, alasɛ, Kpaya alɔɛtiti nɛ bagɛ befekɛshu nɛ shu pɔ akɔ ɛyɛmɛyuyɔ bagɛ be nyɛnashu.”

⁶ Nɔ nyɛna wũnɔshu, kɛlɛso nɛ́ Kpaya yɛ ɛhwɛ gɛganɛ nɛesi, sɛ tɛ abe fekenɔ wunɔ nɛ kibe kplita mɛ.

⁷ Nɔ yɛkɔ wũnɔ butɔ petee ɔtrɔ yɛ abha alasɛ yɛ di wũnɔ abha.

⁸ Nɔ nyɛnashu klɛ tɛ nɔ bala. Ɔfufɔɛkpã agɛ atapɛ wũnɔɛ bui ebe tsi kana anasɛ gɛ adzyata egu apɛ anɔ sɛ tɛ evu atã zia.

⁹ Nɔ wlãnkɛ nɛ yɛ, nɔ za gɛganɛ nɛ́ tɛyɛyɛkɛŋa mɛ, alasɛ nɔ nyi sɛ wũnɔ badzyalɛ nɛ kanɔnɛmɛ petee ba mɔ butɔɛ nɛɛ di.

¹⁰ Klɛ ɛyamyuyɔ petee Kpaya, gɛ eklu nɔ avɛnɔ yɛ mabekemabeke ishubhubhui nɛ́ Kristoe mɛ, nɛ kɛlɛede gɛ nɔ mɔ butɔ nɛ kibe bhliyi mɛ, yɛnahwɛ ebe tsodzi wũnɔ dzu kititi klɛ aba kɔ nɔ gɛganɛ, mɔmɔ klɛ nɔ bɔ dzu ishuesi.

¹¹ Yɛ kemi kalɛkɔ ɔyɛkɔ vɛnɔ mabeke mabeke mɛ. Kɛbɛlɛmɛ.

Tɛsɛsɛnɔ Gugɔɛ

¹² Nɛ̀ tɛpɛplɛnɔ denɔ Silas kɔ, agɛ ɛyɛkɔ kɛlɛ anasɛ tɛyɛyɛkɛŋa adzya, ɛtɛ ŋlɔmɛ sɛsɛnɔ gugunu, ɛkpɛ nɔ kemi klɛ mɛ ɖɔ sɛ kɛnɛ kɛlɛnu Kpaya ɛyɛmɛyuyɔ gbɛagba. Nɔ za lɛ mɛ gɛganɛ.

¹³ Kristo busɔlɛha gɛ lɛ lɛ Babilonia gɛ eklu aplɛnɛ nɔ, ba sɛnɛ nɔ asɛsɛ, klɛ kanake meyi Marko tsyɛ asɛnɛ nɔ.

¹⁴ Nɔ sɛnɛ ɔhaglɔ nɛ tɛdɛdɛmɛnɔ ahwɛyɛyɛkɛ. Ishuyuyɔ kɔ wũnɔa gɛ nɔ lɛ Kristo mɛ.