1 Kɔrintioanɛ 9 - ONUGBÙ NYƐNYÃ VUVƆ

Kɛgɛ Nu Anɔkpɛkpɛ Nɛ Yɛ

¹ Ganɛ anɔ gɛ alɛ ishuahwɛ mɛ nu? Ganɛ anɔkpɛkpɛ mɛ nu? Ɛdɛmɔ Yesu bulɔ Apalete? Ganɛ wunɔ nu mɛ kɛxwɛwɛwa bubukasɛ nɛ Apalete nɛ mɛ?

² Kɛbɛlɛmɛ tsyɛ sɛ ɛdɛ nu anɔkpɛkpɛ kɔ banɔ gugɔɛ, kɛgbɛagba inu yɛ kɔ nɔ! Alasɛ wunɔ trɔ kɛklãgbu tɛtrɔ nɛ mɛ́ anɔkpɛkpɛxwɛ abha nɛ́ Apalete nɛ mɛ.

³ Kɛnɛ kɛlɛ mɛ kɔ bushunu kɔ bagɛ ba wlãnkɛ ebui nɛ mɛ.

⁴ Kɛ dzo ma kɔ bulɔ kɛŋɛŋa anɛ̀ kɛwũwɔɛ?

⁵ Kidzo ma kɔlɔ sɛ tɛ bu gbanɔ bulɔe dzini nɛ gɛ asɔlɛ nɛ ɔplɛnɔ bulɔ shu, anasɛ gɛ bakpɛkpɛ bhlatɔ anɛ̀ Apalete nɛ yɛadzalɛ anɛ Kefasɛ baa bhɛtɛ?

⁶ Pɛnɔ Mɛ nɛ Banabas ko gɛ bu ba waɛxɔɛ kɔ kabha didi?

⁷ Ane yɛ awa kɛxwɛ anasɛ keyutugbani gɛ abuya kɛbhɛ kɔ shu? Ane gɛ adɛ vãyɛ̃ buya klɛ atɛ ŋa yɛ eyuyu? Ane gɛ anyɔnɔ baga gɛ atɛ wɔɛ balɛ bumɔni?

⁸ Bu ɖɔ mɛ ɖɔ kibui nɛ denɔ Anɔdzyrame dɔ mumɔ tite ko? Anɛ kibui lɛ nɛ ko Ɔshã nɛ ɔɖɔ?

⁹ Alasɛ ba ŋlɔmɛ akpɛ Mose Ɔshã nɛ mɛ asɛ: “Tɛ nyã nɛtsyɔɛ kibenɔ gɛ ahɔ nikpe.” nɛtsyɔɛ bui kɛlɛ Kpaya aɖɔ?

¹⁰ Kɛgbɛagba aɖɔ kibui nɛ akɔ lɔ, sɛ aɖɔ? Ee, bulɔ aŋlɔmɛ kibui nɛ akɔ, alasɛ ayadɛ yɛ adɛ buya klɛ agɛ apuɔɛ dɔ apuɔɛ lɛ alasɛ tɛ ba bhɛtɛ lɛ ana nɛ kidzoenudidi sɛ ba ba mɔ balɛ yɛ nɛ kɛdɔ bubu nɛ mɛ.

¹¹ Onugɛ bu hwɔɛ ɔfufɔɛ amɔ yi kpɛ wunɔ mɛ, kɛ kpe fanɔ onugɛ bumɔ kanɔɛmɛ dɔ denɔ wunɔ kɔ?

¹² Onugɛ banɔ bhlatɔ kidzoenɛ lɛ balɛ ahwɛ sɛ tɛ bamɔ tɛpɛplɛnɔ denɔ wunɔ kɔ, kɛma sɛ tɛ bu yɛkɛ lɛ petee dɛ. Pɔ bu dɛ wa kidzoe nɛ xwɛ mɔmɔ. Kɛlɛ mazɛ lɛ mɛ, bu za nɛ kɛkanyaka ɔyɛkɔ dɛ sɛ bu he Kristo kibui dzyɔgo nɛ vɛnɔ kide.

¹³ Nɔ ti nyi sɛ bagɛ ba wɛxwɛ nɛ kpayavu bala ayɛkɛ alɛ dɔ ŋɛŋa denɔ kpayavu mɛ, klɛ bagɛ bawɛxwɛ nɛ basɔlɛvumokpo nɛabha balɛ ayɛkɛ kɛdɔ nɛ gɛ ba kɔ nɛ basɔlɛvumokpo nɛabha?

¹⁴ Nɛ kidzo lɛlɛ nɛabha, Apalete akɔ ɔshã sɛ bagɛ baɖɔ kibui dzyɔgo ba ba yɛkɛ balɛ kɛŋɛŋa denɔ kibui dzyɔgo ɖɛɖɔɛ mɛ.

¹⁵ Pɔ ɛka ga edzoa nɛ kanyaka abha. Klɛ ɛtɛ ŋlɔmɛ kɛbuinɛ nɛ kidzoenudidi sɛ tɛ nɔ bhɛtɛ ebuia nɛdi kɔ mɛ. Ɛba pɛɛ sɛ tɛ ɛtsi dɛ sɛ anɔ teli exedzo kɔ mɛ nɛ mɛ ishufifeke shu.

¹⁶ Pɔ kibenɔ gɛ ɛɖɔ kibui dzyɔgo, ɛtɛ bana ishufifeke, alasɛ kɛlɛ kɔ mɛ sɛ tɛ ɛɖɔ kibui dzyɔgo. Butɔ lɛ kɔ mɛ onugɛ ɛdɛ ɖɔ kibui dzyɔgo!

¹⁷ Onugɛ ɛɖɔ kibui dzyɔgo nɛ faã, kɛbhɛ lɛ kɔ mɛ; kɛɛ ma kana, mɛ kɛxwɛ gɛ bakpɛ mahwɛ kɛlɛ ko mɛ wa.

¹⁸ Kɛlɛalɛ kide kɛlɛ nu mɛ kɛbhɛ? Kɛnɛ nɛ ko: sɛ kɛbui dzyɔgo tɛɖɛɖɔ ɛba ɖɔɛ lɛ kɛbhɛ mayɛkɛ mayɛkɛ, klɛ so ɛtɛ mɔɛ dzo bhɛtɛ kɛdzyɔgo anɛ kibui dzyɔgo ɖɛɖɔ shu.

¹⁹ Kɛlɛlɛ mɛ sɛ ɛlɛ ishuahwɛ klɛ ɛdɛ nu anɔnyanɔ ayɛ, ɛ́bhɛtɛ ishu axwɛdɛ kɔ anɔnyanɔ, tɛ ɛmɔ banɔ gelee anasɛ gɛ ɛpɛɛ.

²⁰ Kɔ Yuɖanɛ ɛba dzi anasɛ Yuɖanɛ, sɛ tɛ iku Yuɖanɛ nɛ awɔ̃. Kɔ bagɛ ale ɔshã nɛesi ɛba dzi anasɛ anɔ gɛ alɛ ɔshã nɛesi (kɛlɛlɛmɛ sɛ mɛnahwɛ ɛma ɔshã nɛesi), so sɛ tɛ ɛmɔ bagɛ balɛ ɔshã nɛesi.

²¹ Kɔ bagɛ ɔshã nɛ ɔma balɛ ahwɛ ɛba dzi anasɛ anɔ teli gɛ ɔshã nɛ ɔma yɛ ahwɛ (kɛlɛlɛmɛ sɛ ɛma ishuahwɛ nɛ Kpaya ɔshã nɛesi pɔ ɛlɛ Kristo ɛlɛ Kristo ɔshã nɛesi), sɛ tɛ ɛbu bagɛ ɔshã nɛ ɔma balɛ ahwɛ.

²² Kɔ bagɛ ba gblɔdzɔ ɛba gblɔdzɔ́, sɛ tɛ ibu bagɛ ba gblɔdzɔ. Ɛba dzi kɛdɔ nɛ petee kɔ banɔ nɛ petee sɛ tɛ ganɔ kidzonyɛdzo abha tɛ ɛyɛkɛkɔ be teli.

²³ Ɛbhɛtɛ ebui anɛ petee nɛ kibui dzyɔgo nɛ tɔkpu, sɛ tɛ ɛba mɔ kapɛ nɛ tɛ yuyula nɛ gɛ lɛ kɛlɛ mɛ.

²⁴ Nɔ ti nyi sɛ nɛ ɛtsrɛmɛ obukɔ banɔ nɛ petee gɛ be be si nɛ ba kpɛsi, pɔ anɔ terikpo ko yɛ aŋa kabha? No bu tɛtsrɛmɛ nɛ kidzo tili lɛabha sɛ tɛ nɔ yɛkɛ kabha ŋɛŋa.

²⁵ Anɔnyanɔ gɛ awlãkɛu nɛ buwɔfu nɛ mɛ etsoku tɛkpɛkpasɛ gɛganɛ mɛ. Ba bhɛtɛ lɛ asɛ tɛ ba yɛkɛ kabhaŋɛŋa kɛkutu gɛ kɛ tɛ baza gelee, pɔ bulɔ bubhɛtɛ sɛ tɛ bu yɛkɛ kabhaŋɛŋa kɛkutu gɛ kɛbaza ɔvɛnɔ mabekɛ mɛ.

²⁶ Kɛlɛso ɛtɛ bu tɛtsrɛmɛ anasɛ anɔ nɛ gɛ ebu tɛtsrɛmɛ gɛ tɛtɛtrɔ ma kɛlɛ shu, ɛtɛ ta ekpli anasɛ gɛ anɔ gɛ ata ekpli nɛ kɛlɛ.

²⁷ Oo ɛtu mɛ shuidzya klɛ ɛbhɛtɛ lɛ mɛ anɔdzidzi sɛ tɛ nɛ kɛlɛede ɛɖɔ kibui dzyɔgo kɔ ba bhlatɔ, mɛnahwɛ be ti be tsodikpɛ mɛ abha ŋɛŋa mɛ.