1 Kɔrintioanɛ 2 - ONUGBÙ NYƐNYÃ VUVƆ

¹ Gɛ ɛba wunɔ kɔ, badzya mɔ, Ɛdɛ ba nɔ kɔ nɛ onugbu mɛ tsyɛmɛtsyɛmɛ ɔdɔgɔsɛ kibuinyinyi gbɛgbla anasɛ gɛ ɛɖɔ tɛmumɔɖɔ denɔ Kpaya shu tsre nɔ.

² Alasɛ gɛ ɛza wunɔ bha, ɛbhɛtɛ sɛ tɛ ɛdzɛkɛ kibuinyɛbui ɔdɛ Yesu Kristo nɛ yɛ tɛkpɛkplasɔ.

³ Ɛba nɔ kɔ nɛ butɔ anɛ kifu, anɛ tɛshushuku gelee.

⁴ Mɛ ɔsɔ anɛ kpayɛbui ɖɛɖɔ nɛ edinu kibuinyinyi anɛ anɔnu wuwɔɛ ebui, pɔ kinu Ɔfufɔɛ nɛ kemi nɛ tɛbubukasɛ,

⁵ kɛlɛso wunɔ tɛyɛyɛkɛŋa kɛtɛ trɔ banɔ kibuinyinyi abha, pɔ nɛ́ Kpaya bupu abha.

Kibuinyinyi Gɛ De Ɔfufɔɛ Nɛ Ɔkɔ

⁶ Pɔ, bu ɖɔ, kibuinyinyi ɔklasɔ nɛ beshishe nɛ shi, pɔ ganɛ agɔa nɛ mɛ kibuinyinyi ɔdɔgɔsɛ agɔa nɛ mɛ baga ŋɛabha, gɛ ba ta ba kibuinyɛbui ɔbha.

⁷ Ao, bu ɖɔ Kpaya kibuinyinyi kpukpu, kibuinyinyi gɛ ayɛkɔ ekpu klɛ Kpaya abhɛtɛ kɔ bulɔ kabhaŋɛŋa flogo gɛ abhɛtɛ kanɔ.

⁸ Bamani kanyaka nɛ agɔa nɛ mɛ edi nu kalɛesi, pɔ otɔsɛ be nu, bagɛ ata kpla ishudɛdanɛ Apalete nɛ asɔ.

⁹ Pɔ, anasɛ gɛ ba ŋlɔmɛ lu: “Kɛwɔ̃hu kanyaka dɛ mɔ, batɔ kanyaka dɛ nu, kɛdɛ ba anɔnyanɔ kɛtɔkpui mɛ kɛ gɛ Kpaya abhɛtɛ elu kɔ ba gɛ ba dɛmɛnɔ nɛ yɛ”—

¹⁰ pɔ Kpaya ebuakasɛ lɔ ganɔ yɛ Ɔfufɔɛ nɛabha. Ɔfufɔɛ nɛ oluawɔ̃di kɛdɔnyɛdɔ, Kpaya ekpukpu kuratsyɛ.

¹¹ Kɛlɛso ane yɛ nyi Anɔdzyrame tɔ kpui mɛ dɛ yɛnahwɛ ɔfufɔɛ gɛ lɔ lɛ yɛ mɛ? Kanake anɔnyanɔ etinyi Kpaya yɛ tɔkpui mɛ dɛ Kpaya Ɔfufɔɛ.

¹² Bu kayɛkɛ kanɔ nɛ mɛ ɔfufɔɛ pɔ Ɔfufɔɛ nɛ gɛ lo de Kpaya ɔkɔ, sɛ tɛ bu nu kɛgɛ Kpaya atɛ yɛkɔ kɔ lɔ fãa.

¹³ Kɛnɛ kɛlɛ lɔ ɖɔ, ganɛ nɛ ebui gɛ Anɔdzyrame kibuinyinyi gɛ akasɛ lɔ pɔ nɛ ebui nɛ gɛ Ɔfufɔɛ nɔ kasɛ, kɛ kasɛ ɔfufɔɛ gbɛagba nɛ ɔfufɔɛ mɛ ebui.

¹⁴ Anɔ nɛ gɛ Ɔfufɔɛ ɔma yɛ mɛ atɛ yɛkɛ dɔ denɔ Kpaya Ɔfufɔɛ mɛ, alasɛ lenu agãebui kɔ yɛ, klɛ atɛ be nu alɛesi, alasɛ ɔfufɔɛ mɛ la ba de.

¹⁵ Ɔfufɔɛ mɛ anɔ ekluebhui nɛ́ ebui nɛ petee shu, pɔ yɛnahwɛ ama gɛ anɔnyanɔ ebe kulu kebhui nɔ:

¹⁶ “Pɔ ane ye nyi Apalete nɛ tɔkpui mɛ gɛ ebe tsrenɛ yɛ?” Pɔ Kristo yɛ tɔkpui mɛ bui kɛlɛ lɛ bu lɔ ahwɛ.