ZECHARIAH 6 - Hakcipta - Biatah Bidayuh

Kiris Keya ka Darŭm Pŭmŭh Pat Krita Kuda

¹ Aku agi dinge kiris keya ka darŭm pŭmŭh. Kari ati aku kiris pat krita kuda ruah so asah duwŭh darŭd timaga.

² Sibungas krita kuda anŭ dog tarik kuda kuda adi bireh, ka adi numbor duwŭh dog tarik kuda kuda adi singŭt,

³ adi numbor taruh dog tarik kuda kuda adi buda, ka adi numbor pat dog tarik kuda kuda adi bibatŭng.

⁴ Komŭnŭ aku siken malaikat anŭ, “Tuan, ani rati krita krita kuda ati?”

⁵ Ayŭh nam, “Ati inŭh pat sabak; sabak ati bauh mandŭg so yŭn TUHAN adi nguasa sopŭrŭg kayuh di ong.”

⁶ Krita kuda adi dog tarik kuda kuda adi singŭt inŭh masang ka parad ka utara nuju Babylonia, kuda kuda adi buda inŭh masang ka parad ka barat, ka adi bibatŭng masang ka rais di siratan.

⁷ Buang ngara ruah, kuda kuda adi bibatŭng anŭ mbŭh dŭh sabar an di pirasa ong. Malaikat anŭ nang, “Panu di pirasa ong!” Ngara sawŭ di.

⁸ Komŭnŭ malaikat anŭ nyirais nang di aku, “Kuda kuda adi panu ka parad ka utara nuju Babylonia mbŭh kadud baji TUHAN.”

Pesan Bada Na Makota Raja di Ubak Joshua

⁹ TUHAN nggen pinganang ati di aku.

¹⁰ Ayŭh nang, “Tambit pinganggen so ngara adi dog taran ka rais tami, Heldai, Tobijah, ka Jedaiah, ka rasu di ka ramin Josiah anak Zephaniah. Sopŭrŭg ngara anŭ mbŭh pari so dog taran di Babylonia.

¹¹ Ndai ndi makota so pirak ngga mas adi ngara mbŭh nggen, ka na-i di ubak Imam Bās, Joshua anak Jehozadak.

¹² Kidaan di ayŭh nang TUHAN Bisa-pŭrŭg nang, ‘Daya adi dog kadŭn Daan re mujur di tarun yŭn adŭp-i ka pari pijog Ramin TUHAN.

¹³ Ayŭh inŭh sianŭ adi re pari pijog-i ka re kambat stabi adi dog nggen di raja, ka ayŭh re mritah daya-i. Ndi naan imam re mijog ngapid takta-i, ka ngara re samah nyiraja darŭm damai ka bamai.’

¹⁴ Makota anŭ re jadi tandā pinatŭng di Ramin TUHAN yŭn Heldai, Tobijah, Jedaiah, ka Josiah.”

¹⁵ Daya so tarun adi jo re mandŭg ka turung pari pijog Ramin TUHAN. Ka kan-i mbŭh kamas dog pijog, kuu re puan nang TUHAN Bisa-pŭrŭg inŭh adi pait aku ka kuu. Kayuh anŭ re sawŭ jadi kambŭi kuu ngga siabo asŭng mu tunda pesan TUHAN adi Tapa mu.