TIBIRIK 20 - Hakcipta - Biatah Bidayuh

Abraham ngga Abimelech

¹ Abraham bipindah so Mamre di ka parad siratan tarun tana Canaan ka rŭŭ di asah Kadesh ngga Shur. Ripas anŭ, darŭm ayŭh gibabŭ rŭŭ di Gerar,

² ayŭh agi nang sawŭn-i Sarah sude dayung-i. Jadi Raja Abimelech di Gerar bada Sarah dog taban ka yŭn adŭp-i.

³ Ndi ngarŭm Tapa pinandŭng adŭp-I di ayŭh darŭm pŭmŭh ka nang, “Kuu re kabŭs, amai kuu mbŭh tambit dayung ati, adi mbŭh banan.”

⁴ Pak Abimelech gibayuh nyindŭk Sarah, ka ayŭh nang, “TUHAN aku dŭh sarah! Kaam raan pirabur aku ngga bara daya ku kah?

⁵ Adŭp Abraham agi nang Sarah sude dayung-i, ka adŭp Sarah sakanŭ gŭh. Aku ndai kayuh ati ngga pikir-kira atin adi bisig, ka aku mating ndai sarah.”

⁶ Tapa nam ayŭh darŭm pŭmŭh-i, “Sawŭ, Aku puan nang kuu mbŭh ndai simŭnŭ ngga pikir-kira atin adi bisig; ngapŭi meh Aku bitan kuu so ndai dosa rawan Aku ka dŭh bada kuu tama ayŭh.

⁷ Pak madin, nggen dayung anŭ pari ka banŭh-i. Ayŭh anŭ nabi, ka ayŭh re bidua yŭn mu, isa kuu dŭh kabŭs. Pak kambŭi kuu dŭh nggen ayŭh pari, Aku bakan kuu nang kuu re kabŭs, kuu ngga sopŭrŭg daya mu.”

⁸ Awar isan isan kan andu mbŭh jawa, Abimelech bagan sopŭrŭg pinurung-i ka kidaan di ngara pasar kayuh adi mbŭh jadi, ka ngara mbŭh samah taru.

⁹ Komŭnŭ Abimelech bagan Abraham ka siken di ayŭh, “Ani ati adi mbŭh mu ndai di kieh? Ani sarah adi mbŭh ku ndai di kuu adi bada kuu taban pinyusah ati di aku ngga di rais ku? Kuu mbŭh ndai di aku kayuh adi kuu dŭh patut ndai.

¹⁰ Ani sabab kuu ndai kayuh mun ati?”

¹¹ Abraham nam, “Aku pikir mating daya digiti adi biyŭn atin taru di Tapa ka ngga simŭnŭ tatu ngara re siŭ aku yŭn tambit sawŭn ku.

¹² Ayŭh taŭn sawŭ sude dayung ku. Ayŭh anak dayung sama ku, pak dŭh so sindŭ ku, jadi aku sawŭn ayŭh.

¹³ Jadi kan Tapa mbŭh pait aku bada bu so ramin sama ku di ka tarun tana rais bŭkŭn, aku nang di ayŭh, ‘Kuu bisa kiren munki masam nundok kuu di aku darŭm kuu kidaan di barang naan daya aku ati kaka dari mu.’ ”

¹⁴ Komŭnŭ Abimelech nggen Sarah pari ka Abraham, ka nganŭ gŭh ayŭh nggen di Abraham biri, sapi, ka daya urun.

¹⁵ Ayŭh nang di Abraham, “Ta sopŭrŭg-i tarun tana ku; rŭŭ di tadŭ yŭn kuu raan.”

¹⁶ Komŭnŭ ayŭh nang di Sarah, “Aku nggen di kaka dari mu siribu kiping pirak adi jadi tandā di sopŭrŭg daya adi agi ngga kuu nang kuu dŭh sarah; barang naan daya re puan kuu mating ndai sarah.”

^17-18 Sabab kayuh adi mbŭh jadi di Sarah, adi sawŭn Abraham, TUHAN mbŭh bada tadŭ tadŭ dayung di istana Abimelech aboh. Jadi Abraham bidua yŭn Abimelech ka Tapa pibua ayŭh. Tapa pibua gŭh sawŭn-i ka bara urun dayung-i, isa ngara dapŭd mira biranak dinge.