ROME 4 - Hakcipta - Biatah Bidayuh

Abraham adi Suto Danding

¹ Ani meh re ta nang, pasar Abraham, adi sama bangsa ta? Ani ko-i so?

² Kambŭi ayŭh mbŭh bamai ngga Tapa da kayuh kayuh adi-i ndai, ayŭh biyŭn kayuh yŭn-i mingangŭn, pak dŭh di sirung jawin Tapa.

³ Surat-kudus nang, “Abraham sabah di Tapa, ka sabab pinyabah-i Tapa mbŭh ngitong ayŭh tŭnggŭn.”

⁴ Daya adi nyiraja dog nggen gaji-i, pak anŭ dŭh-i pinganggen; anŭ inŭh kayuh adi-i dapŭd so turang udas adŭp-i.

⁵ Pak ngara adi bisangan di pinyabah, dŭh di kraja pingandai, ka adi sabah di Tapa anŭ adi bisa nang daya adi sarah dŭh sarah, pinyabah anŭ inŭh adi Tapa pakai ngga bada ngara bamai ngga adŭp-I.

⁶ Anŭ inŭh rati pinganang David kan ayŭh minyu pasar pinyigaŭn daya adi Tapa ngitong tŭnggŭn, sunggu daya anŭ mating ndai ani ani adi yŭn-i patut dapŭd berkat anŭ:

⁷ “Gaŭn inŭh ngara adi sarah-i mbŭh dog apun; dosa-i Tapa mbŭh kambŭt!

⁸ Gaŭn inŭh daya anŭ adi dosa-i Tuhan dŭh re ngitong!”

⁹ Agi kah pinyigaŭn anŭ adi David nyabŭt, tung ngara adi mbŭh bisunat adŭ? Manŭn dŭh! Pinyigaŭn anŭ mbŭh tung ngara adi dŭh bisunat ani. Amai ata mbŭh ngagit pinganang Surat-kudus, “Abraham sabah Tapa, ka sabab pinyabah-i Tapa mbŭh ngitong ayŭh tŭnggŭn.”

¹⁰ Sinde kayuh anŭ jadi? Agi kah-i diŭ so Abraham bisunat puan kah sundis? Ayŭh diŭ, dŭh ripas Abraham bisunat.

¹¹ Sundis ayŭh bisunat, buang sunat-i anŭ batur tandā ngga kiren nang sabab pinyabah-i Tapa mbŭh ngitong ayŭh tŭnggŭn diŭ so-i bisunat. Ngapŭi Abraham inŭh sama darŭm roh yŭn sopŭrŭg daya adi sabah di Tapa adi-I mbŭh ngitong tŭnggŭn, sunggu ngara dŭh bisunat.

¹² Ayŭh gŭh sama ngara adi mbŭh bisunat, anŭ inŭh, sama ngara adi, darŭm mbŭh bisunat, udip darŭm pinyabah adi brimun ngga tung sama ta Abraham sibayuh ayŭh bisunat.

Janji Tapa dog dapŭd so ka Pinyabah

¹³ Di andu Tapa bijanji ngga Abraham ka ngga bara sesang-i nang ong re dog dapu-i, ayŭh sawŭ dapu, dŭh sabab Abraham sita Ukum-adat, pak sabab ayŭh sabah buang mbŭh Tapa ngitong tŭnggŭn.

¹⁴ Amai kambŭi kayuh adi Tapa bijanji an nggen dog nggen di ngara adi sita Ukum-adat, sirati-i pinyabah mbŭh kayuh braŭn ka janji Tapa mbŭh dŭh biguna.

¹⁵ Ukum-adat taban baji Tapa; pak di yŭn ukum-adat mating, diginŭ daya mating nyibireu ukum-adat.

¹⁶ Jadi janji anŭ bisangan di pinyabah, siŭn-i dog jamen jadi pinganggen bās Tapa di sopŭrŭg sesang Abraham; dŭh di ngara adi sita Ukum-adat adŭ, pak di ngara adi sabah mun Abraham ani. Amai Abraham inŭh sama sopŭrŭg ta darŭm roh;

¹⁷ sak adi nang Surat-kudus, “Aku mbŭh ndai kuu da jadi sama sopŭrŭg bangsa.” Jadi janji anŭ inŭh kana di batŭh Tapa, adi Abraham sabah; Tapa adi pakat daya adi mbŭh kabŭs ka adi napa sopŭrŭg kayuh adi ko mating.

¹⁸ Abraham sabah buang harap; di tika susah re biyŭn pingarap ayŭh babŭ gŭh biyŭn pingarap, ngapŭi ayŭh jadi “sama yŭn bagŭ bangsa.” Nimun Surat-kudus nang, “Sesang mu re jadi bagŭ nimun dudu bitang.”

¹⁹ Ayŭh nganŭ mbŭh re siratus sawa umbur-i; pak pinyabah-i dŭh ramah kan ayŭh ingat pŭrŭng adŭp-i adi mbŭh raru minyamba ka mbŭh re kabŭs, buang adŭp sawŭn-i Sarah taŭn dŭh tungang biranak.

²⁰ Pinyabah Abraham dŭh gayo, ka dŭh-i kurang sabah di janji Tapa anŭ; pinyabah-i nagap ayŭh, ka ayŭh muji Tapa.

²¹ Ayŭh mbŭh ruai sabah Tapa tungang ndai anŭ adi-I ko bijanji an ndai.

²² Ngapŭi meh Abraham, sabab pinyabah-i, “mbŭh Tapa ngitong tŭnggŭn.”

²³ Pinganang anŭ “mbŭh Tapa ngitong tŭnggŭn” dŭh dog nuris yŭn-i adŭ.

²⁴ Pinganang anŭ dog nuris yŭn ta adi re dog ngitong tŭnggŭn ani, adi sabah di Ayŭh adi pakat Jesus Tuhan ta so kabŭs.

²⁵ Sabab dosa ta ayŭh dog nggen ukum kabŭs, ka dog pakat udip bauh siŭn ata dapŭd bamai ngga Tapa.