ROME 2 - Hakcipta - Biatah Bidayuh

Ukum so Tapa

¹ Angān nyarah daya kah? Angān dŭh re dapŭd nyibandar adŭp ngan, tadŭ tadŭ angān. Amai kan angān nyarah daya pak adŭp ngan ndai sarah anŭ gŭh, angān mbŭh nunggu adŭp ngan.

² Ata puan Tapa batur kan Ayŭh nyarah daya adi ndai sarah adi mun anŭ.

³ Pak angān, bara dingan ku, ngukum daya adi ndai sarah anŭ adi adŭp ngan agi gŭh ndai! Angān pikir angān re tungang mangān ukum so Tapa kah?

⁴ Puan kah nyamtadar-i, angān ngamun atin mandis-I adi raru bās, atin duduh-I, ka atin sabar-I. Tatu angān mbŭh puan Tapa taŭn-I mandis, sabab Ayŭh raan bada angān marik pimudip ngan pari ka adŭp-I.

⁵ Pak atin ngan karas buang baking, ngapŭi angān mbŭh ndai ukum ngan rabis bat-i di Andu baji Tapa ngga ukum-i adi tŭnggŭn dog pinandŭng.

⁶ Amai Tapa re maras barang naan ata nanyam pingandai ta.

⁷ Agi kada daya piguruh adŭp-i ndai kana, ka jiroh bragah, stabi, ka pimudip adi dŭh puan pinyikabŭs; di ngara Tapa re nggen udip adi sawŭ adi tan adu adu.

⁸ Adi bŭkŭn taŭn-i sibut ka tirawan kayuh adi batur, siŭn-i tunda kayuh adi sarah; di ngara Tapa re kiren baji-I.

⁹ Re agi sangsara ngga jera-birasa yŭn sopŭrŭg ngara adi ndai kayuh adi arap; diŭ yŭn daya Jahudi ka komŭnŭ yŭn daya adi dŭh bangsa Jahudi.

¹⁰ Pak Tapa re nggen bragah, stabi, ka damai di sopŭrŭg adi ndai kayuh adi kana, diŭ di daya Jahudi, komŭnŭ di daya adi dŭh bangsa Jahudi.

¹¹ Amai Tapa, dŭh-I mien daya.

¹² Daya adi dŭh bangsa Jahudi dŭh-i biyŭn Ukum-adat Moses; ngara bidosa ka mbŭh manyap amai dŭh biyŭn Ukum-adat. Daya Jahudi biyŭn Ukum-adat; ngara bidosa ka dog nyarah Ukum-adat.

¹³ Amai dŭh-i so ka dingah Ukum-adat daya bamai ngga Tapa, pak so ka ndai kayuh adi Ukum-adat pesan daya da ndai.

¹⁴ Daya adi dŭh bangsa Jahudi dŭh-i biyŭn Ukum-adat; pak tiap kari ngara ndai darŭm dŭh rada kayuh adi Ukum-adat pesan, anŭ mbŭh ukum-adat ngara, saja-i ngara dŭh biyŭn Ukum-adat.

¹⁵ Pimudip ngara mbŭh kiren nang kayuh adi Ukum-adat pesan agi dog nuris darŭm atin ngara. Pikir-kira atin ngara kiren kayuh anŭ sawŭ, amai pikir-kira ngara agi andu-i nyarah ka agi andu-i nyibandar ngara.

¹⁶ Jadi meh, nanyam ka Agah Kana adi aku nyuse, simŭnŭ inŭh-i re di Andu Tapa darŭm Jesus Kristus ngayag pikir-kira manusia adi bisukan.

Daya Jahudi ngga Ukum-adat

¹⁷ Angān boh? Angān nang adŭp ngan daya Jahudi; angān bisangan di Ukum-adat ka nyambuh adŭp ngan pasar Tapa;

¹⁸ angān puan ani adi Tapa raan angān ndai, ka mbŭh birajar so Ukum-adat mien kayuh adi batur;

¹⁹ angān tatu puan nang angān mbŭh tukang kayak daya adi karak, jawa yŭn ngara adi darŭm karŭm,

²⁰ gurū yŭn ngara adi budo, ka gurū yŭn ngara adi bawa. Angān mbŭh tatu puan nang darŭm Ukum-adat angān biyŭn pinyipuan ngga ajar adi sawŭ ngga sukup-i.

²¹ Angān ngajar daya bŭkŭn, pak mani dŭh ngajar adŭp ngan? Angān ngajar nang, “Dŭhnyah naku!” pak dŭh kah angān naku gŭh?

²² Angān nang, “Dŭhnyah tanggah” pak dŭh kah angān tanggah gŭh? Angān tiru di tibudo, pak dŭh kah angān adi mirupak bari bari-sambah ngara?

²³ Angān mingangŭn adŭp ngan biyŭn ukum-adat Tapa, pak dŭh kah angān nggen mangŭh di Tapa darŭm angān miranggar ukum adat-I.

²⁴ Surat-kudus nang, “Sitagar angān adi daya Jahudi, daya adi dŭh bangsa Jahudi mbŭh kinarap Tapa.”

²⁵ Kambŭi angān sita Ukum-adat, adat sunat ngan agi kana-i; pak kambŭi angān nyibireu Ukum-adat, mbŭh kana dŭ inŭh angān dŭh bisunat.

²⁶ Kambŭi daya adi dŭh bangsa Jahudi, adi dŭh bisunat, sita pinyipesan Ukum-adat, dŭh kah Tapa nyirundeng ayŭh mun adi mbŭh bisunat?

²⁷ Jadi angān daya Jahudi meh re dog nunggu daya adi dŭh bangsa Jahudi sabab angān miranggar Ukum-adat, saja-i angān biyŭn-i dog nuris ka mbŭh bisunat; pak ngara sita Ukum-adat saja-i ngara taŭn dŭh bisunat.

²⁸ Amai sawŭ, asi meh adi sawŭ daya Jahudi, adi batur bisunat? Ayŭh dŭh sianŭ adi daya Jahudi adi mbit dŭn so kayuh tura ka sapa, adi sunat-i taŭn pingandai pŭrŭng.

²⁹ Sibandar-i, daya Jahudi adi sawŭ inŭh daya Jahudi adi tura ka darŭm, adi mbŭh bisunat di atin-i, ka anŭ inŭh pingandai Roh Tapa, dŭh pingandai Ukum-adat adi dog nuris. Daya adi mun anŭ trima puji so Tapa, dŭh so manusia.