RAGU 2 - Hakcipta - Biatah Bidayuh

¹ Aku ati bunga tarun di Sharon, bunga lili di dau darŭd.

Dari

² Mun bunga lili di karu reja inŭh dayung ku di dupan bara dayung.

Dayung

³ Mun tŭngŭn epal di karu tŭngŭn kayuh di tuān, simŭnŭ inŭh dari adi aku siŭt kambŭi danding ngga dari dari adi bŭkŭn. Aku gagā guru di sayung-i, ka buwa-i sidi kinyam ku.

⁴ Ayŭh taban aku ka birit-bās adi yŭn-i biruman piningga-i di aku inŭh pinyiawang.

⁵ Nyibake aku ngga pisŭk anggor ka piranyah aku ngga epal! Aku ati sikirau pinyiawang.

⁶ Tangan bait-i di ribo ubak ku, ka tangan tauh-i puras aku.

⁷ Bijanji ngga ku, bara dayung Jerusalem; bipayu pakai peyu ngga jerak angān dŭh re nyirirog pinyiawang ami.

Ragu adi numbor Duwŭh Dayung

⁸ Aku dingah sirŭŭn dari adi aku awang. Ayŭh mandŭg bikaduh kudak darŭd mutas sandah di ka yŭn ku.

⁹ Dari adi aku awang mbŭh keya ka jerak, keya ka anak peyu. Ayŭh mijog diginŭ ngapid sindung. Ayŭh nyingo so pinjan ka kimat so abuh pinjan.

¹⁰ Dari adi aku awang minyu ngga aku. Mandŭg garang, dayung adi aku awang; Dayung ku, tunda aku.

Dari

¹¹ Tipuh madud mbŭh ripuan; ujen mbŭh saya;

¹² di sapa rais bunga mbŭh mirarak. Ati inŭh tipuh yŭn biragu; ragu manuk tikukur dog dingah di ŭmŭh.

¹³ Buwa ara mbŭh piguru masak; tŭngŭn anggor mbŭh buuh ramak bada rarak-i. Mandŭg meh garang, dayung adi aku awang; Dayung ku, tunda aku.

¹⁴ Kuu keya ka manuk asang adi bisukan di asah asah batuh. Bada aku tingga jawin mu adi ramus ka dingah sirŭŭn mu adi sangŭn.

¹⁵ Nakap musang musang adi sŭ anŭ, diŭ so ngara pirusak teya anggor ta adi aŭn mirarak.

Dayung

¹⁶ Dari adi aku awang inŭh jaku, ka aku inŭh jangi. Ayŭh paan kaban dāng-i di karu bunga lili

¹⁷ ndŭg ka sabak isan isan poh ka karŭm miyap. Pari, dayung ku, mun jerak, mun anak peyu di darŭd Bether.