PITAS 6 - Hakcipta - Biatah Bidayuh

Pinyibakan adi Bŭkŭn

¹ Mbŭh kah kuu bijanji an tanggong utang daya, nak?

² Mbŭh kah kuu dog nakap sitagar pinganang adŭp mu, tikapung bada janji adi adŭp mu ndai?

³ Kambŭi simŭnŭ, nak, kuu mbŭh darŭm kuasa daya anŭ, pak simuti inŭh kuu dapŭd pirupas adŭp mu: rikas di ka yŭn-i, ka mite ayŭh pirupas kuu.

⁴ Dŭhnyah kuu bŭŭs puan kah rŭŭ-paya.

⁵ Ruah so jarat anŭ mun manuk bait mun peyu rupas so pingasū.

⁶ Daya tibanga patut birajar so gaya pimudip subi.

⁷ Ngara dŭh biyŭn pinguru, pingubak, puan kah pimritah,

⁸ pak ngara nguruk pinguman di tipuh paras, sidia yŭn tipuh madud.

⁹ Ndŭg sinde daya tibanga anŭ guring? Sinde ayŭh re makat so ambok-i?

¹⁰ “Aku re mŭnyŭp nyitiro,” ayŭh nang; “Aku re kŭkŭn tangan ku ka guring nyitiro.”

¹¹ Pak sitadŭn ayŭh bŭŭs, ayŭh re dog nyatŭk udip sirata adi re nyerang ayŭh keya ka pirupak adi bisinyata.

¹² Daya ginaka, adi dŭh biguna, kadong daya digiti diginŭ.

¹³ Ngara main batŭh ka main tangan ngga nipu kuu,

¹⁴ buang darŭm pikir-i adi bidikok, bipikir kayuh adi arap, kiruyok daya digiti diginŭ.

¹⁵ Sabab anŭ, pinyirusag re gŭgŭh nyatŭk ngara, ka ngara re binasa ndŭg ka kabŭs.

^16-19 Agi ju masam kayuh adi TUHAN tiru ka dŭh an tandah: udip gambung, baba adi kadong, tangan adi an siŭ daya adi dŭh sarah, pikir adi mirasang pingandai ginaka, kaja adi rikas ndai kayuh arap, Saksi adi ari nggen taksi kadong, daya adi ndai kaii di dupan jerā.

Pinyibakan pasar Tanggah

²⁰ Ndai anŭ adi sama mu kidaan di kuu, nak, ka dŭhnyah kambŭt ajar so sindŭ mu.

²¹ Ari nŭh ingat pinganang ngara, nyikŭn nŭh darŭm atin mu.

²² Ajar ngara re nguru kuu darŭm pimanu mu, grindung kuu singarŭm, ka pitayan kuu sandu.

²³ Ajar ngara inŭh prita adi jawa; pinganang ngara inŭh adi dapŭd ngajar kuu munki kuu patut udip.

²⁴ Ajar ngara dapŭd pijo kuu so dayung adi arap, so pinganang nyikuro adi ruah so baba sawŭn daya.

²⁵ Dŭhnyah ripong di pinyiramus ngara; dŭhnyah rakat bada kidap batŭh ngara.

²⁶ Daya tungang bayar dayung sundar ngga rega ndi baru ruti, pak tanggah ayŭh re bayar ngga asŭng adŭp-i.

²⁷ Bisa kah kuu taban apui di sudo mu ka piraka mu dŭh sau?

²⁸ Bisa kah kuu panu di tunduh bam apui ka kaja mu dŭh raus?

²⁹ Mun anŭ gŭh bisā-i nŭŭh bŭŭs ngga sawŭn daya. Asi asi adi ndai simŭnŭ re sangsara.

³⁰ Daya dŭh ngamun pinaku kambŭi ayŭh naku pinguman darŭm ayŭh sibŭrŭk;

³¹ pak kambŭi ayŭh dog dapŭd, ayŭh dŭh siŭn dŭh bayar ju rupet rabis; ayŭh dŭh siŭn dŭh gati ngga sopŭrŭg kayuh adi-i biyŭn.

³² Daya adi tanggah dŭh biyŭn pikir. Ayŭh pirusak adŭp-i.

³³ Ayŭh re dog pimangŭh ka dog pukong; dŭn-i re adu adu arap.

³⁴ Baji banŭh daya re bisā di tika ayŭh mise; ayŭh re raru baji buang mating atin masi-i kan ayŭh maras dendam.

³⁵ Ayŭh dŭh an trima pinyibayar; mating kayuh re dapŭd nyikadud atin baji-i.