PITAS 31 - Hakcipta - Biatah Bidayuh

Pinyitayan yŭn Raja

¹ Ati inŭh pinyitayan adi sindŭ Raja Lemuel so Massa nang di ayŭh:

² “Kuu inŭh anak adi aku siŭt, adi pinyinam dua ku. Ani re ku nang di kuu?

³ Dŭhnyah saat pinyibake mu ngga main dayung ka dŭhnyah saat duit mu di ngara; mbŭh bagŭ raja rusak bada ngara.

⁴ Dingah, Lemuel. Raja dŭh patut nok wain bait gira arak.

⁵ Kan ngara nok, ngara kambŭt ukum-adat ka nyibireu hak daya sirata.

⁶ Arak inŭh yŭn daya adi re kabŭs, yŭn daya adi sangsara.

⁷ Tandah ngara nok ka kambŭt udip sirata ka udip sangsara ngara.

⁸ “Minyu yŭn daya adi dŭh dapŭd minyu yŭn adŭp-i. Grindung hak sopŭrŭg ngara adi dŭh bigaya.

⁹ Minyu yŭn ngara ka jadi akim adi tŭnggŭn. Grindung hak ngara adi sirata ngga adi susah.”

Sawŭn adi Kana

¹⁰ Dŭh sanang jiroh sawŭn adi kana! Ayŭh rabis brega so mas pirak!

¹¹ Banŭh-i na pingarap-i di ayŭh, ka ayŭh dŭh re kurang kayuh.

¹² Sitŭkŭd-i udip, ayŭh ndai kana di banŭh-i ka bŭn kandam ayŭh.

¹³ Ngga sukup pinyiraan ayŭh nguruk buruh biri ka nanun banang linen.

¹⁴ Ayŭh taban pinguman mari so tarun jo, keya ka kapar dagang.

¹⁵ Ayŭh makat awar diŭ so andu jawa amai an sidia pinguman yŭn rawang-i ka kidaan di bara daya gaji-i kayuh adi re ngara ndai.

¹⁶ Ayŭh jiroh tana ka miris-i, ka ngga duit adi-i mbŭh dapŭd ayŭh ndai teya anggor.

¹⁷ Ayŭh dayung adi gagah, bake buang rajin.

¹⁸ Ayŭh puan sopŭrŭg kayuh adi ndai-i brega, ka nyiraja ndŭg sitŭrŭp ngarŭm.

¹⁹ Ayŭh ndai tiburi adŭp-i ka nanun piraka adŭp-i.

²⁰ Ayŭh dŭh bidagis ngga daya adi sirata ka adi susah.

²¹ Ayŭh dŭh gapang di tipuh madud, sabab rawang-i biyŭn piraka paras.

²² Ayŭh ndai tapas ambok ka nēn piraka adi dog ndai so banang linen adi jarŭh.

²³ Banŭh-i daya adi dog puan ratus, ndi so bara pinguru rayat.

²⁴ Ayŭh ndai piraka ka bŭŭng kupong, ka jua-i di daya dagang.

²⁵ Ayŭh bake ka dog stabi ka dŭh taru ani re jadi sundis andu.

²⁶ Piminyu pinganang-i bijak buang duduh.

²⁷ Ayŭh taŭn marar dŭh paya ka kingat pinyiraan rawang-i.

²⁸ Bara anak-i nganju ayŭh, ka banŭh-i muji ayŭh.

²⁹ Ayŭh nang, “Bagŭ sawŭn daya kana, pak kuu inŭh adi siabo kana.”

³⁰ Pinyiramus jawin dŭh bisa dog sabah, pak dayung adi stabi di TUHAN patut dog muji.

³¹ Muji ayŭh amai sopŭrŭg pingandai-i. Ayŭh patut dog stabi daya bagŭ.