PITAS 23 - Hakcipta - Biatah Bidayuh

Pinganang Bijak adi numbor Nŭm

¹ Kan kuu guru re man ngga daya bās, dŭhnyah kambŭt asi daya anŭ.

² Kambŭi kuu daya adi pirusong, nakit ngga adŭp mu munki kuu man.

³ Dŭhnyah pirusong ngga pinguman adi ayŭh ngidang; kadŭ ayŭh an kudog kuu.

Pinganang Bijak adi numbor Ju

⁴ Kuu an sukup bijak dŭh pijera adŭp mu gruwŭn an kaya.

⁵ Duit mu bisa miyap ngga ndi kidap batŭh, mun kah duit anŭ biyŭn urad ka mikabur bu mun beuh.

Pinganang Bijak adi numbor Mai

⁶ Dŭhnyah man ayō daya adi bidagis bait pirusong man pinguman sidi anŭ adi ayŭh ngidang.

⁷ “Bah nambah,” ayŭh nang, pak dŭh ngga siabo atin-i. Pinganang-i mandis pak isi atin-i bŭkŭn.

⁸ Kuu re nguta kayuh adi kuu man, ka sopŭrŭg pinganang puji mu re jadi au-tarun.

Pinganang Bijak adi numbor Prii

⁹ Dŭhnyah minyu bijak ngga daya adi budo; ayŭh dŭh biguna di pinganang mu.

Pinganang Bijak adi numbor Simŭng

¹⁰ Dŭhnyah ngana tandā baat adi amba puan kah sirapas tana anak tumang.

¹¹ TUHAN adi bikuasa inŭh pingibān ngara, ka Ayŭh re turung ngara rawan kuu.

Pinganang Bijak adi numbor Simŭng Ndi

¹² Nakit dingah gurū mu ka birajar sikiang kuu dapŭd birajar.

Pinganang Bijak adi numbor Simŭng Duwŭh

¹³ Dŭhnyah abah disiplin anak. Pasut dŭh re siŭ ngara.

¹⁴ Sibatur-i, kuu nyiramat asŭng ngara.

Pinganang Bijak adi numbor Simŭng Taruh

¹⁵ Nak, kambŭi kuu bijak, atin ku gaŭn.

¹⁶ Aku re mingangŭn kan aku dingah kuu minyu pinganang bijak.

Pinganang Bijak adi numbor Simŭng Pat

¹⁷ Dŭhnyah sina di daya adi bidosa; bada atin taru ka atin stabi di TUHAN biguna dŭ darŭm pimudip mu,

¹⁸ isa jŭ pimudip mu mujur.

Pinganang Bijak adi numbor Simŭng-Rimŭh

¹⁹ Dingah, nak, kuu an bijak ka an nakit bipikir pasar aran pimudip mu.

²⁰ Dŭhnyah bigaur ngga daya adi nok raru bagŭ wain puan kah daya adi gira man.

²¹ Daya pimabuk ngga daya adi pirusong re jadi daya sirata. Kambŭi kuu man ka bŭŭs adŭ, kuu re rikas pakai jamut ndu piraka.

Pinganang Bijak adi numbor Simŭng Nŭm

²² Dingah pinganang pitayan sama mu; kambŭi dŭh sabab ayŭh kuu mating di ong. Kan sindŭ mu mbŭh minyamba, dŭhnyah dŭh piduri ayŭh.

²³ Pinyawŭ, pinyibijak, ajar, ka pinyimirati; sopŭrŭg-i bisa dog miris pak raru brega re nŭŭh jua.

²⁴ Sama daya gaŭn kan anak-i tŭnggŭn. Kuu bisa mingangŭn yŭn anak adi bijak.

²⁵ Bada sama ngga sindŭ mu mingangŭn di kuu; bada sindŭ mu adi biranak kuu sanang asŭng.

Pinganang Bijak adi numbor Simŭng Ju

²⁶ Nakit ngatin, nak, ka tunda suto danding pimudip ku.

²⁷ Dayung sundar ka dayung adi arap mbŭh keya ka jarat adi bisa siŭ.

²⁸ Ngara kajŭn kuu mun pirupak ka mbŭh bada bagŭ dari bikandak.

Pinganang Bijak adi numbor Simŭng Mai

^29-30 Puan mu kah ani jadi di daya adi daras nok wain ngga nok adi bisā adi bŭkŭn. Daya adi mun anŭ jera buang sangsara pimudip-i ka ari mingungut. Batŭh-i bireh ka pŭrŭng ganan-i bagŭ tawan; pŭn ka anŭ inŭh kayuh adi dapŭd-i mangān.

³¹ Dŭhnyah bada wain piripong kuu, sunggu-i wain adi bireh ka adi grua, sunggu-i mikirib darŭm saker mu, ka sidi dog tŭrŭn.

³² Andu jawa ndi kuu re kinyam adŭp mu mun adi ko dog nyingŭt jippŭh adi bisā.

³³ Batŭh mu re kiris kayuh saruh, ka kuu re dŭh dapŭd bipikir bait minyu ngga tirase.

³⁴ Kuu re kinyam adŭp mu mun adi mabuk di rawŭt, tibabeu bada kapar dog sabak ribut.

³⁵ “Aku mbŭh dog pukong,” kuu re nang; “Aku mbŭh dog ani', pak aku dŭh ingat. Sinde aku re burah. Aku babŭ an nok.”