PINYIRUAH 26 - Hakcipta - Biatah Bidayuh

Bari TUHAN

¹ “Ndai tura ka darŭm Bari TUHAN, Bari Ku, pakai simŭng rambar banang linen adi duduh adi nakit dog nanun ngga tiburi buruh biri adi biru, bēng ka bireh, ka ngabuh-i ngga butik butik gayŭn cherubim.

² Bada-i nyimati, ambu-i 12 mita, ka ramba-i 2 mita.

³ Nyiit bada bitubu rimŭh rambar da jadi ndi tŭngŭn banang; ka ndai simŭnŭ gŭh ngga anŭ adi rimŭh adi bŭkŭn.

⁴ Ndai kajit kajit-i pakai banang adi biru di bŭngŭn rambar di tura ka sapa di barang tŭngŭn banang.

⁵ Ndai rimŭh puru kajit di rambar banang adi numbor ndi di sibungas tŭngŭn banang, ka rimŭh puru kajit di sikasŭn rambar di tŭngŭn banang adi numbor duwŭh.

⁶ Ndai rimŭh puru sikait mas ngga tubu duwŭh tŭngŭn banang anŭ da jadi ndi.

⁷ “Ndai tutu Bari TUHAN ngga simŭng ndi rambar banang adi dog ndai so buruh kambing.

⁸ Ndai sopŭrŭg-i bada nyimati, 13 mita ambu, ka 2 mita ramba.

⁹ Nyiit bada bitubu rimŭh rambar bada jadi ndi tŭngŭn banang, ka adi nŭm rambar samah gŭh an dog ndai simŭnŭ. Ngupet nyinuwŭh rambar adi numbor nŭm da nutu rawa Bari TUHAN.

¹⁰ Pirakat rimŭh puru kajit di bŭngŭn sikasŭn rambar ndi tŭngŭn banang, ka rimŭh kajit di bŭngŭn tŭngŭn banang anŭ ndi.

¹¹ Ndai rimŭh puru sikait timaga ka na-i di kajit kajit anŭ ngga tubu so-duwŭh tŭngŭn banang anŭ bada jadi ndi tutu.

¹² Kideng rambun banang adi sitangah tura ka punok Bari.

¹³ Rambun banang adi 50 sentimita an dog kideng da kirurung Bari ngga nutu-i.

¹⁴ “Ndai duwŭh dinge tutu, ndi so kurit dari biri adi dog nyamŭk bireh, ka ndi dog ndai ngga birurang adi duduh, ndu tutu di tura ka tunduh.

¹⁵ “Ndai sibukah sibukah nyipijog yŭn Bari so kayuh acacia.

¹⁶ Barang sibukah an 4 mita ambu-i, ka 66 sentimita buka-i,

¹⁷ ngga sikuan sikuan adi sipasang, isa dudu sibukah anŭ bisa mijog bitubu. Sopŭrŭg sibukah an biyŭn sikuan.

¹⁸ Ndai duwŭh puru sibukah di tura ka siratan Bari,

¹⁹ ka pat puru bangan pirak siŭn dog na di punda-i; duwŭh bangan yŭn barang sibukah adi ngga mangan sikuan.

²⁰ Ndai duwŭh puru sibukah tura ka utara Bari

²¹ ka pat puru bangan pirak, duwŭh di punda barang sibukah.

²² Yŭn punok Bari tura ka barat ndai nŭm sibukah,

²³ ka duwŭh sibukah yŭn barang sikuh-i.

²⁴ Sibukah sibukah sikuh an dog tubu di sagān ka dog tubu ndŭg sambu. Sibukah anŭ adi duwŭh yŭn sikuh an dog ndai simŭnŭ.

²⁵ Jadi mai sibukah ngga simŭng nŭm bangan pirak-i, duwŭh di punda barang sibukah.

²⁶ “Ndai simŭng rimŭh parang so kayuh acacia; rimŭh yŭn sibukah tura ka parad ndi Bari.

²⁷ Rimŭh yŭn sibukah di parad anŭ ndi, ka rimŭh yŭn sibukah di tŭbŭn tura ka barat, di tura ka punok.

²⁸ Parang yun an dog na di sitangah ajog sibukah, so ndi tŭbŭn Bari ndŭg tŭbŭn anŭ ndi.

²⁹ Sibukah an dog marut ngga mas ka dog pirakat sigarong mas dieh ngga bitan parang, adi an dog marut gŭh ngga mas.

³⁰ Pijog Bari anŭ nanyam ka suto adi Aku ko kiren di kuu di darŭd.

³¹ “Ndai tabir so banang linen adi duduh adi dog nanun ngga buruh biri adi biru, bēng ka adi bireh. Ngabuh-i ngga butik butik gayŭn cherubim.

³² Kideng-i di pat tiang kayuh acacia adi ko dog marut ngga mas, adi agi sikait dieh, ka dog piguru di pat bangan pirak.

³³ Na tabir anŭ di ribo jari sikait di ribo tanja Bari, ka na di punok tabir anŭ Pati Simanya adi agi duwŭh kiping batuh darŭm-i. Tabir anŭ re ngga nyidŭrŭ Yŭn Kudus so Yŭn adi Siabo Kudus.

³⁴ Na sakŭb Pati Simanya.

³⁵ Di sapa Yŭn adi Siabo Kudus na ndi mija tura ka utara Bari, ka rika prita tura ka siratan.

³⁶ “Yŭn tiban Bari, ndai tabir so banang linen adi duduh adi dog nanun ngga buruh biri adi biru, bēng, ngga bireh ka dog ngabuh ngga butik bunga jiit.

³⁷ Yŭn tabir ati, ndai rimŭh tiang so kayuh acacia adi dog marut ngga mas ka an agi sikait mas dieh; ndai rimŭh bangan timaga yŭn tiang tiang anŭ.