PINYIKIANG 8 - Hakcipta - Biatah Bidayuh

Piguru Prita

¹ TUHAN nang di Moses,

² “Kidaan di Aaron nang kan ayŭh piguru ju prita di rika prita, ayŭh patut bada jawa-i nyekar ka jawin.”

³ Aaron ndai nimun adi dog bada ka bada prita prita anŭ nyekar so ka jawin rika prita.

⁴ So sambu ndŭg sagān rika prita anŭ dog ndai so mas adi dog maba, nanyam suto adi TUHAN mbŭh kiren di Moses.

Pibisig ka Nitah Daya Levi

⁵ TUHAN nang di Moses,

⁶ “Nyidŭrŭ daya Levi so daya Israel ka pibisig ngara

⁷ simuti: masik ngara ngga piin adi ngga pibisig ngara ka bada ngara gumbak ndi ganan ganan ngara ka bada ngara ngu piraka ngara. Komŭnŭ ngara re bisig nanyam ka adat.

⁸ Komŭnŭ ngara an taban ndi anak sapi ngga sadis ruwang kayuh nanyam adi mbŭh dog miratak bigaur ngga inyo kanā; ka kuu an taban dari sapi adi bŭkŭn yŭn sadis taran dosa.

⁹ Komŭnŭ nguruk sopŭrŭg daya Israel ka bada daya Levi mijog di jawin Bari Ku.

¹⁰ Daya Israel siŭn na tangan ngara di tunduh ubak daya Levi,

¹¹ ka nganŭ Aaron siŭn nitah daya Levi ka Aku ndu pinganggen adi grua so bara daya Israel, isa ngara bisa ndai kraja Ku.

¹² Komŭnŭ daya Levi siŭn na tangan ngara di tunduh ubak so-duwŭh dari sapi; ndi an dog jugan ndu sadis taran dosa ka anŭ ndi ndu sadis badang, ngga pimanu adat pibisig yŭn daya Levi.

¹³ “Nitah daya Levi ndu pinganggen adi grua ka Aku, ka bada Aaron ngga anak anak dari-i jadi pinguru ngara.

¹⁴ Nyidŭrŭ daya Levi simŭnŭ so bara daya Israel, isa ngara bisa jadi tung jaku.

¹⁵ Ripas kuu muko pibisig ka nitah daya Levi, ngara re tibirang nyiraja di Bari Ku.

¹⁶ Aku mbŭh ngaku ngara ngga gati sopŭrŭg anak pinuai dari daya Israel, ka ngara mbŭh tung jaku sadi adŭ.

¹⁷ Di andu Aku siŭ sopŭrŭg anak pinuai di Egypt, Aku nyikudus barang anak pinuai darŭm rawang daya Israel, ka barang anak bungas dāng kudip.

¹⁸ Aku madin mbŭh ngaku daya Levi ngga gati anak pinuai daya Israel,

¹⁹ ka Aku mbŭh nggen daya Levi di Aaron ngga di anak anak dari-i, ndu pinganggen so bara daya Israel, da nyiraja di Bari Ku yŭn daya Israel ka grindung bara daya Israel so pinyirusag adi bisa dog ngara kambŭi ngara mandŭg paŭh nyindŭk Yŭn Kudus.”

²⁰ Jadi Moses, Aaron, ngga sopŭrŭg daya Israel nitah bara daya Levi, nimun adi TUHAN mbŭh pesan di Moses.

²¹ Daya Levi pibisig adŭp ngara ka ngu piraka ngara, ka Aaron nitah ngara ndu pinganggen adi grua ka TUHAN. Ayŭh pimanu gŭh adat pibisig di ngara.

²² Bara daya ndai sopŭrŭg-i nimun adi TUHAN mbŭh pesan di Moses yŭn daya Levi. Ngapŭi meh daya Levi mbŭh jadi tibirang nyiraja di Bari TUHAN di ribo Aaron ngga anak anak dari-i.

²³ TUHAN nang di Moses,

²⁴ “So umbur duwŭh puru-rimŭh sawa barang naan daya Levi an ndai kraja-i di Bari Ku,

²⁵ ka kan umbur-i mbŭh rimŭh puru sawa ayŭh siŭn ko nyiraja.

²⁶ Ripas anŭ, ayŭh siŭn turung dingan-i daya Levi di kraja ngara di Bari Ku, pak ayŭh dŭh siŭn ndai kraja sadi adŭp-i. Simŭnŭ inŭh kuu siŭn ngatur tah kraja daya Levi.”