PINYIKIANG 35 - Hakcipta - Biatah Bidayuh

Kupo kupo Yŭn bara Daya Levi

¹ Di rabak Moab bŭngŭn Yang Jordan bistatang ngga Jericho, TUHAN nang di Moses,

² “Kidaan di bara daya Israel nang so utung tana adi ngara trima, ngara dŭh siŭn dŭh an nggen di bara daya Levi kada kupo yŭn ngara rŭŭ, samŭn tarun tana kupai adi maning kupo anŭ.

³ Kupo kupo anŭ inŭh re yŭn bara daya Levi, re yŭn ngara rŭŭ. Tarun tana kupai inŭh re yŭn dudu sapi ngara samŭn yŭn sopŭrŭg dāng ngara adi bŭkŭn.

⁴ Tarun tana kupai anŭ an 450 mita bayah-i di barang parad piguru so sindung kupo,

⁵ isa tarun tana anŭ misagi 900 mita di barang parad, ngga adŭp kupo anŭ di yun-i.

⁶ Angān an nggen di bara daya Levi nŭm kupo pinyigrindung, di yŭn daya bu bisukan kan ayŭh ko siŭ daya ngga dŭh singaja. Ngga nambah anŭ, nggen di ngara 42 kupo adi bŭkŭn,

⁷ samŭn tarun tana kupai, siŭn prungun-i 48 kupo.

⁸ Kiang kupo adi patut dog nggen di daya Levi dog natu nanyam ka pinyibagŭ kupo ngga pinyibayah abong tarun yŭn barang tibaran-asar anŭ.”

Kupo kupo Pinyigrindung

⁹ TUHAN kidaan di Moses,

¹⁰ da nang di bara daya Israel: “Kan angān mutas Yang Jordan ka mŭrŭt tarun tana Canaan,

¹¹ angān an mien kupo kupo pinyigrindung yŭn bisukan, di yŭn tadŭ tadŭ daya adi ko siŭ dingan-i dŭh ngga singaja bisa bisukan.

¹² Diginŭ daya anŭ siramat so madis sianŭ adi mbŭh kabŭs, adi jiroh aran an maras dendam. Mating daya adi dog nyarah nang mbŭh kinanyap asŭng daya siŭn dog nggen ukum kabŭs kambŭi dŭh dog bisara di sirung jawin daya bagŭ.

¹³ Mien nŭm kupo,

¹⁴ taruh di tura ka timor Yang Jordan, ka taruh di tarun tana Canaan.

¹⁵ Sopŭrŭg anŭ inŭh kupo pinyigrindung yŭn daya daya Israel puan kah daya daya pinami bisukan, adi rŭŭ nupang puan kah rŭŭ ruro di Israel. Asi asi daya adi siŭ daya dŭh ngga singaja, bisa bu bisukan di tadŭ tadŭ kupo anŭ.

^16-18 “Pak kambŭi agi so angān pakai basi, puan kah batuh, puan kah kayuh ngga siŭ daya, ayŭh mbŭh sarah ka dŭh siŭn dŭh dog nggen ukum kabŭs.

¹⁹ Jurud madis sianŭ adi kabŭs mbŭh dapu tanggong nggen ukum kabŭs di daya anŭ. Kambŭi ayŭh dapŭd daya anŭ, ayŭh siŭn siŭ daya anŭ.

²⁰ “Kambŭi agi so angān tiru di daya ka turak ayŭh bada kabŭs rabu, puan kah kabŭs dog jakad-i ngga kayuh,

²¹ puan kah kabŭs dog mukut-i, daya anŭ mbŭh sarah ka dŭh siŭn dŭh dog ukum kabŭs. Madis sianŭ adi kabŭs adi siabo sindŭk, dapu tanggong nggen ukum kabŭs di daya anŭ. Kambŭi ayŭh dapŭd daya anŭ, ayŭh siŭn siŭ daya anŭ.

²² “Pak nyamtadar-i ndi naan daya siŭ daya adi-i dŭh tiru ka dŭh ngga singaja, bait-i dog turak puan kah dog jakad-i ngga kayuh.

²³ Bait nyamtadar-i, angān dŭh kiris, angān jakad batuh ka siŭ daya adi angān dŭh biyŭn atin re an kinaman adi dŭh gŭh pinganyu ngan.

²⁴ Di har adi mun anŭ, bara daya Israel siŭn tingga asi sarah ngga dŭh, so parad ngan ka dŭh so parad madis sianŭ adi kabŭs adi mbŭh raru raan maras dendam.

²⁵ Kaŭs angān mbŭh sarah amai mbŭh kinanyap asŭng daya, ka bara daya Israel patut nyiramat angān so dog siŭ madis sianŭ adi kabŭs, ka pari angān ka kupo pinyigrindung anŭ adi yŭn ngan ko bu bisukan. Angān dŭh siŭn dŭh rŭŭ diginŭ ndŭg ka Imam Bās adi di tika anŭ mbŭh kabŭs.

²⁶ Kambŭi angān bu so kupo pinyigrindung anŭ adi yŭn angān ko bisukan

²⁷ ka kambŭi madis sianŭ adi kabŭs dapŭd angān ka siŭ angān, pingandai-i anŭ adi maras dendam dŭh sarah.

²⁸ Tadŭ tadŭ so angān adi sarah amai mbŭh kinanyap asŭng daya dŭh siŭn dŭh bisukan di kupo pinyigrindung anŭ ndŭg ka pinyikabŭs Imam Bās, ka ripas anŭ angān bisa mari ka ramin adŭp ngan.

²⁹ Atur atur-adat ati inŭh yŭn ngan ngga bara sesang ngan, di tadŭ tadŭ yŭn ngan rŭŭ.

³⁰ “Ngara adi dog dapŭd sarah amai ko siŭ daya ka dog nggen ukum kabŭs adŭ-i so ka taksi duwŭh naan puan kah bagŭ saksi; taksi so ndi naan saksi dŭh-i sadang ngga nyarah yŭn re nggen ukum kabŭs.

³¹ Pinyiŭ dŭh siŭn dŭh dog ukum kabŭs. Ngara dŭh tungang pirupas adŭp-i so ukum ati ngga bibayar pakai duit.

³² Kambŭi ngara ko bu bisukan di kupo pinyigrindung anŭ, dŭhnyah bada ngara bayar yŭn-i dapŭd mari ka ramin adŭp-i diŭ so pinyikabŭs Imam Bās.

³³ Kambŭi angān ndai simŭnŭ, angān mbŭh nyembar tarun tana adi yŭn ngan rŭŭ. Siŭ daya inŭh nyembar tarun tana, ka adŭ-i so ka pinyikabŭs-i inŭh adat pibisig bisa dog pimanu yŭn tarun tana adi yŭn daya ko dog siŭ.

³⁴ Dŭhnyah nyembar tarun tana adi yŭn ngan rŭŭ, sabab Aku ati TUHAN ka Aku rŭŭ di dupan daya Israel.”