PINYIKIANG 29 - Hakcipta - Biatah Bidayuh

Sadis di tika Gawai Sawa Bauh

¹ Ngga sibungas andu darŭm buran adi ju, angān an mandŭg tikuruk simayang, ka dŭh siŭn nyiraja. Di andu anŭ trompet an dog mambak.

² Jugan sadis badang ka TUHAN, adi dagŭn-i pimunos asŭng-I: ndi dari sapi adi gi-mara, ndi dari biri, ka ju anak dari biri adi ndi sawa umbur-i; sopŭrŭg-i an adi pidanah.

³ Jugan sadis tibaduk nanyam adi mbŭh dog ngŭtŭ: 3 kilogram tibaduk bigaur ngga inyo kanā samah ngga dari sapi. 2 kilogram tibaduk ngga dari biri,

⁴ ka 1 kilogram ngga barang pŭrŭng anak biri.

⁵ Jugan gŭh ndi dari kambing ndu sadis taran dosa; simŭnŭ meh pimanu adat pibisig yŭn daya bagŭ.

⁶ Jugan anŭ ngga nambah sadis badang adi ari dog ndai di sibungas andu darŭm buran samah ngga sadis ruwang kayuh, ngga sadis badang adi dog ndai barang andu samah ngga sadis ruwang kayuh ngga sadis wain. Dudu sadis pinguman ati inŭh adi dagŭn-i pimunos asŭng TUHAN.

Sadis Ruwang Kayuh di Andu Pingapun Dosa

⁷ Tikuruk simayang ngga andu adi simŭng darŭm buran adi ju. Dŭhnyah man, ka dŭhnyah gŭh nyiraja.

⁸ Jugan sadis badang ka TUHAN, adi dagŭn-i pimunos asŭng-I: ndi dari sapi adi gi-mara, ndi dari biri, ka ju anak dari biri adi ndi sawa umbur-i; sopŭrŭg-i an adi pidanah.

⁹ Jugan sadis tibaduk nanyam adi dog ngŭtŭ: 3 kilogram tibaduk adi bigaur ngga inyo kanā, samah ngga dari sapi, 2 kilogram tibaduk samah ngga dari biri,

¹⁰ ngga 1 kilogram tibaduk samah ngga barang pŭrŭng anak dari biri anŭ.

¹¹ Jugan gŭh ndi dari kambing ndu sadis taran dosa, ngga nambah kambing adi dog jugan di adat pibisig yŭn daya bagŭ, ngga sadis badang adi ari dog ndai barang isan isan samah ngga sadis ruwang kayuh ngga sadis wain.

Sadis di tika Gawai Bari Dawŭn

¹² Tikuruk simayang ngga andu adi simŭng-rimŭh darŭm buran adi ju. Sita gawai anŭ ngga kibās TUHAN sitian ju andu ka dŭhnyah nyiraja.

¹³ Di sibungas andu anŭ jugan sadis pinguman ka TUHAN, adi dagŭn-i pimunos asŭng-I: simŭng-taruh sapi adi gi-mara, duwŭh dari biri, ngga simŭng-pat anak dari biri adi ndi sawa umbur-i; sopŭrŭg-i an adi pidanah.

¹⁴ Jugan sadis tibaduk nanyam adi mbŭh dog ngŭtŭ: 3 kilogram tibaduk adi bigaur ngga inyo kanā samah ngga barang dari sapi, 2 kilogram tibaduk samah ngga barang dari biri,

¹⁵ ngga 1 kilogram tibaduk samah ngga barang pŭrŭng anak biri, samŭn sadis wain nanyam adi mbŭh dog miratak.

¹⁶ Jugan gŭh ndi dari kambing ndu sadis taran dosa. Jugan sadis sadis anŭ ngga nambah sadis badang adi dog ndai barang isan isan samah ngga sadis ruwang kayuh ngga sadis wain.

¹⁷ Di andu adi duwŭh jugan simŭng-duwŭh dari sapi adi gi-mara, duwŭh dari biri, ngga simŭng-pat anak dari biri adi ndi sawa umbur-i; sopŭrŭg-i an adi pidanah.

^18-19 Jugan sadis sadis anŭ samah ngga sopŭrŭg sadis adi bŭkŭn adi mbŭh dog miratak yŭn andu adi sibungas-i.

²⁰ Di andu adi taruh jugan simŭng-ndi dari sapi adi gi-mara, duwŭh dari biri, ngga simŭng-pat anak dari biri adi ndi sawa umbur-i; sopŭrŭg-i an adi pidanah.

^21-22 Jugan sadis sadis anŭ samah ngga sopŭrŭg sadis adi bŭkŭn adi mbŭh dog miratak yŭn andu adi sibungas-i.

²³ Di andu adi pat, jugan simŭng dari sapi adi gi-mara, duwŭh dari biri, ngga pat anak dari biri adi ndi sawa umbur-i; sopŭrŭg-i an adi pidanah.

^24-25 Jugan sadis sadis anŭ samah ngga sopŭrŭg sadis adi bŭkŭn adi mbŭh dog miratak yŭn andu adi sibungas-i.

²⁶ Di andu adi rimŭh jugan prii dari sapi adi gi-mara, duwŭh dari biri, ka simŭng-pat anak dari biri adi ndi sawa umbur-i; sopŭrŭg-i an adi pidanah.

^27-28 Jugan sadis sadis anŭ samah ngga sopŭrŭg sadis adi bŭkŭn adi mbŭh dog miratak yŭn andu adi sibungas-i.

²⁹ Di andu adi nŭm jugan mai dari sapi adi gi-mara, duwŭh dari biri, ngga simŭng-pat anak dari biri adi ndi sawa umbur-i; sopŭrŭg-i an adi pidanah.

^30-31 Jugan sadis sadis anŭ samah ngga sopŭrŭg sadis adi bŭkŭn adi mbŭh dog miratak yŭn andu adi sibungas-i.

³² Di andu adi ju jugan ju dari sapi adi gi-mara, duwŭh dari biri, ngga simŭng-pat anak dari biri adi ndi sawa umbur; sopŭrŭg-i an adi pidanah.

^33-34 Jugan sadis sadis anŭ samah ngga sopŭrŭg sadis adi bŭkŭn adi mbŭh dog miratak yŭn andu adi sibungas-i.

³⁵ Ngga andu adi mai tikuruk simayang ka dŭhnyah nyiraja.

³⁶ Jugan sadis badang ndu sadis pinguman ka TUHAN, adi dagŭn-i pimunos asŭng-I: ndi dari sapi adi gi-mara, ndi dari biri, ngga ju anak dari biri adi ndi sawa umbur-i; sopŭrŭg-i an adi pidanah.

^37-38 Jugan sadis sadis anŭ samah ngga sopŭrŭg sadis adi bŭkŭn adi mbŭh dog miratak yŭn andu adi sibungas-i.

³⁹ Anŭ inŭh atur-adat jeja ka sadis badang, sadis ruwang kayuh, sadis wain, ka sadis bidingan adi angān patut jugan ka TUHAN di tipuh gawai gawai adi mbŭh dog ngŭtŭ. Sopŭrŭg anŭ inŭh ngga nambah sadis adi angān jugan ngga pijadi payu, puan kah ndu sadis adi dog jugan so pinyiraan atin adŭp.

⁴⁰ Jadi Moses kidaan di daya Israel sopŭrŭg kayuh adi TUHAN muko pesan di ayŭh.