PINGANDAI 7 - Hakcipta - Biatah Bidayuh

Piminyu Pinganang so Stephen

¹ Imam Bās siken Stephen, “Sawŭ kah kayuh anŭ adi ngara nang?”

² Stephen nam, “Bara dingan ka bara pimas, dingah pinganang ku ati! Diŭ so babuk ta Abraham bipindah ka Haran, Tapa adi bragah nandŭng di ayŭh di Mesopotamia

³ ka nang di ayŭh, ‘Tingge rawang mu samŭn rais mu, ka matak ka tarun tana adi Aku re kiren di kuu.’

⁴ Jadi ayŭh bu so rais-i ka di rŭŭ di Haran. Ripas sama-i kabŭs, Tapa bada ayŭh bipindah ka tarun tana ati adi yŭn ngan rŭŭ madin.

⁵ Nganŭ Tapa gibayuh nggen tana ati di Abraham, mati papah kaja dŭh gŭh-I nggen, pak Tapa ko bijanji an nggen-i di ayŭh; ka-i re tung jangi samŭn bara sesang-i. Gi-mating anak Abraham di andu Tapa ndai janji anŭ.

⁶ Sakati inŭh Tapa minyu ngga ayŭh: ‘Bara sesang mu re rŭŭ di rais tami, di yŭn ngara re jadi urun ka dog kinanyuh sitian pat ratus sawa.

⁷ Pak Aku re ngukum bangsa anŭ adi piurun ngara. Ka komŭnŭ ngara re ruah so rais anŭ ka nyambah Aku di tarun tana ati.’

⁸ Ka Tapa nggen adat sunat di Abraham, jadi tandā simanya anŭ. Abraham nyunat Isaac, ndi minggu ripas-i dog biranak; Isaac nyunat anak-i Jacob, ka Jacob nyunat simŭng-duwŭh madis anak-i, adi bara tayung-babuk bangsa ta adi timagah.

⁹ “Bara anak Jacob sina di Joseph adi jurud ngara ka jua ayŭh da jadi urun di Egypt. Pak Tapa agi ngga ayŭh

¹⁰ ka pirupas ayŭh so sopŭrŭg pinyusah-i. Kan Joseph mijog di sirung jawin raja daya Egypt, Tapa nggen di ayŭh pinyibijak adi bada raja rasu rindu ayŭh ka bada ayŭh jadi gabenor adi nguasa rais samŭn istana.

¹¹ Komŭnŭ apag timbur di ndi tarun tana Egypt ngga di Canaan, adi mbŭh jadi pinyusah bās. Tayung-babuk ta dŭh tungang dapŭd pinguman,

¹² pak kan Jacob dingah gandom agi di Egypt, ayŭh pait bara anak-i, tayung-babuk ta, da di kamanŭ adi sibungas saba-i.

¹³ Di pimandŭg ngara adi piduwŭh saba, Joseph kidaan asi adŭp-i di bara jurud-i, ka raja daya Egypt piguru puan rawang Joseph.

¹⁴ Jadi Joseph pait pinganang ka sama-i Jacob, bada ayŭh samŭn sopŭrŭg darŭm rawang-i, ju puru-rimŭh naan sopŭrŭg-i, mandŭg ka Egypt.

¹⁵ Jadi Jacob bipindah ka Egypt, di yŭn-i ngga bara anak-i anŭ kabŭs.

¹⁶ Tadang ngara dog taban ka Shechem, di yŭn ngara dog kubur di tana kubur adi Abraham ko miris so bara anak Hamor ngga mua kiang duit pirak.

¹⁷ “Kan tipuh-i mbŭh sindŭk yŭn Tapa ndai anŭ adi-I ko bipayu an ndai yŭn Abraham, bangsa ta di Egypt mbŭh bitambah rabis bagŭ.

¹⁸ Pak pinŭbŭn-i raja adi bŭkŭn adi dŭh puan Joseph piguru mritah Egypt.

¹⁹ Ayŭh nipu tayung-babuk ta buang gaok ngga ngara; ayŭh takan ngara da tagan anak-pira ngara di sapa tarun, da kabŭs.

²⁰ Di tipuh anŭ inŭh Moses dog biranak. Ayŭh pira adi raru ramus, adi dog mira pimas-i sitian taruh buran di arŭn.

²¹ Ka kan ayŭh dog tagan di sapa tarun, anak dayung raja ngakat ayŭh ka kudip ayŭh ndŭg baga, keya ka anak adŭp-i.

²² Ayŭh dog ngajar sopŭrŭg pinyibijak daya Egypt, ka ayŭh jadi daya bās darŭm piminyu ngga darŭm pingandai.

²³ “Kan Moses mbŭh pat puru sawa umbur-i, agi timbur darŭm asŭng-i ayŭh an di munan bangsa adŭp-i daya Israel.

²⁴ Ayŭh kiris ndi naan so ngara dog kinanyuh daya Egypt, ka-i di turung ka siŭ daya Egypt anŭ. (

²⁵ Ayŭh pikir bangsa adŭp-i mirati Tapa re an pakai ayŭh da pirupas ngara, pak ngara dŭh.)

²⁶ Andu anŭ ndi ayŭh kiris duwŭh naan daya Israel bikaii, ka suba bada ngara duwŭh bidamai. ‘Angān duwŭh samah bangsa, mani angān bikaii?’

²⁷ Pak sianŭ adi kandam dingan-i turak Moses ka bŭngŭn, buang-i nang, ‘Asi bada kuu jadi pinguasa ka akim ami?’ ayŭh nang.

²⁸ ‘Kuu an siŭ aku kah, nimun kuu ko siŭ daya Egypt mijah?’

²⁹ Kan Moses dingah sakanŭ, ayŭh bu so Egypt ka di rŭŭ di tarun tana Midian. Diginŭ ayŭh biyŭn duwŭh anak dari.

³⁰ “Kan pat puru sawa mbŭh ripuan, malaikat nandŭng di Moses darŭm jireb apui di anak tŭngŭn kayuh di tarun tana-pajam sindŭk Darŭd Sinai.

³¹ Moses mbŭh inga inga buang bipikir da kayuh adi-i kiris, ka-i di nyindŭk anak tŭngŭn kayuh anŭ an nakit tingga. Pak ayŭh dingah sirŭŭn Tuhan:

³² ‘Aku ati Tapa tayung-babuk mu, Tapa Abraham, Isaac, ka Jacob.’ Moses kimŭtŭr buang taru ka dŭh birani tingga.

³³ Tuhan nang di ayŭh, ‘Kadi kasut mu, amai tarun yŭn mu mijog inŭh tana kudus.

³⁴ Aku mbŭh kiris munki masam sangsara daya Ku di Egypt. Aku mbŭh dingah sidaing ngara; ka Aku mbŭh mandŭg an pirupas ngara. Ja madin, Aku pait kuu ka Egypt.’

³⁵ “Moses ati inŭh daya adi dŭh daya Israel an trima kan ngara nang, ‘Asi bada kuu jadi pinguasa ka akim ami?’ Ayŭh inŭh sianŭ adi Tapa pait da jadi pinguru ngara ka pirupas ngara ngga pinurung malaikat adi nandŭng di ayŭh di anak tŭngŭn kayuh adi bijagu apui dieh.

³⁶ Ayŭh taban bangsa Israel ruah so Egypt, ndai pingandai-nginga ngga pingandai-saruh di Egypt ka di Rawŭt Bireh ka sitadŭn pat puru sawa di tarun tana-pajam.

³⁷ Moses inŭh adi nang di daya Israel, ‘Tapa re pait ka angān ndi naan nabi, nimun Ayŭh mbŭh pait aku; ka ayŭh re so bangsa adŭp ngan.’

³⁸ Moses ati inŭh adi agi ngga daya Israel tikuruk di tarun tana-pajam; ayŭh agi diginŭ ngga tayung-babuk ta ka ngga malaikat adi minyu ngga ayŭh di Darŭd Sinai; ka ayŭh mbŭh kambat pinganang adi nggen udip so Tapa yŭn sopŭrŭg ta.

³⁹ “Pak tayung-babuk ta abah dingah pinganang-i. Ngara tirawan ayŭh buang an pari ka Egypt.

⁴⁰ Jadi ngara nang di Aaron, ‘Ndai tapa yŭn ta da nguru ata. Moses taban ata ruah so Egypt, pak ata dŭh puan ani mbŭh jadi di ayŭh madin.’

⁴¹ Jadi ngara ndai tibudo nunda gayŭn pŭrŭng anak sapi, jugan sadis dieh, ka ndai gawai ngga nyibragah kayuh adi adŭp ngara mbŭh ndai.

⁴² Jadi Tapa nyipunok ngara ka tagan ngara da nyambah bitang bitang di rangit, nimun adi dog nang di surat nabi: ‘Daya Israel! Dŭh-i yŭn Ku angān simareh ka nyadis dāng sitadŭn pat puru sawa di tarun tana-pajam.

⁴³ Bari tapa Molech inŭh adi angān gŭrŭng, ka tibudo Rephan, tapa bitang ngan; sopŭrŭg-i mbŭh tibudo adi angān ndai ka nyambah. Ngapŭi Aku re taran angān kamajeh Babylon.’

⁴⁴ “Tayung-babuk ta biyŭn Bari Tuhan adi Yŭn Tapa agi ngga ngara di tarun tana-pajam. Bari anŭ mbŭh dog ndai so pinyibada Tapa di Moses, nanyam suto adi mbŭh dog kiren di ayŭh.

⁴⁵ Ripas anŭ, tayung-babuk ta adi kambat bari anŭ so bara nyamba ngara, taban-i ngga ngara darŭm ngara tunda Joshua ka sirabut tana daya bangsa bŭkŭn adi Tapa pibu darŭm-I panu diŭ di jawin ngara. Bari anŭ agi ngga ngara ndŭg jaman David.

⁴⁶ David pimunos asŭng Tapa ka mite pinyibandar so Tapa an ndai ramin yŭn Tapa Jacob.

⁴⁷ Pak Solomon inŭh adi pijog ramin anŭ yŭn Tapa.

⁴⁸ “Pak Tapa adi Sambu Sopŭrŭg, dŭh-I rŭŭ di ramin adi manusia ndai; sak adi nang nabi,

⁴⁹ ‘Rangit inŭh takta Ku, Tuhan nang, ka ong inŭh bangan kaja Ku. Ramin adi munki an ngan pijog yŭn Ku? Diki meh tarun yŭn Ku re rŭŭ?

⁵⁰ Dŭh kah sopŭrŭg anŭ Aku ndai?’

⁵¹ “Angān daya adi paŭh baking! Nimun ngara adi dŭh biguna di Tapa, angān dŭh an kuka atin ngan di pinganang Tapa! Angān mbŭh mun tayung-babuk ngan, ari rawan Roh Kudus!

⁵² Agi kah nabi adi dŭh tayung-babuk ngan kisiis? Ngara siŭ bara pinyisung Tapa, adi ko jah-i piagah pimandŭg Urun Tapa adi tŭnggŭn. Madin, angān mbŭh jua ka siŭ Ayŭh.

⁵³ Angān inŭh adi mbŭh biyŭn ukum-adat Tapa adi malaikat ko nggen di angān, pak angān bŭn sita-i!”

Stephen Dog Manjan ngga Batuh

⁵⁴ Kan bara daya Kunsil dingah pinganang Stephen, ngara mbŭh raru triyŭn buang baji di ayŭh.

⁵⁵ Pak Stephen, brisi ngga Roh Kudus, nyigura ka rangit ka kiris bragah Tapa ka Jesus mijog tura ka tauh Tapa.

⁵⁶ “Tingga!” ayŭh nang, “aku kiris shorga tikuka ka Anak Manusia mijog tura ka tauh Tapa!”

⁵⁷ Bara daya Kunsil nyirais buang mapot kajit-i. Nganŭ gŭh ngara samah samah nyurong ka Stephen,

⁵⁸ ka batak ayŭh ka sapa kupo, ka manjan ayŭh ngga batuh. Bara saksi na jipo ngara di sindŭk kaja ndi naan dari bujang dŭn Saul.

⁵⁹ Darŭm ngara manjan ayŭh ngga batuh, Stephen bidua, “Tuhan Jesus, kambat simangi ku.”

⁶⁰ Ka ayŭh sidikang ka nyirais nang, “Tuhan, apun dosa ngara!” Ko-i nang sakanŭ, ayŭh kabŭs.