PINGANDAI 5 - Hakcipta - Biatah Bidayuh

Ananias ngga Sapphira

¹ Pak agi ndi naan daya dŭn Ananias. Ayŭh ngga sawŭn-i Sapphira jua tana adi ngara dapu.

² Pak ngga janji sawŭn-i ayŭh nyikŭn kada duit anŭ, ka tadŭh-i ayŭh nyerah ka bara pinyuruh.

³ Peter nang di ayŭh, “Ananias, mani kuu bada Shetan nguasa kuu, ndŭg ka kuu mbŭh kadong Roh Kudus ka nyikŭn kada duit rega tana anŭ?

⁴ Sibayuh kuu jua-i tana anŭ taŭn-i tung jamu; ka ripas kuu ko jua-i, duit anŭ babŭ tung jamu. Mani kuu, ndai kayuh mun anŭ? Kuu dŭh kadong daya; kuu kadong Tapa!”

⁵ Kan Ananias dingah sakanŭ, ayŭh tumbang ka kabŭs; ka sopŭrŭg adi dingah kayuh anŭ mbŭh raru taru.

⁶ Bara dari bujang mandŭg, marut tadang-i ka tawek-i ngga bu yŭn kubur.

⁷ Kurang rabis taruh jam ripas anŭ, sawŭn-i mŭrŭt, dŭh puan ani adi mbŭh jadi.

⁸ Peter siken ayŭh, “Kidaan di aku, ati kah taŭn kiang-i adi kuu ngga banŭh mu dapŭd adi rega tana ngan?” “Yŭh,” ayŭh nam, “kiang anŭ inŭh.”

⁹ Jadi Peter nang di ayŭh, “Mani kuu ngga banŭh mu bipekat an suba Roh Tuhan? Bara daya adi ko kubur banŭh mu, madin mbŭh agi di tiban, ka ngara re tawek gŭh kuu ka sapa!”

¹⁰ Jam anŭ gŭh ayŭh tumbang di kaja Peter ka kabŭs. Bara dari bujang mŭrŭt ka kiris ayŭh mbŭh kabŭs; ngara tawek tadang-i ka sapa ka kubur ayŭh ngapid banŭh-i.

¹¹ Sopŭrŭg daya eklisia samŭn daya bŭkŭn adi dingah kayuh anŭ mbŭh raru taru.

Pingandai-Nginga ngga Pingandai-Saruh

¹² Bagŭ pingandai-nginga ngga pingandai-saruh dog ndai bara pinyuruh di ruang daya bagŭ. Sopŭrŭg bara adi sabah di Jesus tikuruk di awah adi dog kadŭn Awah Solomon.

¹³ Mating daya sapa re pus sua ngga ngara, sunggu daya nganju ngara.

¹⁴ Pak daya makin bagŭ mŭrŭt tibaran anŭ, bara dari ngga bara dayung adi sabah di Tuhan.

¹⁵ Sabab kayuh adi bara pinyuruh mbŭh ndai, daya birandam mbŭh dog taban ka aran ka dog piguring di pangō bait di ambok isa sikurang kurang-i singangi Peter bisa dog ngara kan-i panu murah.

¹⁶ Ka bara bara daya mandŭg so barang kupo maning Jerusalem, taban sinadan adi birandam puan kah ngara adi dog mŭrŭt roh arap; ka sopŭrŭg ngara mbŭh dog pibua.

Bara Pinyuruh Dog Kisiis

¹⁷ Komŭnŭ Imam Bās ngga bara daya Sadducee adi samah ngga ayŭh mbŭh raru sina di bara pinyuruh, ka mbŭh ndai pikir-i an pirusak ngara.

¹⁸ Ngara nakap bara pinyuruh ka na ngara darŭm ramin jer.

¹⁹ Pak ngarŭm anŭ, malaikat Tuhan kuka tiban ramin jer ka piruah ngara. Malaikat anŭ nang,

²⁰ “Panu ka Ramin Tuhan ka kidaan sopŭrŭg kayuh pasar udip bauh ati di bara daya.”

²¹ Ngara tunda pinganang malaikat, ka awar isan isan ngara di mŭrŭt Ramin Tuhan ka piguru ngajar. Imam Bās ngga bara adi samah ngga ayŭh bagan da tikuruk sopŭrŭg nyamba bangsa Jahudi, yŭn ndai udung Kunsil. Komŭnŭ ngara pait pinganang bada bara pinyuruh dog taban ka yŭn ngara so ramin jer.

²² Pak kan ngara adi dog pait mbŭh ndŭg ramin jer, ngara mating dapŭd bara pinyuruh diginŭ; jadi ngara pari ka kidaan di Kunsil,

²³ “Kan kieh ndŭg ramin jer, kieh kiris-i birabŭt, ka sopŭrŭg adi jaga agi di tiban; pak kan kieh kuka tiban, kieh mating dapŭd daya di darŭm-i!”

²⁴ Kan bara pingubak imam samŭn pingubak ngara adi jaga Ramin Tuhan dingah, ngara gŭgŭh, dŭh puan ani adi mbŭh jadi di bara pinyuruh anŭ.

²⁵ Komŭnŭ ndi naan daya mŭrŭt ka nang di ngara, “Ngara anŭ adi angān na darŭm jer agi di Ramin Tuhan ngajar daya!”

²⁶ Jadi pingubak ngara adi jaga Ramin Tuhan matak ngga bara-i ka taban bara pinyuruh pari. Ngara dŭh pakai rakah adi kasar, sabab ngara taru daya manjan adŭp-i ngga batuh.

²⁷ Ngara taban bara pinyuruh mŭrŭt, ka bada ngara mijog di sirung jawin Kunsil; ka Imam Bās nang di ngara,

²⁸ “Kieh muko nakit kidaan di angān da dŭh tia ngajar ngga adŭn daya anŭ, pak tingga meh kayuh adi angān mbŭh ndai! Angān mbŭh ngisi Jerusalem ngga ajar ngan, ka bada kieh dapu tanggong di pinyikabŭs-I!”

²⁹ Peter ngga bara pinyuruh adi bŭkŭn nam, “Kieh dŭh siŭn dŭh tunda pinganang Tapa, dŭh pinganang manusia.

³⁰ Tapa tayung-babuk ta mbŭh pakat Jesus so kabŭs, ripas angān ko siŭ Ayŭh, masak Ayŭh di atuh rigang.

³¹ Tapa mbŭh katuh Ayŭh ka tangan tauh-I, nimun Pinguru ka Pinyikudip, siŭn daya Israel dapŭd aran ngga marik pimudip-i pari ka adŭp-I ka dapŭd pingapun dosa.

³² Kieh ati inŭh saksi di kayuh ati, simŭnŭ gŭh Roh Kudus, adi pinganggen Tapa di tadŭ daya adi tunda pinganang Tapa.”

³³ Kan bara daya Kunsil dingah sakanŭ, ngara mbŭh raru baji ka an siŭ ngara.

³⁴ Pak ndi so ngara adi daya Pharisee dŭn Gamaliel, adi gurū Ukum-adat Jahudi ka adi dog stabi sopŭrŭg daya, mijog ka bada bara pinyuruh dog taban ka sapa dawŭ-i.

³⁵ Ayŭh minyu, nang-i, “Bara dingan ku daya Israel, nakit pikir ani re ngan ndai di tunduh ngara anŭ.

³⁶ Angān ingat Theudas, adi ko dawŭ-i timbur ka nang adŭp-i daya bās, ka agi pat ratus naan daya tunda ayŭh. Pak ayŭh dog siŭ, ka sopŭrŭg bara pinunda-i mbŭh pambar ka mbŭh mating tia.

³⁷ Ripas anŭ, Judas daya Galilee timbur di jaman daya ndai pimirang; bagŭ daya tunda ayŭh, pak ayŭh dog siŭ gŭh, ka sopŭrŭg bara pinunda-i mbŭh pambar ka mbŭh mating tia.

³⁸ Sabab anŭ meh di har ati, aku kidaan di angān, dŭhnyah ida ida ngga ngara anŭ, awang adŭp ngara! Kambŭi kraja pingandai ngara so manusia, kraja pingandai ngara re miyap,

³⁹ pak kambŭi-i mandŭg so Tapa, angān manŭn dŭh re tungang ngarah ngara. Manyah-i te adŭp ngan adi rawan Tapa!” Kunsil tunda pinganang Gamaliel.

⁴⁰ Jadi ngara bagan bara pinyuruh da mŭrŭt. Ripas madŭs ngara, Kunsil mritah ngara da dŭh tia minyu ngga adŭn Jesus, ka komŭnŭ pirupas ngara.

⁴¹ Darŭm bara pinyuruh bu so Kunsil, ngara mbŭh sanang asŭng, sabab mbŭh tibirang di sirung jawin Tapa kinyam mangŭh yŭn adŭn Jesus.

⁴² Ka barang andu di Ramin Tuhan ka di ramin daya ngara babŭ ngajar ka nyuse Agah Kana pasar Jesus adi Kristus.