PINGANDAI 4 - Hakcipta - Biatah Bidayuh

Peter ngga John di Sirung Jawin Kunsil

¹ Peter ngga John gibabŭ minyu di bara daya kan kada imam, pingubak ngara adi jaga Ramin Tuhan, samŭn kada daya Sadducee mandŭg.

² Ngara mbŭh baji sabab pinyuruh adi duwŭh naan anŭ mbŭh ngajar daya nang Jesus mbŭh makat so kabŭs, sirati-i daya adi mbŭh kabŭs re makat udip bauh.

³ Jadi ngara nakap ngara; ka amai andu mbŭh re karŭm, ngara na ngara duwŭh darŭm jer ndŭg ka andu anŭ ndi.

⁴ Pak bagŭ adi dingah agah so Peter ngga John mbŭh sabah di Jesus; ka kiang ngara adi sabah mbŭh bitambah kira ka agi rimŭh ribu naan.

⁵ Andu anŭ ndi, bara pingibās bangsa Jahudi, bara nyamba Jahudi, ka bara gurū Ukum-adat Jahudi, mandŭg tikuruk di Jerusalem.

⁶ Ngara di bidapŭd ngga Imam Bās Annas ka Caiaphas, John, Alexander, samŭn ngara adi bŭkŭn adi so rawang Imam Bās.

⁷ Ngara bada pinyuruh pinyuruh anŭ mijog di sirung jawin ngara; ka ngara siken, “Simuki angān bada daya bajang anŭ dapŭd panu? Ngga kuasa asi, ka ngga adŭn asi angān ndai simŭnŭ?”

⁸ Peter, ngga kuasa Roh Kudus, nam, “Bara pingibās bangsa Jahudi ka bara nyamba Jahudi:

⁹ kambŭi kieh andu ati dog siken pasar pingandai kana adi dog ndai di tunduh daya bajang anŭ, ka pasar simuki ayŭh dapŭd bua,

¹⁰ angān sopŭrŭg patut puan garang, samŭn sopŭrŭg daya Israel, nang daya ati adi mijog digiti di sirung jawin ngan mbŭh bua da kuasa adŭn Jesus Kristus so Nazareth adi angān ko masak di atuh rigang, ka adi Tapa mbŭh pakat so kabŭs.

¹¹ Pasar Jesus inŭh Surat-kudus nang, ‘Batuh adi angān tukang ramin taran mbŭh jadi anŭ adi siabo biguna.’

¹² Ayŭh sadi adŭ adi bisa nyiramat ata; di ndi ong ong mating daya bŭkŭn adi mbŭh dapŭd kuasa so Tapa ngga nyiramat ata.”

¹³ Bara daya Kunsil mbŭh inga inga kiris munki masam birani-i Peter ngga John, buang gŭh dinge ngara duwŭh mbŭh daya adi dŭh biyŭn sikura. Ka ngara gŭh rada nang ngara duwŭh anŭ taŭn ko biayo ngga Jesus.

¹⁴ Pak ngara dŭh tungang nang ani ani, sabab sianŭ adi ko dog pibua agi mijog diginŭ ayō Peter ka John.

¹⁵ Jadi ngara bada ngara ruah so birit Kunsil, ka dupan adŭp-i ngara piguru kirakar pasar ani re ngara ndai.

¹⁶ “Simuki ata re ngga ngara ati?” ngara nang. “Sopŭrŭg daya di Jerusalem mbŭh puan nang ngara adi ndai pingandai-nginga anŭ, ka ata dŭh tungang miman-i.

¹⁷ Pak isa kayuh ati dŭh kambang di dupan bara daya, ata bakan ngara da dŭh tia minyu di tadŭ daya ngga adŭn Jesus.”

¹⁸ Jadi ngara bagan ngara duwŭh da pari mŭrŭt ka pesan ngara da dŭh tia sikari kari minyu bait ngajar ngga adŭn Jesus.

¹⁹ Pak Peter ngga John nam, “Adŭp ngan bisa puan aki ndi batur di batŭh Tapa: tunda pinyiraan ngan kah tunda pinyiraan Tapa.

²⁰ Sabab kieh dŭh bisa dŭh minyu pasar kayuh adi adŭp ami mbŭh kiris ka dingah.”

²¹ Jadi Kunsil rabis bana bakan ngara, ka komŭnŭ pirupas ngara. Ngara kinyam mating aran re ngukum ngara, sabab sopŭrŭg daya mbŭh kibās Tapa amai kayuh adi mbŭh jadi.

²² Daya anŭ adi mbŭh bua da pingandai-nginga anŭ, agi rabis pat puru sawa umbur-i.

Simayang Mite Atin Pagan

²³ Ripas Peter ngga John dog pirupas, ngara pari ka tibaran adŭp ngara ka kidaan di ngara kayuh adi bara pingubak imam ngga bara nyamba bangsa Jahudi ko nang di ngara.

²⁴ Kan bara adi sabah di Jesus dingah kayuh anŭ, ngara samah bidua ka Tapa: “Tuhan, Kaam mbŭh napa rangit, ong, ka rawŭt, ka sopŭrŭg kayuh adi agi dieh!

²⁵ Ngga Roh Kudus Kaam mbŭh minyu so baba babuk ami David adi urun Mai, kan ayŭh nang, ‘Mani daya adi dŭh bangsa Jahudi raru baji; mani daya ndai pekat adi dŭh biguna?

²⁶ Bara raja di ong sidia adŭp ngara yŭn biperang, ka bara adi bikuasa nguruk adŭp ngara an rawan Tuhan samŭn Kristus-I.’

²⁷ Amai sawŭ Herod ngga Pontius Pilate mbŭh tikuruk di kupo ati ngga bara daya adi dŭh bangsa Jahudi samŭn bara daya Israel, rawan Urun kudus Mai Jesus, adi Kaam mbŭh mien jadi Kristus.

²⁸ Ngara mbŭh tikuruk ka ndai anŭ adi Kaam, so ka kuasa ngga pinyiraan Mai, mbŭh natu nang re jadi.

²⁹ Ka tingga meh madin, Tuhan, munki masam ngara natang kieh. Turung kieh, bara urun Mai piagah agah Mai ngga atin pagan.

³⁰ Ton tangan Mai pibua daya adi birandam, ka bada pingandai-saruh ngga pingandai-nginga dog ndai ngga adŭn Jesus, Urun Mai adi kudus.”

³¹ Kan ngara ko simayang, tarun yŭn ngara tikuruk bigugoh. Ka sopŭrŭg ngara mbŭh brisi ngga Roh Kudus ka piguru piagah agah so Tapa ngga atin pagan.

Sopŭrŭg Ngara adi Sabah samah samah Dapu Kayuh

³² Tibaran adi sabah mbŭh ndi atin ndi pekat. Mating so ngara nang tadŭ tadŭ kayuh adi-i dapu mbŭh tung adŭp-i, pak ngara samah samah sua dapu sopŭrŭg-i.

³³ Ka bara pinyuruh, ngga kuasa bās bisaksi di pinyimakat Tuhan Jesus; buang berkat bās, Tapa mbŭh ren di tunduh ngara.

³⁴ Mating daya darŭm tibaran ngara re sutok di tadŭ kayuh. Adi biyŭn tana jua tana, adi biyŭn ramin jua ramin, ka duit adi ngara dapŭd,

³⁵ ngara taban ka bara pinyuruh. Duit anŭ ngara kutung di barang naan nanyam adi-i biguna.

^36-37 Jadi meh, Joseph, daya Levi so Cyprus adi bara pinyuruh kadŭn Barnabas (rati-i “Sianŭ adi Ngatat”), jua jangi tana ka nyerah duit-i anŭ ka bara pinyuruh.